“Shànshér we Nár Bungànī “
Shvngbe mvdvmø Gvray Mongzøl lòng laqtuqdaq!
Kristu vdòng taq Shóngshø’ng we pèmè vnvmchvngmaq, Dèni nø Shànshér we Nár Bungànī Vkangpè Yesu Wurgang mvdvm gønshaq dvbø’nshì nø shì yangì we angni íe.
Dèni tashì lúnlvm Gvray Mongkà nø,..Yohan 18:1_40,19:42 vdòng taqkèní íē.
Kristu vdòng taq Vpø’ íwe pèmè vnvmchvngmaq, Gvray gvsangò té vtv’ng vpø’ vtv’ng shóngnønt , shóngnøntnò nònggùn kūnga í we vroqā lòng, Gvrayí dvgøò we chutchvng lòng nvng Vkangpè í shvngøt dvtú cvnà dø tiqdvchá, Nøngmaq kaq svng cúnshì dvzvr lòng, Vkangpè Yesu Kristu dvshá mvhøt taqsórí gønshaq vpnóngshì yangì we ” Shànshér we Nár lvban Bungànī” nø Chutchvng we tvrào mvdøng angkénī gø íe.
Dènio Gvray Mongkà tiqciq taqø vsvng pvn dvci shvngbe chutchvng lòng vtoshì lúnlvm rvt rvnaq vtv’ng mvhøtlvm lòng vhø’mò taqsórí Vmpà màv’m vm-aq vnatshi bø’ì we Vkangpè Yesu Kristu svng
” mvhøtlvm vhø’mò dvzømshú” ku Kàdvtutshú pè Esaya í dvtan yangà. “Ang dv̄mmá taqkèní nøngmaq banv́mshà”.(Esaya 53:5)
Mongkà vníciq taq dvzvr Polo í shø’nò dø tiqdvchá, Vkangpè Yesu Kristu nø Vpè Gvray kaq vpø’ò nø Àng nønt í lòng svng kømgø’m cvndvgøm bø’à, dvshá mvhøt vhø’mò nø gønshaq vpnóngshì bø’ì yv’ngkèní vrá dvzun lòng nvng dvgùng shvring we vtoshì lún bø’à, wā shø’n yangà. Getsemani kùlwàng yv́ng Vkangpè Yesu vjú røtshì dvgvp, Ngà nøt dø̄ nø laq mø̀í; Nà nøt dø mv̀ng laq í daq,” wā Vkangpè Yesu nø vjúrøtshì yangì tvrà svng yv’nglúnshìe.
Dv̄mmárì nvng Wurgang mvdvm kèní Vkangpè Yesu nø lvpkà (7) Kà shøn yangì. Nvmlat Kà nø, “Vpèá, angmaq mvrà èchutnāò; pàwálv́m wa nìnø angmaqí wàò long svng angmaqí mvsháò,”( Luka 23:34) Nøngmaq Bāsha vsvngrì kaq svng lvngdøm tìsi høqshaq angí nøngmaqò Mvra rì svng nàroqā yangshà, nøngmaq gø rvtø vrvm tāsvng tālè vroqké lúnlvm rvt Vkangpè Yesuí nø shvngøt dètú íe. “Vkangpè Vjúrøt Kà” shø’nshì vrvm, yalong mvtú svng dvdvm lvm vlē. Lvngdøm shvngøt Kà wàkà nø, “Vpèá, Ngà pvlàcè nø Nà wūr taq tvlēngshø̀nge,” (Luka 23:46) Ya Kà nvng tiqdø Vpè Gvray gvsangò Wur kaq àng tiqgóng shvngbe vp tvleshì yangì. Àng tiqgóng shvngbe Vpè Gvray gvsangò Shóngnønt vdòng taq vp tvleshì lòng nø, gvzà vchvkngè walòng svng Kristu í ècvnàì lòng gø íe. Vpè Gvray gvsang Wur kaq Vkangpè Yesu àngtiqgóng vp tvleshì dvgvp, Vkangpè Yesu nø Nøngmaq svng rvtø vrvm roqgā lvm i á:mì.
Kristu vdòng taq Vpø’ íwe pèmè vnvmchvngmaq, Dvshà mvhøtlvm, yvklvm rì nø Nøngmaqò lvpat taqgø, rvtø vrvm vhø’m v-du we dvchøng wā íe. Íni gø, Vkangpè Yesu Kristu Wur kaq Nøngmaqò lvpat svng Kv’mnøntní vp tvleshàì we taq ídv’ngte pvn vrvm shvngbe nø Vkangpè nvng tiqdø jór lúnlvm vlē. Vkangpè Yesu Kristuò jór nònggùn kūnga vzàm svng nøngmaqí yv’nglúnlvm vlē, nøngmaq kaq svng Vkangpè nø zí mvyø’è. Kvmnøntní vjúrøt tvleshì nø vtoshì laqlúnì, wvng dvshat nø nònggùn zí mvyø’è, shvngbe svng oqā.
