Yesu nvng Samari Svmaré me nvng tāsvng v-toq v-tip shøn we Kà
Shóngshø’ng we pèmè vnvmchvngmaq Ya lvban nø Vkangpè Yesu Vmpà màv’m vm-aq vnatshi yangì we rvtø lvngcha lvban (3) wa lvban svng gòng bø’shà.
Ya lvban taq rø v-du we Gvray Mongkà ciqrì:-
(1) Bungam 17;3-7
(2) Roma 5:1-2, 5-8
(3) Yohan 5:5-42
Kristu vdòng taq Vpø’ íwe vnvmchvngmaq, Búngám 17;3-7…. Gvray gvsangí Moshi svng dvkv’mò we Kà taq, Horeb shigung mvdvm yv’ngkèní lóngdøng svng Nào dvrvngí na dì:pmò nø, vtì shèyø’āò, wā dvkv’m yangà Pvlàcè kvmnønt mvshøl tvrà svng tá lúnshìe.
Roma 5:1-2, 5-8 …. Nøngmaq Mvra v-li taqsórí, Vkangpè Yesu Kristu nøngmaq dvpvt shíà lòng nø, Gvray gvsang nø nøngmaq svng kadv’ngte shóngwámshìe walòng svng dvtánò we shóngnønt shvkse gømlā íe, wàe.
Yohan 4:5-42 ….. Vkangpè Yesu nø cúnshì we gønshaq tì í lòng svng shø’nè. Yakuò tì dūng yv’ng, Samari Svmaré tiqme nvng tāsvng tālè v-toq v-tip we tvrà taq, Àng nø kagø’ íe, walòng svng shálvm rvt dvtánshì bø’ì tvrà yv’nglúnshìe.
Shóngshø’ng we pèmè vnvmchvngmaq, Yesu nvng Samari Svmaré me nvng tāsvng v-toq v-tip shøn we Kà taq;-
Yesu nvng Samaritan Svmaré me tāsvng tālè v-toq v-tip nø dvmvn we mvbø’n mvshøl yalòng taq, Vkangpè Yesuí nø aq-lvm tì kwiq rø:tvm yv’ngkèní pvngshì tvrà svng shálúnshìe. Samaritan Svmaré me shø’n we taq, “Nà nø Yuda vsvng èí we mø-í mà?, kadø í nø Samari mè kèní tì èrøtnvm è ma?” a:lòe. Yalòng nø èyvng lúngò dvgvp Meban mvshøl svng shá lún kvtwa, Jøm Mongkà yaciq í dvtánò lòng svng téwa síngràl shá lúnshìe. Yuda vsvngrì nvng Samari vsvngrì nø tāsvng tālè v-toq v-tip vzøm vzap we mà-vl. Kadvgvp gø tāsvng tālè shvngōkè nø wā vl we dvci rì íe. Yuda vsvngrì ínø, Samari vsvngrì kaq dvci dvgø’ng mvsher wā, gvzà yv’ng mvtvmá:mò tvrà svng shálúnshìe. Vkvtdø bø’n bung we taq, dvre tiqlòng lòng svng røtshì lvm rvt gø, gvzà bø’n mvdaq we íe. Vrá nø, Vkvtdø tāsvng tālè Kà màtángkè mvdvm Svmaré tiqme nvng vhø’m nø dvmvn we gø bvtut mvwàlvm bít ngò tvrà íē. Yadø í we mvbøn tvrà rì shvngbe svng Vkangpè Yesuí nø shvlēo nø wá dvtán yangà.
” Ngàí zøngò we tì lòng aq we kagø’ ínìgø kadvgvp gø mvbál long “Yn 4:14)
Paqzi vde rì shø’n we taq, dènila vsvngrì téka nø, Téwa vpø’ nø ring lòng kaq svng wā bálìe. Vsvngrì nø rìn vrá vlún vkvng Dvrá(justice), Døngman tvrà(truth) nvng shóngnønt tvrà(love) svng bál we íe. Àngmaq nø shanglut lún we vlún vkvng (freedom), shø’m wace mongzøl lòng (security) nvng Vsvng shvdaq tāsvng tālè vpø’ ke lòng (recognition) svng shóngwámshìe. Rvgaqtømò dvgùng rì ínø, nøngmaq lvpat taq mvdøng bálì lòng svng dvba:nà lún we mà-vl. Wervt St. Augustine shøn yangì we taq, ” Vkangpèa, Nøngmaq svng Na móngdàn dvpvt èpv’n èmv’n yangshà rvt, nøngmaq Nønt mvsøn nø, Vkangpè taq vdòng taq dvgø’shì lú:nì kvtwa, narshì lúnìe” wā shø’n yangì.
‘ Cúnshì we Gønshaq tì ‘ nø,
Nøngmaqò Nønt mvsøn vdòng taq, tì bálì lòng svng Nøntshøm dvbù lúnlvm dvpvt, Gvray gvsangí nø angce pè Yesu Kristu taqkèní cúnshì we gønshaq aqtì svng èzí íe.(Yh4:14) Wè gønshaq aq tìkwiq svng zi pè Vkangpè nø, Angò Mongkà nvng Angò jèjú gømlā rì taq vbáè, walòng svng yv’nglúnshìe, dvtánò lòng gø íe. Moshi ínø Horeb shigung mvdvm yv’ngkèní lóngdøng svng yaqò nø, aq-lvm tìkwiq vyø’ dvzvr yangà. (Búngám17:6).
Yesu, Dø’ngvng we lóngdøng i dang
Yesu Kristu nø nøngmaq dvpvt Dø’ngvng we lóngdøng íe. Angò Mongkà nvng Pvlàcè jèjú ìshøt zì gømlā rì (Word & Sacraments) svng gvzà vpø’ shvring laqlúnì. Vmpà màv’m vm-aq vnatshi rvtø lvngcha taq cvndvgøm lúnlvm dvkv’m we mvtú rì gø vbáè, vjúrøt we (Prayer), Vmpà màv’m vm-aq vnatshi we (Fasting), Shvla we jèjú bvnlì dvshá zā bvnlìrì (Works of Love) taq dvzaq dvkvngshì nø dvnúng shì lòng ínø, jø’ngjøngni nøngmaq shvngbe Pvlàcè kvmnønt tvrà taq jèjú ìshøt rì vtoshì lúnlvm vlē. Nøngmaq taq Shvrúng we Nønt mvsøn, vpnóngshì mvyø’ we Nønt laqyà, Kvmnønt taqkèní cvndvgøm nø tvleshì lòng í nø, Vkangpè Yesuò Cúnshì we gønshaq móngkà, tìkwiq svng aq lúnlvm íe.
“Tì yalòng aq we kagǿ ínìgø vrá bál longe.”(Jn 4:13b)
Vpø’ íwe pèmè vnvmchvngmaq Dènio Cúnshì we Gvray gvsang móngkà taqkèní Pvlàcè kvmnønt nònggùn kūnga lùshì lúnlvm, Vkangpè Yesu Kristu Àng tiqgóng taqkèní yalòng mvshøl taqkèní nøngmaq kaq svng dvkv’m nø shvngøt dvtú dø tiqdvchá, Vmpà màv’m vm-aq vnatshì rvtø taq Kvmnøntní vjúrøt tvleshì taqsórí Nønt mvsøn tiqgóng shvngbe dvcøp vdv’ngshì nø Cúnshì laqlúnì.
Shvngbeí Gvray gvsangò mongzøl lòng Shvmv’n jèjú vtoshì leqlúnøng!
