Muqlàng móngdan shvdøngò we dang
Angwa Nár (3) lvbán Sunday Homily
Shvngbe svng pamvra. Ya lvbán nar nø Angwa nár (3) lvbán wawe nár svng gòng bø’shà.
(1) Esaya 8:23-9:3,
(2) 1Kor 1:10-13,17,
(3) Mati 4:12-23,
Muqlàng móngdan shvdøngò we dang
“Nøt èlíngshìnøng; pàwálv́m wani muqlàng móngdàn níshì ráì,” (Mati 4:17) wadø tiq dvchá nøtlíngshì gø’ Yesu angò coqcvn wàlvm vdū vpø’ we dang íe. Vrá, Kristuò coqcvn rì taq gv̀ng vkāng we nøt rvwin we laqmv-vl. Namaq shvngbe nø vrv́m vrá sórí tiq kà, tiq nøt tiqmvyùng nøtløm nøtshò cvnshì dvzvr e.
Kàngpè Yesu shvni mvtuq we BC 700 ján nøng taq tìbo Esarael nø cìl nvnggùn gvza káng we Assyria móngdan mèpvng taq vjáámì. Tìrìn lvp Yudá móngdàn nvng jerit vhøm we Zebulun nvng Naftali gùrwang nø cìl war taq vzvng vjáshaq íe. We gùrwang taq vlwe vsvngrì nø Babylon svng shøl yv:ngà. Dvgá wángzā móngdan vsvngrì nø we mvring ní taq vl dvzvrò nø wángzā vsvngrì nvng gønshú ídvzvr yv:ngà. Wedø wángzā vsvngrì gvza luqráì weó Nat pvrá svng noqngøm we vsvngrì gønshúshì ráì, wemvring taq vl vsvngrì svng wángzā rìí mvyàmkéò we dang taqkení øplú:ngà rvt angmaq nø síngdø vdùng taq vl dø íámì.
We dvgvp Messiah cháng Kàngpè tuqráì we rvtø, Gvrayí chvnglvm bvnlì nø Dø̄lòng vdòngø rūng we vní mvring taq vl we bashà rìí nø, Gálòng rùngmè tiq lòng yv̀ng lú:ngòe. Shì móng nvng ang bàngzì vdòng taq v̄l rì angmaq yv́ng svng gø, Gálù:ngí vwān daqòe,” wae (Mati 4:16) Esaya taqkèní shø̀n yà:ngà kà nø Kàngpè Yesu taq dvhø̄:mò we íe wa Mati dvbùshvng mòngkà nø shvkse íbø’ì.
Kàngpè Yesu nø rvgaq mvdvmø Gvray móngdan dvzøpmò shvzøngòe.
Kàngpè Yesu nø Galili rvgaq shvngbe taq tvríshì nø, angmaq júrøt chø̀mrì taq shvngø:tnò nø, muqlàng móngdàn Dvbùshv̀ngkà dvsha:ngò sórí, bashà rì dvhø̀ø̄ dvjv́ng, zøtna angpv̀npà:ní ziqkéò vsvng shvngbe kaq dvbānaòe (Mati 4:23). Dvbùshv̀ngkà dvsha:ngò we bashà rì dvhø̀ø̄ dvjv́ng, zøtna angpv̀npà:ní ziqkéò vsvng shvngbe kaq dvbānaò we dang taqkení Gvray móngdan dvzøplvm shvdøngò we íe. Rvgaq móngdan nvng Gvray móngdan màbúng. Myanmar Móngdan vsvng tiqgø’ ílvm Myanmar Móngdan taq shøqò nìnø vrvme. Gvray móngdan nø wedø mví.
Jú vsvngrì shølshúrì nø Abrahamò dvcì dvgøngrì írvt Gvrayò móngdan ìshøt gømpaq vpatlvmrì íe wanø dvdvm vléòe. Gvrayò móngdan vsvng ílvm ni vrvm dvzaqshì ràwe íe. Ni vrvm Gvray dang svng cvnràe. Mvrà svng vtáng nìnø Kàngpè vrá tuqráì dvgvp Gvray móngdan kení nàsvng vtolvm mví ‘Ang svng hí wur mèhūmnøng nø, cǿngcǿng dø̄ vdòng svng ègur bǿnøng; (Mati 22:13) wae.
Nøtlíngshì we vsvng nø Kàngpè Yesuí go kà táò vsvng íe. Yudá vsvngrì dvbū we mvdvmø, rvcángcèrì kv’mnønt tvrà vtolúnò wángzācèrì té dvbūe. Kàngpè Yesuí go kà svng kv’mnønt ní vtoò rvt Simon Peter, Andrew, Yaku nvng Yohan, nvmlat coqcvnrì nø nøtlíngshì weó coqcvnrì íráì we íe. Angmaq vdá we ìshøtrì svng là:ngò nø Kàngpè Yesu mèpvng cvn we íe. Angmaq nvng laqyàrì svng gø bø’à we lvjøm gø íe.
Gvrayò móngdan dvpvt dvløt we nø vnvm vchvng dvhø taq gv̀ng vkāng we nvng nøt vwál we dang íe. Nøngmaq shvngbe nø mvrà dvpvt nøtlíngshìlvm nvng Gvrayí shøl we vdùng cvnìnø tìløp løpshì bø’shà we íe. Wedang taqkení nøngmaq rvgaq mvdvmø Gvrayò móngdan tiq tvrà kení shvzøng bø’shà we íe. Dvzvr Poloí shvdúme, rvcángcèrì nø nøngmaq nvng vbúng we shvngømré vsvngrì íe wae. We shvngømré vdùng taq serè dvké we dang nø mòngkà dvshvngshú shvngøtshúrì dvhø taq tāsvng tāle vpǿ we dang màvl, nøt gvng vjàng nø vrvm vrá lvm màvl nøt vwálshì we dang íe.
Gvrayò móngdan angcø’ angcèrì íbø’shà rvt shvngømré vdùng taq tiqrvp døngku tiq chøm vsvngrì dø vrvm vráshì nøt màvl, Kristuò shóngnøt taqkení mvínì we shvngømré nø bàng vkànglvm ídaqe. Kristu nø shvngbeò angkàng íe, angsvng kv’mnønt vneí KVM ìnø vjúrøt shàì nìnø mòngzøl we shvmán jèjú ìshøt gømpaq vpatlvmrì íshàe. Wervt nøngmaqò Pvlacè shvlut we lúnlvm dùng nøt mvcøn taq shóngnøt angrø vsaqshì høq dvzaqshì ràwe svng vtolvm waì. Shvngbe svng oqà.
