Shvwun dówe bv̀nlì tvrà nø chø̀mdø̀ngku svng vcvt dvzv́r we íe

Kyar Pyant bv̀nlì wawe vsv̀ngrì dang nvng singnø̀ mònggv̀n shvngkà dvprì taq gvzà nø vhú we svng dèni vbat taq tálúnì we íe. We bv̀nlì tvrà taqkèní mònggv̀n vsvngrì kaq vtøplv́m shìwvt tiqlòng ku vhǿm dvzv́r nø welòng bv̀nlì tvrà dang nvng singnø̀ Svrabín koqkv́mpè Leo XIV taqkèní gø vgám dvzaq shì nø we dø bv̀nlì wa vsvngrì kaq gvsat vgám lv́m dang dvtú bǿà we íe.

Welòng bv̀nlì taqkèní mònggv̀n shòlaqré rì dvhø̀ gvzàni zá vtøp dvzv́r we ínø̀ Italy móngdànò wamø̀ gvbàrì vdòng taq høqshaq móng vsv̀ngrì kaq vtøplv́m tvrà bǿn dvzv́r bǿà wanø̀ vtàn ráà we íe.

Yadang nvng singnø̀ Svrabín koqkv́mpè nø Vatican móng øpshú rì nvng vhømnø dvmvn we taq téwa dvshámvhøt lòngí vtøp kébǿà we móng vsvngrì ò lvpat rì svng yv̀:ngì nø yadø íwe bv̀nlì svng cvn cvn gvsat vgám lv́m dang dvtú bǿà we íe.

Gùn dvtøp we tvrà kèní shálún shìwe taq shvwun dówe àngdang dang rì nø vsv̀ngrìò lvpat tvrà, nøt mvsø̀n laqyà rì, wulaq tvrà rì shvngbe svng vsvt dvzv́r we ínø̀ kámnøt tvrà kèní gø vsvr dvzv́r we vsvng mv̀ngpòng dvpvt pvttut màdu we tvrà tiqlòng íráì we dang vtàn ráà we íe.

(20) àngyá mvzuq nǿngrì vzv̀ng kaq Italy móngdàn vdòngø vsv̀ngrìò lvpat tvrà rì, wamàrì vháng vlún lv́m tvrà bv̀nlì rì taqwa shvrúngshú rì nvng móngøp shúrì nø nøt løpshì nø vrang dvzaq shì yv̀ngì we tvrà rì svng yv̀:ngì nø cvnshì lv́m dang kèní dvtú wegø íe.

Wedang nvng singnø̀ Svrabín koqkv́mpè nø December 29 ni taq móng gv̀mzø̀ rì nvng vhømnø dvtú mòngkà dvtú bǿà we ínø̀ December 28 ni nø mvrà shèrwe cv̀mré rì shvt vhǿm yv̀ngà we shv̀nshér àngni bóy svng gø wáshì bǿì we íe.

We bóy àngni nvng singnø gø Yesu gv̀lyv̀:ngà we rvtø̀ nila taq Yesu koqkv́m svng Herodí vjø̄:nò we bv̀nlì taq mvrà shèrwe cv̀mré rì gvzà shvt vhǿm yv̀:ngà we nø mònggv̀nò svngpv̀n vko vkángrì, vdu vbóngwe dvrá rì svng dvgùng vlwe vsvngrì taqkèní ni cvtnò we ínø̀, Yesu Kristuò dvsháza shóngnøt svng vtøp gvsat we tvrà gø íwe dang dvtú mòngkà vring bǿà we íe.