Vkangpè Yesu Tìløp kàmshi we bóy lvban

The Baptism of the Lord

Shvngbe mvdvm Hkristu Gvrayò mongzøl lòng laqtuqdaq. Shvngbe svng Pàmvrà! Ya lvban nø Vkangpè Yesu Tìløp kàmshi we bóy lvban àngni íe.

Ya lvban taq rø v-du we Gvray móngkà ciqrì vzàng shá dvzvr mvyø’è;-

Esaya 42:1-4,6-7
Dvzvr 10:34-38
Luka 3:13-17, 21-22

Yesu didaq lòng Yohaní dvtáò we

Mongkà tiqciq vzàng rø shìlvm wàì.

13 Yohaní angmaq svng, “Gúnlv́m dvdūshaq mvdv̀m vché dø mègúnnøngni,” a:lòe. 14 Cìlcè rìí gø ang svng, “Nøngmaq nà; kadø wáshì ráì ma?” a:lòe. Yohaní werì svng, “Kagǿ yv́ng kèní gø mvhø̀ mvhut gv̀msùng mèlùv́m nøngni; cé gø mècéshìnøngni. Namaqí èlúnnøng we zìbè taq nøt èshø̀mnø̀ng,” a:lòe.15 Bashà rì nø Kristu di daq we svng vlǿmshi nø caò we í rvtnø, Yohan nø Kristu we pè dv́ng mø̀í, wa nø dvdáshi rvtnø, e 16 Yohaní angmaq shvngbe svng a:lò we nø, “Ngàí nø namaq svng tì taq wā tìløp løpmaìe. Ngà mvdv̀m té rīng we tiq pè nø, ngà mèpvng di daqe. Ang híshvnam svnhǿng pǿnālv́m vshuq bv̀nlì wàlv́m gø ngà nø màpǿng. A:ngí nø, Shànshér Pvlàcè taq gø, svmi taq gø, namaq svng èløpmvtnønge. 17 Ang wur taq làwøt lá:ngò nø làkòn tø̀m lānglāngwa dvshèr lú:ngòe. Zong nø Ang vzá taq rvdāò nø v̄mpv́l nø maq mvdv́ngshi we svmi taq wv́r bǿòe,” a:lòe.
………..

Vpø’ íwe pèmè vnvmchvngmaq,
Tìløp Zíshú Yohan í shønò we taq, Chvngkangpè Yesu Hkristu ínø, Namaq svng Shànshér Pvlàcè taqkèní gø, Svmi taqkèní, vtì taqkèní Tìløp Sacramentu lòng èzí daq nønge, wā dvkv’mè. Mongkà svng nøngmaqí yangì dvgvp Svmi walòng svng Gvray gvsangí nø àngò bvnlì taq lá:ngò lòng svng yv’nglúnshì we íe. Gvray gvsangí, Moshi kaq svng Vcōr we Svmi mv’làm, Shø’ngpóng nørà màkat we vdòng yv’ngkèní Kà shøn lòng svng yv’nglún shìe.(Bng 3:2). Gvray gvsangò jór pòngbang svng dvtanòe. ( Eze 1:4;13 ), Gvray i roqgar we dang ( 2 koqk 6:17 ), Gvray nø Shànshér we dang ( Tr 4:24 ), Dìngman dø, Sher dø Dvrá Kà rvtlvm dang ( Zaf 3:19 ), nvng Àng Vkangpèo vroqgar dvkv’m dang (Esaya 66:15_16). ‘ Shànshér Pvlàcè gømlā dvtanè (Mt 3:11, dvr 2:3). Gvray gvsangò Svmi í dvsher we nvng shvmánò we dang, Gvray gvsang nvng àngò Mongkà svng vpø’ lvm, nøngmaq kaq svng dvtánòe.

Vpø’ íwe pèmè vnvmchvngmaq, Vkangpè Yesu Kristu í nø Shànshér Pvlàcèò Svmi nøngmaq kaq svng èzí ì lòngí, nøngmaq gø, Vkangpèo dvbù lvm dvbùshvng mongkào dvbùlvm Shvngkà Shvkse rì wáshì taqsórí Gá lòng wáshì lúnlvm dvpvt íē. Gvray gvsangò mongkà nø nøngmaqò lvpat svng tvling lún we kūnga vzàm vl nø, dvgá vsvngrì kaq gø Hkristu svng shálún høq dvtú nø dvtan lúnlvm ràe. Tìløp zíshú Yohan dø, Hkristuò dìngman lòng, Gá lòng svng shvkse wáshì lúnlvm rvt vkvtdø ègo íē.

Vkangpèo jór pòngbang, shóngnønt, jèjú lòng nø nà, ngà lvpat taq gá lòng wáshì lúnlvm , Na Ngà Shvrúngìe mà? Gvray gvsangò Shànshér Pvlàcè nvng vzøm vzap lúnlvm rvt Vkangpè kaq Kvmnøntní vjúrøt teleshàì. Tìløp zíshú Yohan í nø, vléshì mvra lòng svng chutnà lúnlvm, Nønt vwángshì nø vroqshì lúnlvm Tìløp lòng svng shvngøt dvtúè. Íwe shiwvt mvra bvttut mà-vl we Vkangpè Yesu Tìløp zíshú Yohan yv’ng svng dì nø pàrvt Tìløp lòng svng vtoshì e mà? Yadang svng dvdvm nø, Wūrgang mvdvm gønshaq dvbømshì bø’ì, Vkangpè àng shvwi lòngí Tìløp kámshàì lòng svng nøngmaqí tvlú dø’mshá ra lòng íe. Vkangpè Yesuò Tìløp lòng svng kvmshàì nø vtō shàì lòng nø, Vkangpè dvshā mvhøt vhø’m yangà Wurgang tvrà, Gvray dvzømshú wáshì taqsórí dvbùshang sasvna bvnlì svng vto nø Ká:mì yv’ngkèní pv’ngshì lòng íe. Vkangpè Àng tiqgóng ni mvra vl shipan taq zv’ngshi bø’ì. Vkangpè Yesuí nø Vpè Gvray gvsang Shvrúng lòng taq dàq vtu vtō nø cvndvgøm yangà.

Vrá nø, Gvray kaq àngdeò tiqgóng shvngbe svng vpnúng tvlèā nø, vlømshì lòng, dvbù lòng svng nàí cíngràl lúnè mà? Vpè Gvray gvsang gø, Longzapè taqø vtángshaq dvbù nøntshøm lún dang, nøngmaqí Tá vrá dø Mongkà taq dvtan bø’à. Shànshér Pvlàcè gø , wè Yodantì kèní búng lúngì yv’ngkèní sasvna bvnlì wá pvnglvm Vkangpè Yesu kaq dì lúngì nø Shvmán bø’à. Vkangpè Yesu nø àng kaq Kv’m vsvng rì dvpvt Kv’m ra, Pvlàce dvgøqshì ra, vlømshì ra angké tì por í a:mì.

Vrá nø, Tìløp kàmshì dvgvp, Muqlang gø vtáná:mì nø, Vkangpè nvng Shànshér Pvlàcè taqkèní “Vtì” gø dvshàn dvshér nø, pvn vrvm svng pánmvn we taq gø àngshvr vpō á:mì. Vkangpè Yesu àng tiqgóng cipshì taqsórí vpnúng tvleshì lòng nvng (kashin kamun)Tìløp kàmshì we taq, nøngmaqí gø kadø wā góng lúnlvm í ma? Kàdøwā vtoshì lúnlvm í mà? Dvdvm vshvt ràe.

Tìløp( Sacramentu ) jèjú lòng taqkèní Hkristu nvng tiqdø shì lòng svng vto nø, Vkangpè nvng tiqdø zun laqlúni.
Kangpè àng nvng tiqdø dvzun lúnlvm dvpvt Vkangpè àng nvng tiqdø cipshì laqlúni. Vkangpè nvng tiqdø àng ngórdvgung taqø vl lúnlvm, Vkangpè àng nvng tiqdø Zun laqlúni, wā St. Gregory taqkèní dèkv’m yangshà. Nøngmaq Na, Nga lvpat vlíng vpo lúnlvm lòng svng Na í yv’ng meyø mà? Dvbùshang Mongkà svng téwa cvnshì nø dvtit tvle dvsher gø wáshì meyø è mà? Vkangpè Yesu cipshì yangì Wurgang tvrà svng dvdvmì taqsórí Vkangpè àng Nønt ílòng svng vtō lúnlvm dvpvt Shànshér Pvlàcè kaq vjúrøt tvleshì laqlúni. Vkvtdø nøngmaq wáshàì dvgvp Muqlang gø Na, nga dvpvt vtángshaq í lúngè. Vkangpè àngò sasvna dvbùshang bvnlì taq zitzvng we rvzvngcerì wáshì lúnlvm, Shànshér Pvlàcè taqkèní Nønt mvsøn tiqgóng dvcøp vtvngshì lúnlvm rvt, Vkangpè Yesu Shvrúngè.
Rvgaqtømò Shvlaq nvng Gá lòng wáshì lvm rvt gø nøngmaq svng ègo íe. Rvgaqtømò chutchvng we dvbùshang mongkà nvng Dìngman lòng svng gø, nøngmaqò shvla lòng yv’ngkèní shá vpán cíngràl laqlúnò wā Vkangpè Yesu àng shóngnønt nvng Gá lòng nøngmaq kaq svng zí mvyøè. Na, Nga nøngmaq shvnvng Tiqdvng vsvngrì kaq svng gø dvbùshang mongkà taq dvbú lúnlvm, Gá lòng wáshì laqlúnì, Shànshér Pvlàcè nvng kømzøp lúnlvm rvt gø Vkangpè Yesu kaq vjúrøt tvleshàì.

Vpè Gvray gvsang àng Nønt shvrúng lòng svng, Vkangpè Yesuí lá lúnò pàdø, cvndvgømò pàdø, Nøngmaqí gø Vkangpè Yesu àng Nønt Shvrúng lòng taq cúnshì nø cvndvgøm taqsórí lá laqlúnì wvng dvshat nø nònggùn zí mvyøngè. Shvngbe svng oqā.