Yohan 19:25-27
Dèniò mòngkà svng yv̀:ngì dvgvp chø̀m dø̀ngku tiqlòng vdòng wawe taq àngcǿ, àngcèrì kadangshì luq nø vlwe ínìgø àngmè gǿ nvng téwa tvpní shìdø vlwe, àngmèò mvkok nø roqgvr we puqpǿm taq témvn shìnø àngmè nvng vlwe rvtø̀ nø téwa luqtàm wegø íe. Wervt àngmè vng àngcè dvhø̀ taqnø shóngnøt téwa dvchyiq vzø̀m wegø íe.
Àngmè wawe taqgø vsvngrì taqwa mvtaq nìnà pv̀n kaya rì taqgø àngcǿ àngcè rì mvdàmø kupgvr we, svrelv́m tvrà àngpv̀n pv̀n kèní lvpat zíshì høqshaq kupgvr dvzaq shìwe svng yv́nglún shie.
Dèniò mòngkà taq yv́nglún shìwe Yesu Kristuò àngmè Mari taqgø àngcèpè Yesu wurgáng mvdàmø vtaq bǿà lòngsvng yv̀ngbǿà mèpvng àng mvsø̀n nvrø̀m vdòng shv̀m mvsǿrí yaqò wedø zá vtøp we, vtangshaq nøt yòlwe vhǿmò nø Yesu àng gø̀nshaq vle á:mì we rvtø̀ høqshaq Àngcèpè shvnvngø ripnø vlwe svng yv́nglún shìwe gø íe.
Vránø we shvrà taq Yesu Kristuò dòng nøt mvsø̀n taqgø àngmè Mari àng shvnvngø vle wawe svng yv́nglúnò wervt àngò dòngnøt mvsø̀n taq nøtlø̀m we nøt kù:ngàrì vtoshì lúnò we svng síngshá shvla we íe.
Wedøni nøngmaqò lvpat tvrà dvpvt gø we Yesu àngní mèò dvsháza shóngnøt vzø̀mwe, nøt mvsø̀n kèní vzø̀m we tvrà svng yv̀:ngì nø àngmè nvng àngcè dvhø̀ vlwe shóngnøt tvrà rì cun dvtøp lúnshì we svng dèniò mòngkà kèní shvdǿm we íe.
