RVGAQTØMÒ SHVLAQ NVNG RVGAQTØMÒ GÁ LÒNG
Shvngbeí Gvray mongzøl lòng vtoshì laqlúnì shvngbe svng Pamvra!
Ya lvban nø Angwa Nár (5) lvban wà lvban svng Gvray jèjú vdòng taq Pamvrace gòng bø’shà.
Rø vdu we móngkàciqri:-
(1) Esaya 58:7-10
(2) 2 korin 2:1-5
(3) Mt 5:13-16
Esaya 58:7-10 …… Døngman we bvnlì wáshì lòngí, Nào gá lòng nø dø vdòng taq Gá lúng nø Nào dø lòng nø Nvm dø shvr lùngè.
1Korinhtu 2:1-5…… Dvzvr Polo shø’n we taq, Korinhtu kaq àng dì lúngì we nø, Wurgang mvdvm shvt vhø’m bø’à we Krismatnò tvrà taqkèní dvgá pàgø mà dvshangò. Namaqò Kvmnønt nø, Vsvngrìo Paqzi taqkèní mø-í, Gvray gvsangò kūnga vzàm taqkèní wā Dø’ngvng lúnè, wā shø’n nø shvdømè.
Mahte 5:13-16 …… Yesuò lvmboqri svng shø’n we nø, Namaq nø Rvgaqtømò shvlaq, Gá lòng èínø:ngè, wā á:lòe.
RVGAQTØMÒ SHVLAQ & RVGAQTØMÒ GÁ LÒNG
Vkangpè Yesuí nø Mati dvbùshang Mongkà taq ” Kà shvbóng Shvlaq nvng Gá lòng svng àng lvjøm lu taqsórí, Dvzvr dvzømshú lvpat svng shvngøt dvtúè. Nøngmaq shvngbe svng rvgaqtømò Shvlaq nvng rvgaqtømò Gá lòng wáshì lúnlvm rvt ègō íē.
Rvgaqtømò shvlaq wáshìe, wàwe taq Gvray gvsangò móngdàn dvpvt vjú zílún gø’ wáshì lúnlvm dvpvt dvkv’m we dvzvr lòng íe. Àngde shvnvng Tiqdvng vsvngrì kaq shvla we tvrà svng dvshat nø yv’ng dvzvr lvm dvpvt, vjang laqyà shvlá dvtan dvzvr we tvrà íē. Rvgaqtømò gá lòng wáshì lúnlvm dvpvt, mvdøng angké nø Vkangpè Yesu Kristuò shvngøt dvtú dvkv’m Kà svng vtoshì lòng íe. Wè mèpvng chaqdvp bvnlì tvmu taqkèní dvtánshì lòng íe. Angdè èká:m dø tiqdvchá shøn we, dvnúng shì we, cúnshàì lòng íe.
Sha Góng Nvng Sing We Mvré Zā Bvnlì
Mt 25:31-40 taq shøn dø tiqdvchá, Kadø íe wani Ngà svríshø̀ng dvgvp, namaqí ngà svng shèv́m yv̀ngshà. Ngà bál dvgvp, namaqí Ngà svng shèaq yv̀ngshà. Ngà zaqlè wv́ngshø̀ng dvgvp, namaqí nàtō yv̀ngshà. o 36 Gwálv́m màdáng dvgvp, namaqí dègwā yv̀ngshà. Ngà zāng dvgvp, namaqí nàcún yv̀ngshà…. Yalòng Mongkà ciqrì nø, shagóng nvng singwe dvshá zā tùbùm bvnlìrì (corporal works of mercy) íe. Vkvtdø íwe bvnlìrì wáshì lòngí, rvgaqtømò shvlaq, rvgaqtømò gá lòng rì wáshì lúnìe.
SHVLAQ nø bølvm nìnø:-
Shvlaq nø kíshaq bø̀lvm nìnø, vrá lvkí long dø wá màshvla rvt pà vjú màvl? Pv̄nglap svng gu:rò nø, vsa:ngí lv̄mlv́m wa íe.
Svmi gwìn shvrúngrà taq lè shvrú:ngò nø, chø̀m taq vl rì shvngbe svng dvgáā lvm rvt le íe. Namaq nø Rvgaqtøm taq vl rì dvpvt gálòng èínøngè, wà Kà nø Vsvng kaq shvgùn shvring we Kà íe. Vrá nø, wè gø’ í wá ra lòng ” bvnlì døngja shvri bø’à lòng” svng gø dvdvm vshat dvzvrè.
Mongkà taq ” Shvlaq nvng Gálòng “
Jøm Mongkà taq ” Shvlaq nvng Gálòng ” svng ang lvjøm gvzà vchvk dø lv’ngshì lòng svng shálúnshìe. Angdùng ce ku èshø’n lúngò dvgvp, ‘Tìn gvyaqshì we, yvk we vdòng yv’ngkèní shø:pshì we í dvgáāè'(preservation & illumination) ang lvjøm vlē. Pvlàcè lvp (spiritual meaning) taq ang lvjøm svng bø’nà we nø:-
“SHVLAQ” (Salt)
— Dø’ngvng dø kíshaq vlē (permanence),
— Kà shvdiq dønge (loyality)
— Dø’ngvngè
(durability)
— Vlømvm daqè
(fidelity)
— vjú zílúnè
(usefulness)
— dvshàn dvshéràe (purification)…. vkvtdø ang lvjøm rì vlē.
“GÁLÒNG” (light)
— Nønt mvsøn dvgø’shìe (awareness)
— mvkø’m mvtøp (knowledge)
— Dvdvm rø’n we Nønt (understanding)…. Vkvtdø íwe ang lvjøm rì vl lòng svng shálúnshìe.
Vkangpè Yesuí nø ang mèpvng cvn dvzvrì gø’ vrvm kaq svng,” Rvgaqò Shvlaq, Rvgaqò Gálòng” èínøngè a:lòe. Vkangpè Yesu shø’nè “Rvgaqò Shvlaq, Rvgaqò Gálòng” kadøwā lvbø:nì mà? Mvmè Paqzi Kømzøp rì í dvtit tvle nø vrùo we Kàru svng vrá dvtit tvle mvyø’è. Wè rì nø:-
(i) Yesu kaq shá lún høq wáshìe.
(ii) Yesu vdòng taqø vháng vlún témvnshìe.
(iii) Yesu Kristu kaq svng Noqngømìe.
(iv) Yesu Kristuò Mongkà svng dvtit tvle nø dvshérè.
Nøngmaq nø kūnga shaqcvmì rì í shàe. Íni gø, Vkangpè Yesu Nønt ílòng cvndvgøm lú:nì lùngí, Vkangpè Nønt zø’mshì we, Vkangpè shvrúng we Dvzvr dvzømshú rì wáshì lún lú:ngìe.
(Mt 5:13 & 14) “Namaq nø rvgaq taq v̄l rì dvpvt Shvlaq èínønge.Namaq nø rvgaq taq v̄l rì dvpvt Gálòng èínønge.” Shvngbe svng oqā.
