Dvgá kàshvbóng
Shvngbe mvdvm taq Vkangpè Gvray Mongzøl lòng laqtuqdaq!
Vpø’ íwe pèmè vnvmchvngmaq,. Dèni dvshat ke nø nònggùn vzí kélvm, nònggùn lùshì lvm Gvray gvsang mongkà nø Mark 4:21-25 ciq taq vbá we Vkangpè Yesu Kristuò kashvbóng mvshøl taqkèní íē.
Dvgá kàshvbóng
21 Yesuí rá angmaq svng a:lò we nø, “Svmigwìn lv́nga:tnò nìnø mvgùrí kuplv́m, mø̀íni yøprà lv̀ngpvngø shvrúnglv́m í ma? Svmigwìn shvrúng rà taq shvrúng rà we mø̀í ma? ef 22 Kadø íe wani vmáshaq pà í nìgø, màdvtàn lú:ngò we màvl. Vwvmshaq pà ínìgø màpùn lú:ngò we màv̄l. g 23 Vnà vdá gǿí nø laq táò,” a:lòe.
Hkristu vdòng taq vpø’ íwe pèmè vnvmchvngmaq, Na Nga Nøngmaq shvngbe nø gá lòng svng téwa Shóngshàì rì wā íshà nø, dø lòng svng nø téka mvshóngshàì. Dèni tálúnì we Gvray Mongkà taq Na, Nga nøngmaq gø’ vrvm taqø vl we ” Gá lòng” svng vjú vl dø dvtan lúnlvm rvt, Shvkse wáshì lúnlvm rvt Gvray gvsangí dèkv’mìe. Nøngmaq gø’ vrvm taq vl we Gá lòng nø Dālvm gømlā jèjú gønpaq gø íe. Gá lòng wàwe nø dvshá zā ra vchvk gø’ svng dvbvngshì lòng, Nønt mvsøn vdòng yòr vhø’mò rì svng Nønt shvlømshì lòng.. yarì íē.
Gvray gvsangò dvshá zā mvkok dvdí shóngnøntní zì we Gá lòng svng nøngmaqò ni vrvm cúnshàì we lvpat taqø gá lvm, Shvr lúnlvm, àngde nvng nítvp rì íwe Tiqdvng vsvngrì mvdvmø Gvray gvsangò dvshá zā mvkok dvdí shóngnønt svng zí lúnlvm dvpvt íē. Vrá nø, Gá lòng wàwe nø Gvray gvsangò Cúnshì we gønshaq móngkà íe. Wè Mongkà svng tálúnshì lòngí nøngmaq vdòngø Gá lòng Shvr ra we íē. Shóngnønt vl ra we íe. Nøngmaq cúnshàì we, ni vrvmō lvpat taq Gvray gvsangò Gá lòng wáshì lúnlvm rvt gvzà vchvkngè, dø lòng nvng vhøm v-du ra dvgvp Shvr lúnlvm rvt dvzaq dvgvngshì ra we íē. Àngde nvng nítvp rì, Tiqdvng vsvngrì kaq svng Gá lòng íwe ( shóngshì, vlømshì, dvbù ra ) svng zí lún gø’, dvtan gø’ wáshì lúnlvm rvt Gvray nø shvrúngè. Gvray gvsangò Shvmv’n jèjú talen gønpaq kèní dvzaqshì ra we íē.
Vpø’ íwe pèmè vnvmchvngmaq, Téwa nø Gvray gvsangò Gá lòng íwe shóngnøntní àngde nvng nítvp vsvngrì, dvshà mvhøt vhø’mò vsvngrì kaq svng Gá lòng, dvshá zā mvkok dvdí shóngnønt, Dìngman lòng dvtan lúnlvm nø, gvzà vchvk ngè walòng svng dvdvmì taqsórí tvleshì laqlúnì. Vkangpè Yesuò Svmigwìn kashvbóng mvshøl svng gø shø’pshì nø lvpat taq kūnga lùshì laqlúni. Shvngbe svng Pamvra.
