Siro Fonesia mè angcèmè dvbā:nò we
Yesu nø weyv́ng kèní búngá:mì nø, Tiru nvng Sidon rvgaq dvrøt svng dìá:mì. Ang nø chø̀m tiq chø̀m svng gòngá:mì nø kagǿí gø laq mvsháò, wa dvdā:mò we í nìgø, Vsàngí mvsháò dø A:ngí máshì mvlú:nò. Yesu weyv́ng tuq weó, angcè mè taq mvmv́ng cáng zv́ngshì we svmaré tiqmèí Yesu shv̀ngkà tá bǿà chàng dì ráì nø Ang hí shvnvng kǿngkupshìe. Svmaré yamè nø Siria móng Fonesia wamà kèní Heleni vsvng í we, Yesuí angcèmè kèní cáng lúngalv́m Yesu svng røt mvnshìe.
Iwe Yesuí ang svng, “Cv̀mrérì v́mpà lú dv̀ng vgirì svng dvgupma màdu, cv̀mré cèrì vzv̀ng laq vgàvm,” a:lòe. Wemèí Yesu svng, “I nø íe, Vkàng pèá; v́m shvbóy lv̀ngpvng v̄l we vgi rìí gø cv̀mré rìí dvjá daqò we v́mpàshirì nø lvtǿá:mò ni!” wa vtá:nòe. Wervt Yesuí ang svng, “Nàí yadø vtv́nshì èsháò rvt, èlov̄m, cáng nø nvcèmè góng kèní lúshiá:mì,” a:lòe. Wemè ang chø̀m svng loá:mì nìnø, cáng gø lúshì dá:rì nø, angcèmè gø yøprà mvdv̀m vyálshì da we svng a:ngí yv̀ng bǿà.
Vpø’ íwe pèmè vnvmchvngmaq, tálúnì we Mk 7:24-30 ciq vdòng taq nø, Tiqdvng vsvng lvngàré, Svmaré tiqgø’ò vzaqshì Nønt lòng nvng Cìpshì we Kvmnønt lòng svng dvtánò nø, Àng kaq lá lún rì shvngbe svng Gvray í nø Shvmv’n jèjú ìshøt rì kadø wā Shvmv’nàe, pòngbang nònggùn vzàm vl lòng svng kashvbóng mvshøl taqkèní dvtánòe. Cìpshì we kūnga vzàm evl dvgvp Kvmnønt ínø vtu vgám lòng svng jór lún nø Gvray gvsangò Mvkok dvdí shóngnønt lòng svng vtoshì lún we jór kūnga vzàm svng dvtánòe.
Kvmnønt vl we rvzvngce gø’ vrvm dvpvt Gwà we Gvray gvsangò Mvkok dvdí shóngnønt, shvdún mvlúnshì we àng dvja hang svng dvtánòe. Cìpshì Nønt nvng Dinggvng we Kvmnøntní lá dvzaqshì gø’ vrvm dvpvt nø Gvray gvsangò Shvmv’n jèjú svng vtoshì lún nø, Jór nònggùn Pòngbang Kūnga vzàm vl we dvkv’m Kà mè tiqlòng gø íē, walòng svng dvshat nø nònggùn zí mvyø’è.
