Kámnøt tvrà wawe nø mònggv̀n vsvngrì mvdàm zitnøt vtáā we
Svrabín koqkv́mpè Leo XIV taqkèní dvtú mòngkà taq Yesuí àngmè puqwá kèní bø̀nwe vne zøq vsvngrì kaq gálòng dvtánā nø̀ vne vrá yv́ng dvzv́:rò we jømciq (Yohan 9:1-14) svng lvjøm pǿnā nø Kámnøt tvrà wawe nø vsvng dvcì rì nvng àngmaqò lvpat tvrà rì svng Gvrayí yv̀:ngnø̀ roqgvr wedø ni nøngmaq tiqgǿ vrv̀m svng gø wedang nvng singnø̀ yv́ng shálv́m shvdǿm we íe.
Svrabín koqkv́mpè taqkèní nøngmaq tiqgǿ vrv̀m svng kámnøt vne rì vtán ràwe dang chutcháng we tvrà svng kámnøt vne tánshàì nø yv́ng shálv́m dvkám we íe.
Dvbùshvng mòngkà taqkèní Yesu Kristuò tvrà døni nøngmaq gø zitnøt rì vtán bǿshà wedøni chutcháng we tvrà ò rvnaq we dang rì svng yv́ngshá lv́m àng tuqráì nø shvngøt dvtú ráshà we dang dvkám we íe.
Gvray àngò ìshøt jejú rì wawe nø vba dvtø̀l kèní pv́nmv́m ráshà we nøngmaq kaqsvng døngmvn we tvrà rì kaq síngshá yv́ngshálv́m dvpvt Gvrayí lòngzàpè svng nøngmaq dvpvt dvzv́rā vtshà we íe.
Kámnøt tvrà wawe nø vne zøqí wàò we tvrà tiqlòng ku mǿí rvwvl nøt rì svng vwadø vhwám dvzv́r we tvrà gø mǿí welòng tvle Yesu Gvray àng tiqgǿ svng chvpdvp yv́nglún vtoq vtip lú:nì we tvrà ínø̀ Yesu àngò síngrv́l nøt zitnøt rì svng tvle nø shvngøt dètú ráshà we tvrà tiqlòng gø í.
Yanila mònggv̀n taq mvrø̀ we, shvnip shvnvr kewe tvrà rì, shìwvt àngpv̀n pv̀n vkǿn nø̀ wedø mvhøt we shìwvt tvràrì vdóng taq Gvray tvrà dang kámnøt kèní shvkse wá dvzaqshì ràwe gø íe. Kámnøt tvrà wawe nø mònggv̀nò dølòng mvdàm nøngmaqò nve rì svng gv́r dèzv́:rì we ínø̀ mòngzø̀l we tvra, vdu vbóngwe dvrá tvrà, nvng vzø̀m vzvp wetvrà rì svng kámnøt tvrà kèní tiqdvtang gálòng svng èzí lú:ngì wegø íe.
Kristu nø nøngmaqò mvsø̀n nvrø̀m rì svng ètánāì nø̀ døngmvn tvrà, kámnøt kù:ngà rìsvng svkse wáshì lv́m tvrà rìtaq dèbangāì we íe wanø̀ Pope Leo XIV taqkèní dvkám we íe.
