Christmas rvtø̀ lvngcha taq mòngzø̀l tvrà nvng vzø̀m vzvp tvrà svng vrang dvzaq shàì

Pope Leo XIV nø Castel Gandolfo taq wáshì bǿì we bóy taq Christmasò mòngzø̀l lòng svng dvsher lv́m wawe nø shvngbe svng dvtú bǿà we íe. Castel Gandolfo taq vlwe Pope Paul VI zùng svng dinø InCanto bóy svng dinø̀ vriq bǿà wegø íe.

We Christmas bóy mènø cv̀mré cèrì dvpvt mvdø̀ng wáshì we bóymè tiqlòng gø ínø̀ we bóy mètaq Pope Leo XIV gø we shvràø kø̀mngǿm ráì we zùngmàng rì nvng mòngzø̀l dø pàmvràcè vzø̀mnø̀ vtoq vtip we wáshì bǿì wegø íe.

We bóy svng Svrabín koqkv́mpè kaq goò nø kømngǿm lúnbǿì we svng oqà wawe nvng dvtú mòngkà rì taqkèní Pope Leo XIV gø vtoqshì bǿì we íe.

Christmas rvtø̀ lvngcha wawe nø Kàngpè Gvrayò chutchángwe dvsháza shóngnøt rì mònggv̀n vsvngrì kaq èshórāì we rvtø̀ lvngcha gø íwe dvng nònggwònzi shvdǿm mòngkà rì taqkèní vtoqshì bǿì wegø íe.

Webóy taqø svrabín koqkv́mpèò dvtú mòngkà làngdø̀m tut taq cv́m vtang gǿ taqkèní Kàngpè Gvray svng yv́nglú:nò we dang mòngkà kèní shvdǿm nø vjúrøt bóy svng pàmvràcè dvdáng lúnbǿà we dang vrìngvtnà we íe.