Pope Leo XIV kaqsvng kámnøt tvrà rì shvnglut we tvrà svng tubúm dvhángā we (Liberty Medal) mùnghuq shvring gømpaq zíò we

American móngò uqbvdi ràlàng dvp àngké mvdò íwe (NCC) kèní 38 boq waboq nǿnggøm Liberty Medal gømpaq svng Pope Leo XIV kaq 2026 nǿng July 3 ni taq shvring gømpaq zílv́m íe wanø̀ vrìng bǿà. Yalòng gømpaq shvring we tvyø nø American móng svng vrang bǿà we 250 nǿng gøm mvshv́l pvrá vtowe àngni nvng gø wá vdu lv́m íwe svng shálún shìe. Svrabín koqkv́mpèò àng tiqlvpat kámnøt tvrà taq shvnglut we vko vkángrì, jòwe, mvjòwe tvràrì svng rvwvl we shvnglut vko vkángrì nvng shvng shvng wa shǿn vtán lúnwe vko vkáng rì dvpvt dvzaq shì bǿì we svng dvgùng shvring we íe.

We tvyø svng Independence Mall taqø wàlv́m íwe svng shálún shìe. Svrabín koqkv́mpè nø Vatican kèní (Livestream) nv̀mbø̀ng tvrà hang shvngkà ku oqà wawe mòngkà shø̀nlv́m íwe svng gø shálún shìe. Vatican koqkv́m kó shvngkà dvp vgopè Matteo Bruni taqkèní Pope Leo XIV nø welòng shvring gø̀mpaq nvng sing nø vtang kèní nøtlø̀m dvbù we svng dvtú bǿà.

Welòng tvyø lvmàng taq móng vsvngrì nvng kámnøt tvrà shølshú rì svng dvhømā lv́m íwe nvng vleá:mì we 250 nǿng taq American móng svng vrang ráà we vsvngrì taqkèní gv̀l ráà dvrá zìdanng rìnø dèni vbat taq mònggv̀n nvng singwe dvjà dvpvt kadángte vjú vl we tvrà rì svng gø vhøm nø vrashì lv́m vlwe svng shálún shìe.

Pope Leo XIV svng 2025 nǿng May shvlá taq Svrabín koqkv́m rvcàng bǿà mèpvng Svrabín koqkv́mpè nø Jú, Muslim, Christian nvng dvgá kámnøt tvrà mvdò rì dvhø̀ tasvng vpǿ shvring kelv́m nvng mòngzø̀l dø vzø̀m vzvp lv́m tvràrì dvpvt mvdø̀ng wá dvzaqshì bǿì wegø íe. Vsvngrìò dvgùng nvng kámnøt tvrà taq shvnglut we vko vkáng wawe nø vtang kèní vchvk nø ring we tvrà tiqlòng íwe mvtaq téwa shìwvt vhǿ:mò vsvngrì nvng vsvng gorø mvluq we mvdòrì dvpvt, shvnip shvnvr vhǿ:mò we vsvngrì dvpvt àngmaqò vsvng wawe dvgùng rì svng vtánā we tvrà íe wanø̀ Svrabín koqkv́mpè taqkèní dvtú we íe.

Mòngzø̀l we tvrà, shvnglutwe vko vkángrì nvng kámnøt tvrà taq shvnglut we vko vkángrì mv-vl we ínì nø mònggv̀n taq kadøgø mòngzø̀l lv́m tvrà mv-vl long wanø̀ Pope Leo XIV taqkèní dvkám we íe. We dvkám kà nø American móng dvrá (First Amendment) nvng gø vdu vbóng we svng shálún shìe. Liberty Medal nvng móng øp dvrá 1988 nøng taq pv̀ng ráà we yalòng shvring gømpaq nø mònggv̀n døng taq vlwe vsvngrìò shvnglut vko vkáng dvpvt dvzaq dvkángshì vsvngrì kaq shvngring we gømpaq tiqlòng gø íe.