Shaqré shaqtvng rì Yesu svng mvkv́m we
Shóngshø’ng we pèmè vnvmchvngmaq, Vmpà màv’m vm-aq vnatshi rvtø lvngcha bélú:ngì lvp svng tuq mv’nshì lúngì dø tiqdvchá Vkangpè Yesu Kristu svng vtōò we, mà tōò we, vtu vre vsvng rì gø téwa luqmvnshì tvrà svng móngkà taq yv’nglúnshìe. Dènio Gvray Mongkà taq gø, Vkangpè Yesuò Mongkà svng Táò taqsórí ya pè nø Kàdvtutshú tiqpè íe, wā shø’n taqsórí vtōò vsvngrì vl pàdø Àng kaq mà tōò tvplvm dvkvngshì we vsvngrì gø, shølshú vgo rì gø vl lòng svng mongkà taq yv’nglúnshìe. Nikodimu nø (Yh 3;1-3) vdòng taq Yuda vsvngrì kaq svng shvre rvt Vkangpè Yesu svng dørøm tut taq dì nø vhø’m lún yangà dang dvtánò we íni gø, Dènio Gvray Dvbùshang móngkà taq nø Vkangpè Yesu Kristu lvp kèní rìp nø vzaqshì we í Kà shøn dang yv’nglúnshìe.
Yadang svng dvdvmì nø, Nøngmaq gø, Vkangpè Yesu kaq vlømshàì we Kvmnønt Nøngmaq taq kadv’ngte vlē mà? Nøngmaq taq Ra vchvk lòng (mø-í ni) Nøngmaq zø’m dv’ngì lòng svng wa lún mvyø’ íwe Kvmnønt í mà? Mvhøtlvm yvklvm vhø’mshì rvtø, dvshà i rvtø rì taqgø kadø wā vtoshàìe mà? Nikodimu dø Vkangpè vdòng taq rip i mà? Nøngmaq dvtøpshì, Dvdvm shì dvzvrè. Vpø’ íwe pèmè vnvmchvngmaq, Yanila nø Nøngmaq dvpvt Vkangpè Yesu Nønt dvshà mvhøt vhø’m yangà rvtø, Nønt yòr vhø’m yangà we rvtø í dø tiqdvchá nøngmaq shvngbe gø Vkangpè Yesu vdòng taq, àng nvng tiqdø vzøm ínø vjúrøt tvleshì taqsórí Pvlàcè kvmnønt nònggùn kūnga lùshì cúnshì nø vl laqlúnì.
Yohan 7:40-52 taq;-
Vsvng loksok tiqmaqí kà yarì tá bǿà kvt, “Yapè nø jø̀ngjǿng ni Kàdvtutshú wepè íe,” wae. a 41 Dvgá maq nø, “Yapè nø Kristu ni íe,” wae. Iwe tiqmaq nø, “Kayv́ng! Kristu nø Galili kèní bunglv́m mø̀í. b 42 Kristu nø Dawi ang dvgø̀ng dvyø̀ kèní bung long nø, Dawi vl yàng we Betlehem rvwá kèní mv̀ng bung longe wa nø, Shànshér Kàru taq shø̀:nò we mø̀í ma?” wae. c 43 Wervt vsvng loksokrì nø Yesu rvt ta mvdò vwálshilv́m bung lú:ngì. d 44 Wekvt angmaq tiqmaq nø Ang svng tvp mvyǿ we ínìgø, tiq gǿ gø wur mvzúshì. e
Shaqré shaqtvng rì Yesu svng mvkv́m we
Cìlcèrì vtv́ng ráì kvt shvrúngshú vjìrì nvng Farisirìí kadø í rvt Ang svng mètvpmvtnøng má, wa rø:tnòe. Cìlcèrìí vtá:nò nø, “Vsvng yapè shø̀n dø nø kagǿ gø mvshø̀n dvr,” a:lòe. Farisirìí angmaq svng, “Namaq svng gø we pèí shemànv́m bǿshà ma? Vgo zǿmshúrì dvhø̀ taq, mø̀íni Farisirì taqkèní, Ang svng kagǿ kv́me lè? Dvrá lòng svng gø mvsháò we, vsvng loksok yamvdò nø, mvtv́nshaq íe,” wae. Angmaq mvdò taq vbá we, vzv̀ng Yesu yv́ng svng di ráì pè Nikodimuí angmaq svng, “Vsvng tiq gǿ svng nø, ang kà svng shini vzv̀ng màtáshaq, à:ngí wàò lòng gø shini màgúnshaq nø kà rvtlv́m dvrá màvl we mø̀í ma?” a:lòe. Angmaqí ang svng, “Nà gøni Galili kèní èíe ma? Galili kèní nø kàdvtutshú tiq pè gø mvbūng dvr we svng, kàru rì taq ègù:nò, wekvt èshá lú:ngòe,” a:lòe.
Mongkà ètashìnøng we Shvngbeí Gvray Pvlàcè ìshøt vtoshì leqlúnøng.
