Angpè angmè shvngøt dvtúkà
Angpè angmè shvngøt dvtúkà
Ngàcèá, nà tiqdv́ng vsvng dvpvt póāshú èwáshì nø, màshá wv́ngzà gǿ dvpvt nà la èpóshì bǿì nìnø, nà nònggøp kà rìí hǿng ètōngshì nø, nà pvlèí lā shèwáshì bø nìnø, ngàcèé, yadø èwáshì nø shèlutshì. Nà tiqdv́ng vsvng wur kaq nàjáá:mì we í nø, ang svng èdi nø ècipshi taqsórí røt ènímshì. Nà nē svng yøp mèdèzv́rni, nà nēsø̀m svng gø niqshì mèdèzv́rni. Shayit wur kèní vzuq vtshì padø, cā vlìò pè wur kèní cā lutshì padø shèlutshì.
Vzīng bø̀dèé, shvrō yv́ng svng èdi nø, ang tvrà rì ècv̄nshì sórí dèzitshì. Ang nø gàmzø̀ màdá nìgø, vgo zǿmshú nvng øpshú màv́laò nìgø; mvyù rvtø̀ taq mvzv́ng dvgǿshì nø, zànggá rvtø̀ taq mvzí dvyø̀ dvkømv̄me.Vzing bø̀dèé, kadvgvp høq vyálshìlv́m èwae? Nà èyøp yv́ng kèní kadvgvp kungshìlv́m èwae? Tiqlv̄ngcè èyøp nø, tiqlvngcè nìl èwa ke, tiqlv̄ngcè wur dètø̄mshì nø ènārshì la:ngí; dvrvtlv́m lòng nø vkǿ dø nà yv́ng tuq rae. Mvshámhoq lòng nø cìldv̄m lv̄ngshì gǿ dø tuq rae.Svng mvchá, svng mvgv́m gǿ nø yùmkà shø̀n sórí vwúshi gǿ íe.
Ang nē vsø̄mshì we, ang híí gø̄mla dvtā:nò we, ang wurhàmrì gvzv́mshì we ó, dvgoqnøt v̄l gǿí nø mvgv̄m we bvnyā gvcvt zv̀ndvtut vjø̄:nò nø; kadvgvp gø gv̀ng vkānglv́m wa dvbung lú:ngòe. Wervt dvshà mvhøtlv́m nø ang yv́ng chvnvnv́n tuq rae. Ang svng nø chvnvnv́n gvyaqa:tnò nø, dvbanshú gø màvl long.Yehowa shvngōshì we vchuq pv̀n v̄le, jø̀ngjǿng Ang nǿmshì we shvngøt pv̀n v̄le. Dvshv́ngshì we nēgvløq, vyà we pvlè, zì màvl vsvng shvwi shvyǿò we wur; bvnyā mvgv́m vjø:nò we nøt, mvgv̄m we wàlv́m vpán we hí; mvdìng we shvkse wáshì lòng nvng, angnv̄m angchvngrì dvhø̀ø̄ vshvtlv́m dvbūngò vsvng yarì íe.
Ngàcèé, nvpè dvkv́mkàrì svng ècà:nò. Nvmè shvngøtkàrì svng gø mègurni.Werì nø nà nøt vdòng taq èrishì nø, nà lóngjvng taq yv̀nggùnggùng ègwēshì. Wekvt nø nà tvrà èdi dvgvp, we rìí nà svng tvrà dètúvtne. Nà èyøp dvgvp gø nà svng èroqvtne. Nà nàshat ra dvgvp gø nà svng kà dvmv̀n longe. Pàwálv́m wani dvkv́mkà yarì nø svmīgwìn í nø, shvngøt dvtú we kà yarì nø gálòng íe. Zitzv̀nglv́m dvzitkà yalòng gø, gø̀nshaq cúnshìlv́m tvrà íe. Kà yarì nø svmaré mvgv́m kèní nà svng gārlv́m, góngnv̄mmè kàjø̄l shø̀n we pvlè taqkèní vgámlv́m dvpvt íe. Ang vnvp lòng svng nà nøt taq mèmēni. Ang nesø̀:mí gø nà svng leq mèshv̀lke.
Góngnv̄mmè rvt vsvng nø zidòng tiq chv̀ng wa vdv̄ng høq dvrvt sháòe.Mvshung svmā mèí nø vsvng gø̀nshaq svng nī dvchø̀òe.Vsvng tiq gǿí ang pøtpúm taq svmi lá:ngò ke, ang gwálv́m màkat we v̄le ma? Mø̀íni, vsvng nø vkatshi we mvjē mvdv̀m vzv́lshì ke, ang hí mvnuq kéò we v̄le ma?Ang tiqdv́ng vsvng chø̀mmè kaq dvcha:pmaò gǿ nø wedø tiqdvchá íe. Wemè svng vkoqò we kagǿ ínìgø, màshø̄nshaq nø mvlutshì long.
Vsvng nø svríshi rvt kø we ínìgø ang nø wedøni mvlutshì long. Iwe ang svng la tvp bǿò nìnø, ang nø shvngøt dvtv̀ng waqshì ràe. Ang chø̀m taq v́lāòrì í dv́ngteí teq ràe. Iwe vsvng svmā dvchap gǿ nø nøt màdá vsvng íe. Wegǿ nø ang vdè gvyaqshì we íe. A:ngí nø dv̄m vrī we nvng shvyǿm we vhǿm lú:ngò nø, ang svng yitkēlv́m lòng nø kadvgvp gø màmv̄ngvm. Ang chø̀mpè shǿm nø shv̀mná vcōr long kvtnø, dvshá màzashaq ang tvlēteqshì longe. Shvraq wv̄mshì pø̀ svng gø a:ngí màtō lú:ngò. Ang svng zōngyā kadv́ngte èzíò nìgø, ang nøt mvshø̀m long.
