Gvray Vyv̀ngcè
Mèpvng ni taq, Yesu nø ang yv́ng svng di ráì we Yohaní yv̀ng bǿà nø, “Eyv̀ngnøng, rvgaq tø̀m mvrà lúashú pè Gvray Ang Vyv̀ngcè nø yapè íe! ‘Ngà mèpvng di daq pè Ang nø ngà mvdv̀m té ring pè íe, wvng nø shø̀nò pè nø yapè ni íe. Kadø íe wani Ang nø ngà màvl vzv̀ng kèní àv́lshaq í yà:ngì.’
Ang kagǿ í we ngàí gø mvshángò. Iwe, Ang nø Israel dvcì kaq dvtanlv́m rvt ngàí nø tì taq tìløp løpmangò nø dø̀ng rángà,” a:lòe. Vrá, Yohan shvkse wáshì nø yadø gø wae. “Pvlàcè nø kāø dø muqlàng kèní lashì daqì nø Ang mvdv̀m nārshì daqì we ngàí yv̀ngòe,” a:lòe. “Vzv̀ng nø Ang svng ngàí mvshángò we, ngà svng tì taq tìløp løp dèzv́r Pè A:ngí ngà svng yadø èv̄le. ‘Pvlàcè nø kagǿ mvdv̀mø lashì daq nø nārshì daq we svng nàí èyv̀ng bǿò nìnø, wegǿ nø Shànshér Pvlàcèí tìløp løpmashú pè íe,’ èv̄le. Yalòng svng ngàí yv̀ngò rvtnø yapè nø Gvray Angcè pè íe, wvng ngà shvkse wv́ngshø̀nge,” a:lòe.
Tìløp YawHán shøn we nø, Vkàng pè Yesu í wā nøng maq svng Palàce taq kè ní dvshèr lún ì we nvng, Gvray angcè jøng jøng í yàng shà. Vkàng Yesu nø nøng maq rvcáng cè rì dvpvt rvgaq tøm mvrà lú ā shú pè Gvray ang Vyvng cē nø yà pè ni íe wà yàng ì.
Vkàng pè ò lvpvt tvrà rì svng shá lún ì we nø gàm vlì we rvt íe. Nøng maq cvm ì we rvtø kè ní tìløp kám lún ì we gø, dvshèr lún ì we gø Gvray jèjú rvt íe.Mvrà vroq Sacramentú Jèjú rvt , nøng maq ò mvrà rì svng echùtnà ìe.Missa kàgvp Muk nú:ng we Sacramentú taq kè ní ,Vkàng Yesu nvng vzøm vzvplún ì nø , Pala cē nònggøn lún ìe.
Vkàng pè Yesu nvng vzvr ì kvt nø nøngmaq í pà gø wá mvlún ì we svng døm shì ra e. Nøngmaq vm ì we , aq ì we , dì ì we rvtø vrvm Vkàng pè svng shà ì kvt wá Vkàng pè yáng kè ní ìshøt lú:n lúng ìe walòng svng rvtø vrvm dvdàm vjáng íwang nø nònggøn zí mv yøne e.
