Svrabín Koqkvm nø Nvmshvr Tìni tut Asia móngdàn vtì dàm vhø’mò mongzøngcerì dvpvt vjúrøt dvbvng we

Nvmshvr Tìni Asia móngdàn tut taq vtì dàm, Nvmnø’ vnvn shì rvgaq vdøl rvt vsvng go rø (1500) rvzé gønshaq vmvng á:mì. Dènila taq Indunisia móngdàn taq shì Vsvngrìo shipan (883) gø’ , Thailand móngdàn taq (185) gø’, Malaysia móngdàn taq (3) gø’ vkvtdø Shì vsvngrìo shipan svng dvtánòe.

Vlē a:mì we Nár Adventu dvgø’shì lvban (2) wà lvban vyv’ng vjúrøt rvtø taq Toniò lvngcha dam vhø’mò rvgaq mongzøngcerì, Toniò lvngcha dam rvt gønshaq vmvng á:mì we angdèo Døngku vsvngrì dvpvt Nønt bøm Nønt yòr vhø’mò rì dvpvt vjúrøt dvbvng bø’à. Móngdàn vrvm, mvdò vrvm kaq svng gø shóngnøntní dvshá zā tùbùm dvbvngshì lvm dvpvt gø vréng dvkv’m bø’à.

Toniò lvngcha dam vhø’mò móngdàn rvgaq rì kaq svng tiqdvshaq í shvlut dvbvngshì mvdò rì gø tuqbø’ì nø gvzà Nønt bøm we í dvnùngòe. Shvngkà taq Dìrìqlingà nvng Indunisia móngdàn taqø rvgaq vdòng kaq vløpá:mì shini mà jángshì we vnàngrì mvmè vl dang, móngdàn v-rvm kèní vsvng go rø (900) dv’ngte vmvng we dang dvtánòe.

Indunisia móngdàn, Sumatara zunlung taq Sasvna bvnlì wàwe Gapuchin Doraq mvdò taqkèní gø dvgø’qshì ra màdá we, yílshì lúngì we Døngku vsvngrì kaq svng Zong Wang vdòng taqø dvgø’qshì ra dvgø’ā we, Indunisia móngdàn, Sibolga móng wál ò Gapuchin Doraq mvdòo rvgaq shølshú vgo íwe Father Yoseph Norbert Sinaga í rvzaq vtv’ng dvja nø vle á:mì.

Dvshá zā tùbùm dvbvngshì rì svng vkvt kèní wā pvngshì dang, pàwàlvm wàni mongzøngcerì nø lutshì lúnlvm rvt yílshì bø’ì dang, vkvt vrá nvmnvm wace vrá vtv’ng lúngì tvrà, dènila vtì nvng Svmi dang rì taq dvshà lòng vhø’mò dang, téwa nø aq tì dvkø lòng nø gvzà ni rvzaq we dvja í dang, nøngmaqò zong taq vtì mà-vl dang, zø’m wang yv’ngkèní wā zaq nø lv’ngshì dang, nøngmaqò vnvmchvng rì nø tiqdvshaq í tùbùm dvbvng lúnlvm rvt ra vchvk dang, mèpvng nø àngmaqò vl ra Chøm rì svng gø wáà ra dang, Sibolga Sasvna vdòng yv’ngkèní shì nø vmvng we vsvngrì mvmè luq bø’ì tvrà, Vatican Shvngkà dvkvngdvp kaq vtá:nà bø’à.