Vmpà màv́m vnatshi dāng
Yohan coqcv́nrì nvng Farisirì nø v́mpà màv́m vnatshì yàe.
Wervt vsvng tiqmaq dì ráì nø Ang svng,“Yohan coqcv́nrì nvng Farisirì coqcv́nrì nø v́mpà màv́m vnatshì we,
Nà coqcv́nrì nø pàwálv́m v́mpà v́m mànatshi ma?”a:lòe. Yesuí angmaq svng a:lò we nø,
“Zvmì shvzøng kùng taq zaqlè rì nø v́mpà màv́m vnatshi we kayv́ng v̄le?Lvngàshv́r pè nø angmaq nvng tiqdø vl dv́ngte nø,angmaq v́mpà v́m vnatshì mvrà.
Wedø ínìgø lvngàshv́rpè svng angmaq yv́ng kèní lù bǿò we angni tuq rae.Wenila taq mv̀ng nø,
angmaq màv́mv́m vnatshì longe.Tìløp zíshú Yohanò dvzvrì nvng Parishirì í nø Mesia tuqlvm dang svng vlømshì taqsórí cāò rì í rvt, vm-aq vnatshi lúnlvm nø vchvkngè. Íni gø Mesia Gvrayò dvzvr rì taqkèní mvng nø vm-aq vnatshi mvra.
Lvngàshvr pè vl we rvtø taq nø, Ang dvzømshú mvdò rì shvngbe nø dvbù shvwe shì taqsórí vm-aq nø byōbyōce vl lvm rvtø mø-í mà? Kristu Gvray nø, àngde nø Mesia chutchvng Gvray í lòng svng dvtan we mvtúrì í dang dvbùshang Mongkà dvshvng we, V-na zønli dvshérà we nvng Cang Satan dvchøp rì kaq svng dvshérà we vkvtdø í rì svng dvbvnà we íni gø, wè rvtø taq vl Vsvngrìo Nønt, vjang laqyà dvdvm Nønt rì nø Síngràl màpvn rvt (Brimtì anglí gwi) pàdø Kristu í àngshvr vrvngò lòng svng mvsíng mvràlò, mà tōshì nø vlē.
Wervt nø, Kristu svng Mesia chutchvng angkang pè ku yv’nglúnlvm dvpvt nvng Angí àngshvr dvnùngò lòng svng vtoshì lúnlvm rvt àngmaqò dvdvm Nønt anglí rì svng gur nø dvtøp vjáng dvdvm Nønt, Síngràl Nyan paqzi àngshvr ( Brimtì Gwi àngshvr) taqkèní gùn dvtøp síngràl lún ràe.
Nøngmaq ígø Kristu svng Mesia Chvngkang pè Gvray ku dàqvtū vtoshì lún bø’ sha mà? Kristu wā nøngmaq dvpvt chutchvng angkang Longza pè í dang Kvmnøntní vtoshì nø Kristu mèpvng cvn we, vlømvm daq we rvzvngcerì ku v-li nø nøngmaq shvnvng gurgur Kristu Gvrayò Shvkse wáshì laqlúni.
