Krismat nø vlømshì ra bóy nvng Gvray gvsang nøngmaq nvng tvpwa vl we bóy
Shvngbeí Krismatnò mongzøl lòng vtoshì laqlúnì shvngbe svng Pamvra.
Vpø’ íwe pèmè vnvmchvngmaq, Dèni Krismat angni taq, Ngà taqkèní nònggùn zí nø dvshat mvyøng we móngkà taq, Krismat nø vlømshì ra bóy nvng Gvray gvsang nøngmaq nvng tvpwa vl we bóy wàwe tvrà mvshøl taqkèní nònggùn zí mvyøngè.
Rø v-du we Gvray móngkà ciqrì nø;-
(1) Esaya 52;7-10…. Gvray gvsangò chutchvng lòng nø,
Rvgaq vtv̄ng mvtúrì taq vlrì shvngbeí nøngmaq Gvray angò shvlutlv́m tvrà svng yv́ng lúnlv́m dvpvt vsvng dvcìrì í dv́ngte mv́rdv̀ngø, Gvray nø ang shànshér we wurtùng dvtánshì daqè.
(2) Hebru 1;1-6 …. Lv̀ngdø̀m bàn taq Gvray nø Angcè pè keni shø̀n daqì tvra nvng Kristu nø muqlàng dvzv́rrì mvdv̀m ring we dang shvdømè.
(3) Yohan 1;1-18 …. Dvzvr Yohanò dvbùshang Mongkà taq nø, Yesu Kristu taqø Mongkà nø Svngzāce vpō á:mì nø nøngmaq nvng tvpwa vl bø’shà, wàe.
Kristu vdòng taq Vpø’ íwe pèmè vnvmchvngmaqè, Krismat Bóy me nø vlømshì lvm rà, Dalvm pvnrì nvng dvnzøng we bóy gø íe. Nøngmaq shvngbe taqkèní gø Krismat Bóy, Krismat angni tuq ra dvgvp gvzà Nøntshøm dvbù íe. Krismat Bóy me svng gvzà Byō dø, ngør dø wá dvzaqshàìe, vtō íe. Jø’ngjøngni gvzà Nøntshømì we, dvbù i sórí byō ì we bóy gø íe. Pàwàlvm wàni Krismat Bóy nø, Vpè Gvray gvsangí Chvngkang pè svng nøngmaq kaq gønshaq gønpaq èzí íwe bóy angni gø í rvt íe.
Vpø’ íwe pèmè vnvmchvngmaq,
Gvray gvsang ínø nøngmaq Bāsha rì kaq svng gvzà shúngwá:mshì rvt Longza pè Yesu Kristu svng dezá:rà yangshà. Adam nvng Ewa í vlé yangà Shiwvt Mvrà rì svng dvshé:rà lvm, shvl ā lvm rvt Chvngkang pè Yesu svng dezá:rà yangshà. Wervt nøngmaq taq, Nøng nī, nøng v-rvm wàì we Krismat Bóy, nøngmaqò Mvra rì svng dvshérà, shvl ra lvm rvt Chvngkang pè Yesu Kristu Gvray nø nøngmaq taqø rvtø vrvm vl lvm nø gvzà Ra vchvkngè walòng svng shvdøm nø dvshat we bóy me gø íe.
Vpø’ íwe pèmè vnvmchvngmaq, Krismat Bóy nø Vpè Gvray gvsangò Mvkok dvdí shóngnønt lòng svng nøngmaq vtoshì dvzvr we bóy gø íe. Vpè Gvray gvsangò Shóngnønt, dvshá zā mvkok dvdí shóngnønt nvng Kømzøp we Gvray gø ínø, Nøngmaq Mvra rì svng vroqà lvm rvt tuqdaq í we, Longza pè Yesu Kristu í dvbùshang Mongkà svng èríā daqshà we bóy gø íe. Wervt, Longza pè Yesu Kristu kaq svng nøngmaq, gø’ vrvmò Nønt mvsøn vdòng taqø shøq lúnlvm, gvl lúnlvm gvzà vchvkngè. Ni v-rvm nøngmaq cúnshàì we lvpat taq gvl lúnlvm, shvra zí lúnlvm gø vchvkngè. Nøngmaq tāsvng tālè vshòng ké lvm, tāsvng tālè Mvra vchut ké lvm, v-rvm vrá mongzøl lvm, Gvray Mvkok dvdí shóngnønt Krismat gønpaq svng vzí ké lvm, dvtan taqsórí shvkse wáshì lúnlvm gø gvzà ra vchvk we íe.
Vpø’ íwe pèmè vnvmchvngmaqè, Krismat Bóy nø Kristu Gvray nvng nøngmaq tiqdø v-li we Bóy gø íe. Nøngmaq cúnshàì we nī v-rvmò lvpat taqø Kristu Gvray nø nøngmaq nvng tvpwa rvtø vrvm tiqdø vlē. Wervt Nøngmaq Shvngbe, Na Ngà í Kristu Gvrayò mongzøl lòng svng dvshér gø’, rí ā gø’ í sha mà? wā dvdvm taqsórí Krismatnò Gá lòng svng rí ā gø’ wáshì laqlúni wvng dvshat nø nònggùn zí mvyøngè, Shvngbeí Krismatnò Gvray mongzøl lòng vtoshì laqlúnì, shvngbe svng oqā.
