Tiqcé vní pè Dvzá:rò we
Namaq nàyáshìnøng; kadø íe wani vsa:ngí namaq svng shaqré lìpong taq tèlē bǿnø̀nge. Júrøt chø̀mrì taq gø namaq svng nàdipmvtnønge. kl 18 Wemvdv̀mø, øpshú gàmzø̀rì nvng koqkv́mrì mv́rdv̀ngø Ngà rvtnø namaq svng èshøl bǿnøng nø, namaq nø werì nvng wv́ngzàrì svng Ngà dvpvt shvkse èwáshì lóngnø̀nge. m 19 Namaq svng øpshú dù rìí èjipnøng nø èrøtnvtnø̀ng dvgvp, kapà kadø shø̀nlv́m wa góng mègīnø̀ngni. Welv̄ng taqni namaq shø̀nlv́m kà nø namaq svng èzí daqnø̀nge. a:lòe.
Vpø’ íwe pèmè vnvmchvngmaq, Tálúnì we Gvray móngkà svng dvdvm nø Ngà taqkèní dvshat nø nònggùn zí mvyøngè we taq;-
Dèni nø St. Stephen ò bóy svng wáshì we angni gø íe. Angò cúnshì lvpat nvng Angò lvpat be lvngdøm angni høqshaq, Àng nø Shànshér Pvlàcè jórnònggùn dvnzøng we Shànshér vsvng tiqpè gø íe. St Stephen nø Yesu lvmboq Dvzvr rì í rvzvng yangà we nvmlat dvzømshú v-ní pè yv’ngkèní tiqpè gø íe. Angí nø Dvzømshú tiqpèo bvnlì rì svng shvlá vtv’ng dø dvnùng nø wà yangà. Tùbùm dvbvng ra vsvng kaq tùbùm dvbvngshìe. Dvzvr (6;1-7) Shànshér Pvlàcè kūnga dvnzøng rvt angí nø jórpòngbang gømlā rì svng dvtánòe. Vkvtdø jórpòngbang nònggùn kūnga gømlā rì svng dvtanò lòng gø shì yv’ngkèní Zun á:mì we Vkangpè Yesu Kristu svng Shvkse wáshì lòng íe. ” Vpè í nga svng dèzvr dø, Nga í gø Namaq svng dvzá:rìe.”
Vpø’ íwe pèmè vnvmchvngmaq, St Stephen nø Gvray móngdàn Sasvna bvnlì dvpvt dvbùshvng Mongkà svng dvshvngò taqsórí, Dìngman lòng svng shvkse wáshì, Gvray bvnlì rvt lúngì wàp vhø’mò nø shvt yangà. Àng nø Dìngman lòng svng shóngwámshì shvrúng pè gø íe. Vkangpè Yesu Kristuò Dvrá Mongkà svng dvshvngò nø, rvzvngcerì svng v-tu v-re rì kaq svng gø vrá tiqkvt v-tu vgám nø vtánshì pè gø íe. Àng kaq shóngshì we í, shvngømré gòng we rvzvngcerì vl pàdø àng kaq shvngōshì vsvng gø vlē. Ang svng mvshóngshì rì, àng kaq shvngōshì rì í tvpmò, Mvra cip láò nø shvt yangà. Angí nø vkvtdø v-tu v-re rìo Mvra rì shvngbe svng gø chutnà yangà. Angò ngvnshà rì vléshì Mvrà rì shvngbe dvpvt Gvray gvsangí chutnà lvm, vroqà lvm dvpvt gø Vpè Gvray gvsang kaq tvle nø vjúrøt dvbvng yangà.
Vpø’ íwe pèmè vnvmchvngmaq,Yadang svng St Stephen ò lvpat mvshøl taqkèní vkvtdø yv’nglúnshìe shálúnshìe.
Yadang svng dvdvm vjáng nø, nøngmaq taqkèní gø Vkangpè móngdàn dvpvt, Sasvna dvpvt vpnóng tvleshì nø, dvzaq dvkvngshì laqlúnì, shvkse wáshì laqlúni wvng dvshat nø nònggùn zí mvyøngèShvngbe svng oqā.
