Yesuí Galili rvgaq bv̀nlì pà:ngò nø vsvng vbì pè gōò we
Yesuí Galili rvgaq bv̀nlì pà:ngò nø vsvng vbì pè gōò we
Yohan svng róng bǿà mèpvng, Yesu nø Galili rvgaq svng dì ráì nø, Gvray Dvbùshv̀ngkà dvsha:ngò sórí, “Angni vhø̄m ráì, Gvray móngdàn gø tvp níshì daqì. Nøt èlíngshìnøng nø, Dvbùshv̀ngkà svng èkv́m ránøng,” a:lòe.
Galili tìnúng shvnvngnvng Yesu di dvgvp, Simon nvng Anderu angnínvm nø, ngà vkwìke vsvng í rvtnø tìnúng taq shǿmgún dvgupke da we A:ngí yv̀ng bǿà. Wekvt Yesuí angní svng, “Ngà mèpvng ècv̀n ráshì. Ngàí nàní nø vsvng vkwíshú wáshì dvzv́rlv́m íe,” a:lòe. Wela:ngí angní nà:mí shǿmgún rì ca la:ngò nø, Ang mèpvng cv̀n bǿà. Vzv̀ng kaq tiq ramcè dìám dvgvp kùngshí vdòngø shǿmgún rì dvceshi we Zebedi angcè Yaku nvng angnv̄m pè Yohan svng A:ngí rá yv̀ng bǿà. 2 Wekvt A:ngí angnínvm svng chàng goò nìnø, angní nà:mí gø angpè Zebedi svng lv̀ngzv̄ng rì nvng tiqdø kùngshí vdòngø ca la:ngò nø, Ang mèpvng cv̀n bǿà.
Vpø’ íwe pèmè vnvmchvngmaq Dènio Gvray móngkà svng dvdvmì taqsórí nònggùn zí mvyø’ we taq;-Vsvng loksuk, Vsvng mvngpòng dvhø yv’ngø Vkangpè Yesu Kristu í nø Gvray
dvbùshang Mongkà svng dvshvngò sórí, Gvray gvsang móngdàn svng nvmlat vrvng pvngòe. Gvray móngdàn vrvng pvngò we taq, nvmlat tiq Nønt vwángshì lvm rvt gōo nø, angí dvshvngò we cúnshì we Gvray Mongkà svng àngmaq kaq Kv’mnøntní vtoshì dvzvròe.
Vrá nø, Ang nvng tiqdø Gvray gvsang móngdàn vrvng lúnlvm dvpvt Àng mèpvng cvn we lvmboqri svng gø gōò nø, Vsvng kaq vkwi we, lá lún we vsvng wáshì dvzvrè. Muqlang móngdàn svng vrvng we Sasvna bvnlì nø tiqni, tiqshvláce í wā dv’ngshì pvn mø-í. Ni v-rvm, rvtø vrvm Mònggvn angni bēni høqshaq dvnúng ra we bvnlìrì í rvt, Vkangpè Yesu Kristu mèpvng cvn we, dvzømshú rì rvtø vrvm mvmè ra we íe.
Wervt, vpø’ íwe vnvmchvngmaq vsvng mvmè í vjú lúnlvm lòng svng nvmlat taq gvl nø, Muqlang móngdàn nvng sing we shvla we bvnlìrì íwe, mvré zā shóngnønt, vlún vkvng, mongzøl lòng, Mvkok dvdí dvshá zā shóngnønt.. vkvtdø í rì svng vpø’ shvring zø’mshì nø lv’ngshì taqsórí angdè shvnvng, angri angrvp rì nvng, angdè vl gurgur taqø Vkangpè shvrúng we mongzøl byō we Gvray móngdàn svng vrvng laqlúnì, Shvkse wáshì laqlúni, wvng dvshat nø nònggùn zí mvyøngè.
