Vsvng 5,000 shvá:mò we
Shvngbe svng Pamvra! Dèsháng vrá Pvlàcè nònggùn lùshì lvm Gvray móngkà nø Mk 6:30-34 ciq vdòng taqkèní íē. Mongkà vzàng røshì lvm wàì.
Dvzv́rrì nø Yesu yv́ng kø̀m ráì nø, angmaqí wàa:pmà rì nvng shvngøtna:pmà rì shvngbe Ang svng dvtáòe. Angmaqí v́mpà v́m gø mvlú:nò høq vsvngrì vtíshi we luq rvtnø, Yesuí coqcv́nrì svng, “Shø̀m wacè mòngzø̀l we tiq yv́ng dìì nø nārshìá:mì,” a:lòe. Wervt angmaq nø kùngshí zúnshì nø kupa shø̀m wa zø̀l we tiq yv́ng svng dìá:mì. Inìgø, angmaq búng we svng yà:ngò nø, angmaq svng sháò vsvng rìí nø, mvrìng rvgaq kèní gø vdàmdàm weyv́ng svng kvlv̀ng nø, angmaq vzv̀ng dvtuqshìá:mì. Yesu nø shø̀ kèní léshì daqì ke, vsvng loksok svng yv̀ng bǿà nìnø, angmaq nø roqshú màdá we vyv̀ng ré dø í rvt, A:ngí angmaq svng mvré lú:ngà nø angmaq svng mvshǿl mvme pv̀n shvngøt pà:ngòe.
Kristu vdòng taq Vpø’ íwe pèmè vnvmchvngmaq, Dènio Gvray Dvbùshang móngkà taq, Vkangpè Yesu nvng Dvzvr rì nø vmpa vm gø, narshì gø mvlúnò høq mvjór we tvrà svng yv’nglúnshìe. Àngmaq nø shøm wace narshì lúnlvm rvt gvzà mvrøt nø dvdvmò we íni gø yalòng tvyø svng Tiq taq gvlshì we mø-í dø, Vsvng loksok nø roqshú màdá vmàn we vyv’ngré pàdø dvtùqshì lú:ngì we svng yangò nø Mvréò we í Vsvng loksok rì svng vtō nø cúnshì we Gvray móngkà, dvrá, mvshøl rì angpvnpvn taqkèní shvngøt dvtú pvngò nø vpnóngshì yangì.
Yalòng nø shaqcvmì we Bāsha rvzvngcerì mvdvm Vkangpèo shóngnønt nø kadv’ngte tēè walòng svng dvtánò tvrà gø íe.
Vpø’ íwe pèmè vnvmchvngmaq, nøngmaq gø Vkangpè Yesu mèpvng cvnì we rvzvngcerì í shàe. Muqlang móngdàn nvng sing we Chutchvng we tvrà, Døngman we Gvray móngdàn dvpvt, Shvla we bvnlì, Mvré zā Bvnlì rì wáì taqsórí, nøngmaq tiqgø’ nvng tiqgø’ kaq svng jór nònggùn zí lún we cúnshì we Gvray móngkà rì svng dvshang nø, Vkangpè Àng Nønt í lòng svng cvndvgøm dvnúng lúnlvm, Shvkse wáshì lúnlvm rvt jèjú ìshøt rì svng mv’ng Kvmnøntní røtnímtvleshì laqlúnì.
