Vyáshì Ra We Nipah Virus
Shvngbe Pamvra!
Dèni lvngcha nvng sing we lvmvng tvyø taq nø, Yanila taq bø’n bung we, vyáshì ra we Nipah virus dvjáng, Yógā vkøn dang tiqdòngce dvtit tvle nø dvshang lvm íe.
Vpø’ íwe pèmè vnvmchvngmaq,
Dènila nøngmaq i tálúnì dø tiqdvchá Myanmar Móngdàn nvng rvgaq dvrøt íwe India nvng Bangladash móngdàn taq bø’n bung we Yógā dvjáng bø’n bøkvt gønshaq gø shí sháò we Nipah Virus nvng singdø tvlu dvgø’shì nø vyáshì lúnlvm dvpvt shá v-du rì shá vpán lúnlvm rvt gø vchvkngè.
Nipah wàwe nø angwa Toniò dukgwí zā yang dvjang pàdø ínø, gønshaq shí sháò we Virus tiqpvn íe. Yalòng Yógā dvjáng svng shvláwa banhøq cì lvjángà lún we Cì nø shini mà-vl pàdø, tvlu dvgø’shì nø kùpgar vgám we Cì gø Mònggvn taq shini mà-vl walòng svng shálúnshìe. Vsvngrìo gønshaq svng shì sháò we zidvng svng èshø’n lúngò dvgvp 40% – 75% høqshaq vháng we í rvt shvre mvra wā v-wàdø màdvdvm lvm vyáshì lvm rvt dvkv’mè. Yalòng Virus dvjáng nø kadø wā vcap sháò mà?.. wàwe tvrà svng gø shá ra bø’ì. Mvdøng nø Nina rì yv’ngkèní vcap lúngì we shvre dvké we Yógā dvjáng tiqpvn gø íe.
Nvmlat Patsip wàwe Nina rì yv’ngkèní vcap pvngshì lúngì wàe. Patsip Nina rì nø namsi nø’n rì svng gvzà shùng nø vm we íe. Wervt shøngtøng lvngpvng vjà we namsi rì svng gø vwawa dø tø’vm we wá mvdaq. Shøngtøng mvdvm yv’ngkèní íni gø Cāí āvmshaq í we namsi, mø-í ni tiqpvnpvn í āvmshaq namsi rì svng mvcáshì rvt Shvmì lì:pm nø vm we gø wá mvdaq wàe. Cā mø-í ni, tiqpvnpvní vmshaq vkvng we namsi rì svng gø bvttut màvmlvm, mvtø’vmlvm rvt gø vyáshì ràe. Zømwang Nina rì í vmshaq yv’ngø àngmaqò tøl rì vcaq nø, wè yv’ngø Virus Yógā vcaqsháò rvt vyáshì ràe.
Zømwang Nina ca angpvnpvn rì nø Vsvngrì í lvngì we aq v-tìbóng, Taq rì yvng rùng ra nø, niqrì shá sháòe. Wervt Nøngmaqí rvtø vrvm lv’ngì we Ki, Kù:ng, Bān,Taq rì, aq vtìbóng rì svng gø shvláwace wà:mshì nø Sher dø lv’ngshì laqlúnì..wvng dvshat nø nònggùn zí mvyøngè.
