Yesu nvng Beelzabul
Tiq ni taq Yesuí màá tiq gǿ kèní màá cáng tiq long lú:ngòe. Cáng lúshiá:mì kvt, màá gǿ nø kà shø̀n lú:ngì; vsvng loksokrì nø dádv̀ng wae. Iwe tiqmaqí, “A:ngí nø cáng koqkv́m Beelzabul nonggùn kèní cáng lú:ngòe,” wae. Dvgá maqí nø Ang svng vlø:tnò sórí, muqlàng kèní shálv́m mvshv́lpvrá tiq lòng dètanshà, wa røtshìe. Angmaq nøt vdòng dvda:mò rì A:ngí sháò rvtnø angmaq svng yadø a:lòe. “Ang nø ang vpokē we móngdàn kamóngdàn ínìgø vcatnv̄me; angmaq nø angmaq vpōke we vsvng karvp ínìgø vcatnv̄me. Ngàí nø Beelzabul nonggù:ni cángrì lù:ngòe, èvlshàe. Satan gø ang nø ang vpōke kvt kèní ang móngdàn nø kadøwa lvzá:nòni? Ngàí Beelzabul nonggùn kèní ni cángrì lùngò we lā í kvt kèní nø, namaqò coqcv́n cèrìí cáng lù:ngò we nø kagǿ nònggù:ní lú:ngòe ma? We rvtnø angmaq nø namaq svng kà rvtshú wáshì longe. 20 Inìgø Ngàí nø Gvray nònggùn kèní cángrì lùngò we í nìnø, Gvray móngdàn nø namaq yv́ngø tuq daqì we íe.
Shóngshø’ng we pèmè vnvmchvngmaq, Døngman lòng nònggùn kūnga nø Gvray gvsang yv’ngkèní dì we ínø, vtu vgám rvweng lòng nø dø lòng nvng singè, yalòng nø màshvla lòng yv’ngkèní dì we í rvt Kristu í nø dvbùshang Mongkà taqkèní dvkv’mè. Vkangpè Yesu Kristuò v-rvm vrá mongzøl lòng nvng Angò jór pòngbang gømlā nø Gvray gvsangò jór pòngbang taqkèní wā ínø, vrá vtánshì lòng nø, Dø lòng nvng Gá lòng, shvla lòng nvng màshvla lòng nø tiqdø mà-vl rvt, mà zø’m rvt íe. Dènio Gvray Dvbùshang móngkà taq nøngmaq kaq svng dvdvm dvzvrè. Nøngmaq nø Vkangpè Yesu nvng tiqdø v-li e mà? Mø-í ni Satan lvp taq v-li mà? dvdvm vshat dvzvrè.
Nøngmaqò lvpat taq yvklvm banchvk rì nvng vhø’m v-du ra dvgvp Gvray gvsangí shøl nø dvtú we nònggùn kūnga svng vtoshì lúnlvm rvt rvtø zí nø dvgø’shì ràe, dvgø’shì laqlúni. Vpø’ íwe pèmè vnvmchvngmaq, Yalòng yoryorce íwe cvndvgøm lvm Dvla lòng ínø pvrvn lvm rvzaq we vkøn we vdòng taqkèní nøngmaq kaq svng mongzøl lòng zí lúnè. Shvngbe svng oqa.
