Àng Nø’ng wàwe nø, Rvtø lvngcha nvng Rø Yang Zida Calendar Tvrà bønbung lúngì Tvrà
Nø’ngshvr- JANUARY 1
(New Year Day)-2026.
Shvngbe mvdvm happy new year (2026)nøng Nø’ngshvr ò Gvray mongzøl lòng vtoshì laqlúnì. Shvngbe svng Pamvra!
Gvray í zi we, Shvmv’nà we (2025)nøng nøngli svng mongzøl dø shvle lún bø’sha nø, (2026)nøng nøngshvr kaq svng vrá Mongzøl dø vtō nø góng lún bø’sha rvt Gvray jèjú svng gvzà oqā wàlvm ra íe.
Vpø’ íwe pèmè vnvmchvngmaq e, (2026)nøng nø’ngshvrò gønpaq ku, Nga taqkèní (Calendar) Rø Yang Zida bøn bung lúngì Tvrà nvng Chutchvng pè Yesu Kristu Gvray angmè Maria svng Vpø’ shì nø shvgùn shvring shì lúngì tvrà mvtú (2)ní dang svng dvshvng nø nònggùn zí mvyøngè.
Dèni rø v-du we Mongkà rì:-
Bungvm 6:22-27 ….. Gvray gvsang ínø, Kàdvtutshú Moshi kaq Israel Dvci rì svng Shvmv’n dvgø’ng Ka, mongzøl lòng zílvm, Shvmv’nà lvm rvt dvkv’m yangà tvrà mvshøl svng tá lúnshìe.
Galati 4:4-7 …… “ Rvtø angni vhø’m ráì dvgvp”, Jep we Dvrá lvngpvng vl rì svng chutchvng lvm dvpvt nvng, angcø angcèrì wáshì lúnlvm Shvmv’n jèjúrì svng nøngmaqí vtoshì lúnlvm dvpvt, Àng ce Longza pè svng ni nøngmaq kaq svng dezá:rà daqshà, wàe.
Luka 2:16-21 ….. Yvngroqshú rì Blenheim mvring høqshaq dì lúngì nø, Nina kok taq gvl bø’à we Longza pè Yesu Kristu nvng angmè Maria svng yv’nglúnòe.
Kristu vdòng taq Vpø’ íwe pèmè vnvmchvngmaq e,
Àng Nø’ng wàwe nø, Rvtø lvngcha nvng Rø Yang Zida Calendar Tvrà bønbung lúngì Tvrà
Vpø’ íwe vnvmchvngmaq, Nø’ng li svng shvlē i nø, nøng shvr svng vrá vtoshì góng lúnì tvrà svng, shvngbe í vsháshaq íe. Àng nø’ng wàwe nø, Rvtø lvngcha dang svng shø’nshì we ínø, Rø Yang Zida (Calendar) nø mà bá mvdaq íe. Mònggvn taqø bøng te we” Rø Yang Zida “(Calendar) pvn v-ní lòng vlē.
Wè lòng ní nø;-
(1) Julian Calendar
(2) Gregorian Calendar wàwe …ya vní lòng íe.
Julian Calendar nø Roma Koqkvm íwe Julius Caesar ò bøng taqkèní, BC (46) nøng taq wà yangà we , vrù yangà we Rø Yang Zida lòng íe.
Gregorian Calendar lòng svng nø Àng nø’ng (1582)-nøng taq Pope Gregory XIII ò Wur taqø wàò nø shvdø’ng yangà lòng íe.
Svrabyin Pope Gregory ò bøng svng lu nø Gregorian Calendar wànø bøng zíshì we vrù yangà we Rø Yang Zida Calendar lòng íe. Yalòng Gregorian Calendar dèni høqshaq Mònggvn taqø lv’ngshì we Calendar gø íe, walòng svng gø dvtit tvle nø shø’n mvyøngè.
JANUARY 1, Nøngshvr (NEW YEAR) wáshì lúngì Tvrà mvshøl
Julian Calendar taq, January nvmlat (1)ni svng nøng tiqnøngò nvmlat pvngshì angni ku mvsat vtō nø wà yangà. Wè lòng svng ni shvdø’ng yangà dang shálúnshìe. Pope Gregory XIII ínø, January (1) svng “Nøngshvr ni” (New Year’s Day) wànø 1582-nøng taq mvsatnò nø shvdø’ng yangà. Wervt, “JANUAR 1” nø ‘ Nøngshvr ni’ bø’n lúngì, tøshì lúngì lòng íe.
Vrá nø,Vchvk we tvrà v-ní lòng
Nøngshvr Angni taq vchvk we tvrà mvtú (2)v-ní lòng svng dvdvm nø wáshìe. Catholic shvngømréò Noqngøm Tvrà taq:
(1) Mònggvn Dø’ngtáng Mongzøl Byō we Angni (World Day of Peace)
(2) Shànshér we Maria Gvray angmè bóy (Mary, Mother of God), wáshì lòng íe.
Shànshér we Maria svng ‘ Gvray ò angmè’ (Mother of God) wàwe angbøng svng dvgùng shvring shì we nø, AD-431 nøng taq Ephesus mvring taqkèní wáshì we shvngømré Lìpong me yv’ngkèní Dvrá shang Kà dvkvngshì nø shvdø’ng yangà we íe. Maria ínø Vkangpè Yesu Kristu kaq svng shøq, gvl yangà. Yesu nø Gvray Jø’ngkvp nvng Bāsha Svngzāce Jø’ngkvp íe. Nø’ng (20) nøng mèpvng, AD (451)nøng taq wà yangà we shvngømré Lìpong, (the Council of Chalcedon) taq vrá shvdø’ngò nø, Catholic shvngømréò kvmnønt tvrà taqø Kv’m ra we (Dogma) tiqlòng ku Dvrá shang shvdø’ng yangà we íe.
Vrá nø, Jèjú Shvgùn We Tvrà
Nø’ng li taq vtoshì lún bø’sha we shvla we jèjú rì, Shvmv’n jèjú ìshøt rì, luqtvmè rø mvzvnshì. Gvray gvsang kaq gø’ vrvmò Nønt mvsøn vdòng taqkèní oqā wàì nø shvgùn shvringì. Gvray í zi we rvtø, angni, nø’ng àngshvr svng Góng lún bø’sha, Nøngshvr taq téwa shvla we jèjú ìshøt rì svng vtoshì lún nø, cúnshì lúnlvm rvt vjúrøt tvleshì nø vlømshì taqsórí kūnga lùshàì. New Year Resolution wàwe shvla lòng nvng mvnggá gvlshì tvrà gø mvmè vl v-duè. Nø’ngshvr svng Shvmv’nà we, Vpè Gvray gvsang kaq Nvmlat taq jèjú shvgùn shvringì. Nøngmaq shvngbe dvpvt chutchvng we Gvray angmè Maria svng gønpaq èzí ì rvt gø gvzà oqā wàì nø shvgùn shvringì. Gvray í zi we chutchvng wèo angmè ínø, nøngmaq dvpvt vjú vra røtním tvleāe. Yalòng Nø’ng angshvr kup taq, nøngmaqò dvnùng mvnggá tvrà taqø , kùpgar nø mongzøl lòng zi we í , shvrúng i we jèjú ìshøt rì shvngbe dvpvt vjúrøt tvleā dvbvng lvm gø, røtnímshì lúnlvm gø gvzàni ra vchvkngè.
Maria svng Gvray Angmè Ku Shvringshì lúngì Tvrà
Catholic shvngømréò Kvmnønt tvrà karù bok me, Dvrá leka bok CCC-721 mvr yv’ng Mariaò døngja bvnlì svng dvtan nø pø’nàe. Vpè Gvray gvsangí dvgøò we chutchvng tvrà mvnggá me taq, Maria ínø bvnlì Jø’ngja me svng vtoshì lúnòe. Nøngmaqò Shvngømré Angmè yv’ngkèní dvtut shvngøt dvtú we taq, Maria nø Shànshérè, tiqlvpat chømyo vjø’ng íwe nvng Gvray angmè gø íe. Chutchvng wèo tvrà dvnu mvnggá nø ang taqkèní nì dvgø’shaq íe.. walòng svng vkvtdø yv’nglúnshìe.
Luka dvbùshang Mongkà i shvngøt dvtú we nø, Maria nø angce pè mvdvmø, angmè tiqgø’ò bvnlì døngja tvyø svng kvmnønt taqkèní dvnùng bø’à lòng svng shvngøt dvtúè. Yvngroqshú rì di á:mì nø Bethlehem nìnà kūng taq dvbǿ:mò we sv̀ngshv́rcè svng gø lá lún bǿà. Angmaqí yv̀ng bǿà kvt, cv̀mré yagǿ dāng angmaq svng dvtá daqà kàrì angmaqí dvsha:ngòe. Marií mv̀ng nø, kà yarì shvngbe ang nøt vdòng taqø mvsø̄:ngò nø dvda:mòe.
“Vyv̀ng roqrìí shø̀:nò kàrì tá lú:nò dv́ngte nø dádv̀ng wae.” (Lk 2;18)
Vpø’ íwe pèmè vnvmchvngmaq, Nø’ngshvr kèní nøng be ni høq Ra ì we jèjú ìshøt rì Shvmv’nà lvm Gvray kaq røtnímshài dø, Shànshér we Maria, Gvray Angmè taqkèní gø nøngmaq dvpvt dvtut vjú vra røtním dvbvng lvm rvt vpø’ nønt Kvmnøntní shvgùn shvring røtním tvleshì laqlúnì, Shvngbeí (2026)nøng nøngshvrò Gvray mongzøl lòng vtoshì laqlúnì.
