Yesu nvng poqá vdòng vl Nē mvyv’ngshì pè
Kristu vdòng taq Vpø’ íwe vnvmchvngmaq;- Ya lvban nø, Vmpà màv’m vm-aq vnatshi rvtø (4) lvban wà lvban svng gòng bø’shà.
Ya lvban vdòng taq gø Gvray gvsangí kùpgar we jèjú vdòng taqø Shiqshan mongzøl dø cúnshì lúnì nø Gvray kaq Noqngømì taqsórí shvgùn shvring nø Kvmnønt Pvlàcè nònggùn kūnga lùshì lvm dvgø’shì lúnì lòng gø Gvray gvsang jèjú íe.
Vpø’ íwe vnvmchvngmaq ya lvban Rø v-du we Mongkà ciqrì:-
(1) 1Samuela 16:1b,6-7,10-13.
(2) Ehpesu 5:8-14.
(3) Yohan 9:1-41.
Vpø’ íwe vnvmchvngmaq,
Yese angce nóngtøm pè íwe Dawi svng nvmán só í mvt lvm rvt, Samuel kaq svng Gvray gvsangí nø dvzvr bø’à tvrà tálún shìe.(1Samuela16:1b,6-7,10-13)
Ehpesu Shvngømré rvzvngcerì kaq Dvzvr Polo í shvrìo we móngkà taq nø, Nøngmaq nø Gálòngo angcø angcèrì dø, cúnshì nø vl lúnlvm rvt gvzà vchvkngè wā, Dvzvr Polo í gø shvngøt dvtú nø shvdømè. (Ehpesu 5:8-14.)
Yohan 9:1-41(or) 9:1, 6-9, 13-17, 34-38 …… Yesuí nø Angmè poqá vdòng vl yv’ngkèní Nē mvyv’ngshì vsvng tiqpè svng dvbanò weí Àng nø ‘ Longza pè ‘ í dang svng dvtánshìe.
Vpø’ íwe pèmè vnvmchvngmaq, Angmè poqá vdòng yv’ngkèní nē mvyv’ngshì vsvng dvbanò Tvrà
Yalòng Angmè poqá vdòng yv’ngkèní ne mvyv’ngshì gø’ kaq svng dvbanò lòng nø, Nøngmaq shvngbe svng Pvlàcè góng nvng sing we ” Gálòng taq Nē í yv’ngshì lòng” (light and sight) svng Nøntní dvdvm dvzvrè. Vkangpè Yesu nø Rvgaqtømò Gálòng (the light of the world) í dang svng dvtánòe. Angmè poqá vdòng yv’ngkèní Nē mvyv’ngshì gø’ nø, téwa Kvmnønt vl pè í nø Vkangpè Yesu kaq Noqngømòe, wàe.
Yesu nvng poqá vdòng vl Nē mvyv’ngshì pè
Jøm mongka yaciq taq, Dø we vdòng yv’ngkèní Gálòng kaq tuq lún we tvrà svng shø’nè. Nē mvyv’ngshì vsvng Nē vrá yv’ngshì lònge. Yalòng nø dvbù lvm Shvngkà mvbø’nì íe. Dālvm gømlā gø íe. Íni gø, Yuda Vsvngrìo shølshú vgo rì í nø, yalòng svng Kvmnøntní vtoshì lvm rvt rvzaqè, nønt màrá. Wè mvdvm Nē mvyv’ngshì yv’ngkèní vrá bàná:mì lòng svng, vtv’nglvp kaq svng dvdòl ròe. Nønt mvbyōlvm rà íē. Íni gø, Yesuí nø wè pè svng láò nø yv’ng lún bø’à kvt, Àng kagø’ i dang dø’mshá lvm dvtánshìe. Nē mvyv’ngshì yv’ngkèní baná:mì vsvng í nø Yesu kaq svng yv’nglúnò nø vtv’ngshaq dvbù we í kám bø’ì.
Vsvng mvngpòng í lv’nò we Tvrà
Vkangpè Yesu lvpat, wè rvtø taq vsvng mvmè í nø dvdvm vbēò we vlē. Wèlong nø Pà i mà? wàni, vsvng tiqgø’ taq “Gàm màshvla lòng” ladv’ng vl nìnø, wè gø’ mø-í ni, angpè angmèmaqí Mvra wá vléò rvt íe wā shø’n we tvrà vlē. Vkangpè Yesuí nø Toniò Nønt mvsøn vjang laqyà anglí lòng svng tvlíngàòe. Wèlong nø Nēmvn pè svng dvban bø’à dv’ngí , Gvray gvsangò jór pòngbang jór nònggùn vzàm svng dvtán bø’à tvrà íe.
Parisirì nvng Mongkà Dvrá Svra shølshú vgo rì kaq shvdøm Kà
Moshi Dvrá taq Kangpè angni Nár ni taq vgámò we tvrà mvmè vlē. Wè ni taq bvnlìrì, dvmu rì ídv’ngte shvngbe, Zā rì svng dvban we gø mvwàlvm vgámò tvrà íe. Yesuí nø Angmè poqá vdòng yv’ngkèní Nē mvyv’ngshì pè svng dvbanò lòng nø lvmik gømlā dvtánò tvrà gø íē. Ya pè nø Angmè poqá vdòng yv’ngkèní Nē mvyv’ngshì gø’ íe, wā shvdø’ng mvsat lvm rvt, angpè angmèní kaq svng røtnò nø gun dvtøpmòe. Vkangpè Yesuí wàò we shvla we jèjú bvnlìrì, lvmik gømlā rì svng shvdø’ng shvngvng lvm rvt Parisirì nvng Dvrá svra móngkà shølshú Svra rì nø gvzà dvdvm vtiqè.
Gvray gvsangí nø Kàdvtutshú Samuel svng Kà shø’n we taq
” Vsvngrì í Nē í yvngò dø tiqdvchá Gvray gvsangí yvngò we mø-í; Vsvng ínø Mvrshvm svng wā yv’ng sháìe, Gvray gvsang ínø dòngnønt mvsøn svng yv’nglúnòe…”(1Sam 16:7b). Lvngdøm taq Gvray gvsang dvkv’m dø tiqdvchá, Yese ò lvngdøm nóngtøm pè í we Angce pè Dawi svng nvmán yøtì só í mvtnòe. Wè ni kèní nø Angkang pè Pvlàcè nø Dawi mvdvm taqø rúng bø’ì, wā Gvray dvkv’m Kà svng yv’nglúnshìe.
Vrá nø, Ehpesu shvngømré rì kaq svng Dvzvr Polo í shvngøt dvtú we móngkà taq nø yadø wàe,” vnvmchvngrì é Kadø íe wani vzv̀ng dvgvp namaq nø dø̄lòng taq èv̀l yv̀ngshà. Akvt nø Vkàngpè vdòng taq namaq nø gálòng èív́mshà rvt, gálòng angcèrì dø ècv̀nnøng…”Ehp 5:8) wā shø’n yangì. Nøngmaq shvngbe nø Tìløp lòng yv’ngkèní wè Gálòng svng vtoshì lúnìe. Wervt Gálòngò angcø angcèrì dø cúnshì nø vl ra bø’ì , Kv’m ra bø’ì, wā dvkv’mè.
Yesu Kristu rvgaqtømò Gálòng
Yesu Kristu nø Rvgaqtømò Gálòng Jø’ngkvp íe. Àng svng Kv’m vsvngrì kaq Gálòng zìe. Wè Gálòng nø Gønshaqò Gálòng íe. (Yhn 9:38) “Vkàngpèá, ngà kv́me,” wa nø Ang svng noqòe.” Wervt Gønshaqò Gálòng í we Angkang Yesu Kristu vdòng taq dvciq lvpat Cúnshì nø Shagóng Pvlàcè Gvray Ìshøt vtoshì laqlúnì! Shvngbe mvdvm Gvray mongzøl lòng laq vl daq! Amen.
