Nønt mvsøn yv’nggúng èwáshìnøng nø Vkàngpè vrá tuq daq høq nøt shèyv̄ngshìnøng

Kristu vdòng taq Vpø’ íwe pèmè vnvmchvngmaq Ya lvban nø Adventu dvgø’shì Nár (3) lvban wà lvban svng gòng bø’shà we íe.

Ya lvban taq tashì lúnlvm Gvray Mongkà ciqrì nø;–

(1) Esaia 35:1-6, 10 ……
Kangpè angni rì taq dvbù shvwéshìlv́m lù:ngí wa dv̀nzø̀ng weí, yùrlv́m nvng nøt dvshàlv́m nø angmaq taqkèní shv̄ngv̄me.

(2) Yaku 5:7-10 ……… Dvzvr Yaku ò Mongkà taq, Nønt mvsøn yv’nggúng èwáshìnøng nø Vkàngpè vrá tuq daq høq nøt shèyv̄ngshìnøng. Vkàngpè tuqlvm nø yùl ráì, wā dvkv’mè we vbáè.

(3) Mati 11:2-11 …… Kangpè Yesuí Dvzvr Yohan kaq svng shø’n we nø, Muqlang móngdànò Hang gømlā rì nø àng taqkèní shvbø’nòe. Vrá nø, Yesuí nø Yohan kaq svng Kàdvtutshú rì mvdvmø téwa ring mà? wā dvtøpòe.

Vpø’ íwe pèmè vnvmchvngmaq,
Yalòng Adventu dvgø’shì Nár (3) lvban svng nø “Gaudete Sunday” wā bøng tø yangà. Àng lvjøm nø, dvbù we Nár, lvban wàwe íe.
Gaudete wàwe Kàru nø Latin Kàru chvng íe. Gaudete= Rejoice, dvbùe wā ang lvjøm íe.

Ya lvban Nøngmaq tashì lú:nì we Gvray gvsang Mongkà jømciq rì nø, Kangpè vdòng taq dvbùlvm lòng svng mvdøng gvl nø dvtáè. Yalòng Gaudete Sunday taq nø, dvgø’shì Nvmpu shingwvt hang Svmi tàng rì taqkèní ‘sawum pu nsam’ (pink) Svmi tàng rì shvrúngò nø, dvbù lòng svng dvtánshì dang íe.

Vrá nø;-
Yohan í Kà røtnò we taq,..

Yohan í nø Tung vdòng yv’ngkèní àng lvmboqri tiqmaq svng dvzá:rò sórí ” Na nø Tuqdaq pè” è í mà? wā Yesu svng Ka røtnòe. Yesu ínø, Angí dvtánò lvmik gømlā rì nø, Muqlang móngdànò lvmik gømlā hang rì í dang shø’nàe. Àng Kagø’ í dang zàngwa mvshø’nshì. Yesu angí wàò we Sasvna bvnlì svng shø’nè. Vkangpè Yesu shø’n we taq;–

— Nēman rì nē yv’ngshì lu:ngè.
— Hí vzè rì dì lu:ngè.
— Mvnggvng zā rì Sher lu:ngè.
— V-na mvtá rì v-na í tá lu:ngòe.
— shì vsvngrì vrá Zun lu:ngè.
— Dvshá hot rì svng dvbùshang Mongkà dvshvng lú:ngòe.
— Ngà rvt Nønt mà-tøp gø’ ínø ‘ ìshøt ‘ lúnòe…. wā vtánshìe.

Vrá dvtut, Vkangpè tvrà dvgø’à pè Yohan svng Vkangpè Yesuí not shvgùn shvring Kà shø’nè. Svmaré kèní shøqò we shvngbe kèní, Yohan mvdvm téwa te we tiqgø’ gø shini mvbung dvr. Kàdvtutshú rì shvngbe taqkèní Yohan nø téwa tēè, wā shvringòe.Vkangpè Yesu tuq lú:ngì.

Vkangpè Yesu Kristu nø nøngmaq gø’ vrvm kaq svng tuq lú:ngì. Dvtut Vkangpè Yesu nø, nøngmaq kaq svng dí mvyø’è. Vkangpè nø nøngmaq kaq, ya shvra ( mø-í ni) ya rvtø taq dì lvm Shvrúngè. Parvt i mà?..
— Nøngmaq ínø shvla lòng svng yv’ng mvlúnì; Nēcøq íni nø, nøngmaqò ne rì svng tá:nà lvm dvpvt íe.

— Nøngmaq v-na mvtá la í sha nìnø, Vkangpèo Mongkà svng tashì nø dvtut cvndvgøm shvdiq shì lúnlvm rvt le íē.

— Nøngmaq ínø shøn lvm lòng svng mvshønì, mvshøn lvm lòng svng le shø’nì kvt nø, nøngmaqò nònggùp tiqmaq svng tá:nà lvm dvpvt íē. Shvla lòng, Døngman tvrà rì svng shø’n lvm vchvng lvm rvtø rì vl we íe.

Wervt vpø’ íwe pèmè vnvmchvngmaq, Gvray gvsangò vchv́ngshaq rì vrá vtv́ng ra dvgvp nø, dvbù zàywà rì wànø Zion wamà svng gòng rae; dvciq lvpat dvbùlv́m lòng gø dvgùng vmō dø àngmaqò vgo taqø mōshì longe. Wè yv’ngkèní angmaq nø dvbù shvwéshìlv́m lù:ngí wa dv̀nzø̀ng weí, yùrlv́m nvng nøt dvshàlv́m nø angmaq taqkèní shv̄ngv̄me.Es 35:10b).

Wervt vnvm vchvng rìé, Vkàngpè vrá tuq daq høq nøt shèyv̄ngshìnøng, wā ( Yaku 5;7) taq gø dvkv’m yangì.

” (Filipi 4: 4)Kadvgvp gø Vkàngpè vdòng taq dèbùnøng; dèbùnøng, wvng, vrá tiq kvt a:lìe,” wàe.

” (Mt 11:6) Vkangpè Yesu shø’n we nø;- Ngà rvtnø nøt vtøplv́m màvl gǿí* mv̀ng nø, ìshøt ìgv̀n lú:nòe,” wàe.”

Wervt vpø’ íwe pèmè vnvmchvngmaq, Adventu dvgø’shì Nár rì taq shvdøm we cúnshì Gvray gvsang Mongkà ciqrì svng vpø’ shvring cvndvgømì taqsórí Krismatnò Gvray mongzøl lòng svng vtoshì laqlúnì. Shvngbe svng Oqā.