Shìlvm lòng vl dø yv’ng weí vto leqlúnøng
Waqpú í mvtshì Nár vshøm ni taqø Svrabín Koqkvmò dvkv’m Kà taq – Vmpà màv’m vm-aq vnatshi rvtø lvngcha pvngshì rvtø yv’ng Svrabín Koqkvm Leo í waqpú rì nø ” Svmi í vcōr we Mònggvnò vlīshì lòng nvng mvzvn rvt zø’má:mì we myoq wama rì” svng dvdvm dvzvrè, wā dvkv’m bø’ì. Roma myoq taq vl Saint Sabina Noqngøm Chøm tøngnu taq wà bø’à we waqpú í mvtshì Nár vshøm ni bóy ni Missa svng dvnùng nø shøl taqsórí Svrabín Koqkvm Leo í nø Nønt lí:ngshì lvm, àng mvdò nvng Shìlvm dvrá lòng mvdvmø dvdvm vjáng dvtøp taqsórí dvshvng bø’à. Noqngøm Chøm tøngnu kaq dì bø’ì we Vsvng vrvmò Mvr Dvnggvng mvdvm yv’ngø mvtshì nø vtoshì we waqpú nø ” Svmi í vcōr we Mònggvnò vlīshì lòng nvng mvzvn rvt zø’má:mì we myoq wama rì” svng dvdvm røn dvzvr dang, dènila Mònggvn àngdvja ku yalòng waqpú í mvtshì Nár vshøm ni taqø” Shìlvm lòng svng vtoshì lúnlvm, yv’ng lúnlvm rvt nvng Shìlvm lòngò mvsat gømlā rì svng nøngmaq vdòng taq rìshì lúnlvm rvt” røtnímshì dang, àngde tiqgø’ chípm kèní shá lúnshì we Mvra rì nvng Vsvng mvmè í sháò we Mvra rì waqpú í mvtshì we bóy angni nø Zun á:mì we Bóy me (Easter) mtuq vzv’ng kaq Vmpà màv’m vm-aq vnatshi lòng nvng vjúrøt shì lòng svng wáshì we Angni (40)ni, yaq dvhø Vmpà màv’m vm-aq vnatshi rvtø ò Nvmlat tiq ni íē.
Wè rvtø nø” shvngømré àng mvdò rì dvpvt nònggùn kūnga vl we rvtø lvngcha tiqlòng gø íe” dènila lvpat taqø Døngman we àng mvdòo Nønt nø dvkø ráì nigø Vm-aq vnatshi rvtø lvngcha nø ” Angdèo Mvra rì svng vtoshì we shvkse shvngømré tiqlòng ” ku vsvngrì kaq svng dvkøm dvzøpmà nø zi dang, yalòng mvra rì nø tiqgø’ sing we mvra rì nvng Vsvng mvmè nvng sing we mvra rì ya vní pvn nvng sing dang, Mvra walòng nø nøngmaqò Nønt mvsøn svng vtu vre nø nøngmaq vdòng yv’ngø vl dang Svrabín Koqkvm Leo í mvdøng dvkv’m nø shø’n bø’ì.
Íni gø tiq rvtø taq wa Mvra vní lòng svng téwa gwā we ” wurlaq tvrà, tong laqyà, móng lvmvng nvng shvngømré nvng sing we àng vtóng vbá we mvdò rì ” vdòng taqgø bø’nsháòe.
Vmpà màv’m vm-aq vnatshi rvtø lvngcha wàwe nø Nønt vwángshì lúnlvm nvng vlíng vpō yv’ngkèní tiqdvtang Yarì shvngbe yv’ngkèní” lutshì lúnlvm rvt vzaqshì we ” íe wā Svrabín Koqkvm Leo í dvtán bø’à.
Vmpà màv’m vm-aq vnatshi rvtø lvngcha ò ‘ Sasvna wáshì lòng nvng sing we àng lvjøm ‘ dènila Mònggvn tvrà dang taq dvkvngshì we rvtø lvngcha yv’ngø yalòng Shvngkà nø zilangré rì dvpvt téwa vríng lòng vl dang Svrabín Koqkvm shø’nè.
“ Shvngømré nvng Mònggvn yachang taqø bø’n bung we vléshì ri dvpvt angkang wáshì lún ràe” wàwe mvtú svng zilangré rì ínø téwa síngràl lúnò dang àng taqkèní vtánshì nø dvtan bø’à. Wervt rvzvngcerì nø Vmpà màv’m vm-aq vnatshi rvtø lvngcha svng tiqgø’ chípm ku Noqngøm we dvtdvt ku yv’nglvm tvle” Angdèo lvpat svng àngshvr wáshì lúnlvm dvpvt Døngman we àng tvrà rì “svng láò we” Nønt mvsøn laqyà shvlá vl rì ” kaq ya rvtø svng dvtit tvleā lún we àng tvrà rì svng lá mvnlvm dang Svrabín Koqkvm pè taqkèní vkvtdø dvkv’m nø dvdut bø’ì.
