Gvrayò jejú rì svng vdèò dòng nøt kèní síngshá shìwe
Pope Leo XIV taqkèní zunbóy àngni dvpvt dvtú mòngkà vrìng bǿà we taq Gvray tvrà svng cv́n lún bǿshà we rvcángcèrì nøngmaq shvngbe nø vtang kèní tewe ìshøt ìgv̀n vtoshì lú:nì we íe wanø̀ dvtú mòngkà kèní vrìng bǿà we íe.
63 boq waboq mònggv̀n døng nvng singwe dvbùshvng bv̀nlì dvpvt vjúrøt lv́m tvyø dvpvt Pope Leo XIV taqkèní dvtú mòngkà shvlang bǿà wegø íe. We dvtú kàru taq Gvray àngò mv́ngshèr wenø nøngmaqò lvpat tvrà svng gø vpǿ dvzv́r nø̀ mv́ngshèr dvzv́r we íe. Kristu nø nøngmaq kaqsvng dvciq lvpat mvrà dǿng kèní chutcháng ráshà.
Vdèò dòngnøt mvsø̀n taq Gvray nvng vtoq vtip we tvrà, Gvray àngò laqmù rì svng vto shàì we nø̀ nøngmaqò lvpat tvrà rì svng vnvp dø vlíng vpo lúnì we tvrà íwe svng shvdǿm we íe. Gvray àngò shóngnøt nvng dvbùshvng bv̀nlì tvrà wawe nø mvdø̀ng mvdaq wá dvzv́r we tvrà mǿí, shóngnøt mvdàmø vrangshì nø dvzaq shìwe tvrà tiqlòng íe. Chø̀m døngku rì vdòng, shvngø̀mré rì vdòngø nvng paqzí zùngrì shvrà vrv̀m kèní Gvray dvbùshvng bv̀nlì tvrà svng dvzaqshì lv́m dang dvtú vdu we íe.
Gvray àngò dvshá shóngnøt nø we dvbùshvng bv̀nlì tvrà taq síngrál nøt, zit nøt rì àngtaqkèní ìshøt jejú shórā lòngwe svng vtoshì lúnì we íe. Gvrayí nø nøngmaq tiqgǿ vrv̀mò díràwe tvrà rì mvdàmø shvng shvngwa síngshá shaq ínø̀ nøngmaq taqkèní gø vjúrøt shì lv́m tvrà, àngò dvbùshvng mòngkà rì tashàì we nvng Sacramento vto shàì we taqkèní Gvray àng svng shálún lv́m dvzaq shàì.
Gvray àng dvbùshvng bv̀nlì taq dvzaqshì nø rip lúnì wenø dvpǿ shvdún mvlúnshì we jejú gømpaq tiqlòng gø íe wanø dvtú mòngkà vrìng bǿà we íe. Nøt shok nøt yvklv́m dvhø̀ taq ínìgø Gvray kaq vlǿmshì nø kám ráì we Yoseph døni Gvray àngò bǿn dvzv́r mvyǿ we bv̀nlì tvrà rì nø ìshøt tiqlòng ni íwe svng yv́nglún shìwe íe.
Wedø Gvray bv̀nlì tvrà taq riplv́m ègoì we nø tiq shvrà, tiqdang cè taqø wa vtangvm wedø mǿí nø̀ rvtø̀ vrv̀m àng jejú vdòng taq vlíng vpo lúnwe tvrà tiq tvrà gø íe. Nøngmaq tiqgǿ vrv̀mò lvpat tvrà rìnø Gvray àng bv̀nlì taq bìm rø nvng àng dvgàng rì døni Gvray àng yv́ngsvng zǿm shvngáng shìlv́m rà vchvk we íe. Mari nø Gvray àng dvkám kà svng táò nø shvlá vtang we, vháng vtang we dvgùng gùngshvng svng vtoshì lún ráà we dang kà shvbóngrì taqkèní dvtú bǿà we íe.
