Tiløp Yohan mvshǿlMessiahò
Nøngmaq dvpvt Messiah svng dvzvrò wenø Gvray ang ngòrdvgùng nvng shóngnøt svng dvtvn we íe. Yeshi nø Dawiq angpè íe (Ruta 4:22) taq shálúnshìe. Mòngkà taq Yeshiò dvcì dvgøng, Dawiqò dvcì dvgøng wanø vkvt kvt shøn we nø Israel dvcì dvgøng svng wa we íe. Esaya cúnshì we rvtø taq Esarael vsvngrì nø necì vyø weí mvshø’mhoq dvsha nø gvza yat we rvtø íe. Solomon koqkámpè Shi bø’ì mepvng angò móngdàn vní kà tìn gvayq gvránshì bø’ì. Tìbo lvp íwe Isarael móngdàn nø vmánglvm dánshì ráì. Mèpvng taq nø Yudá móngdàn gø tìn hvyaq nø vmánglvm dánshìe.
Isarael móngdàn kení vsvng té mvlùng nø vshuq mvyàm kélvm dvpvt dvgá móngdàn memē svng shølshì bø’ì. Vsak gvza te we shaqré mvgámrì wa ngámshì ráì. Ang nø’ngrì memē vléráì rvtø taq vdè móngdàn svng lolvm vkáng zídaqā. Íwe té mvlùng tiq maq nø mvloámì. Dvshá dvré íwe vsvngrì wa lōámì. Wedø necì vyølvm dvshá dvré vhømò we Isarael móngdàn vsvngrì svng kà dvtutshú Esayaí Gvray Ang wūr nø vní kvt wakvt zúshi nø, Asiria nvng Ejip móng, Patrosi Kushi móng Elam nvng Shinar móng, Hamat nvng nvmukdvra tìshvlòng móngrì taqkèní mvzā vdv̄ng we Ang bashàrì svng vrá gùna:tnòe (Esaya 11:11). Shø’ng tiq tøng gvng vngàq rø’m bø’à we ang tøm taq kení vrá mvluq bànlú:ngì we shø’ng tiq tøng nvng shvbúngò we dang íe. Shø’ng tøm taq kení vrá yōlūng we bànlvm télvm rvzaq we svng Esayaí sháòe.
Vzvng tiq rvtø taq gvza tēshø’ng tiq tøng íyàng we Esarael vsvngrì nø shø’ng tøm dø íbø’ì we svng shvdúm we íe. Inìgø shø’ng tøm kení vrá yōlūng weshø’ng nø gvza tēwe shø’ng tiq tøng ídaqe. Yeshi rvp angtø̄m kèní gvlø̀m tiq gùng sø̄r longe, angò angrø̄rì taqkèní ang mvkuq zv̄r nø angshí shí longe (Esaya 11:1).
Esarael vsvng Yeshi dvcì dvgøng taqkení būnglung we Messiah nø vsvng shvngbe kaqsvng chutchvnglvm tuqráì we chvng Kàngpè íe. Nà mv́r èmáshì nìnø, angmaqí nøt vmá:ngòe. Nàí angmaq shaq èlùò nìnø, angmaq shì nø dvtø̀l svng vtv́ngv̄me. Nàí Nà shaq Pvlàcè dèzá:rò nìnø, angmaq vmv́nshaq ív̄m nø, rvgaq mv̀rshv̀m svng Nàí dèshá:ròe (Shvgùn Zàywa 104:29-30). Gvrayò Shvnshér Pvlacè nø vsvng tiqgø’ mvdvmø tuqrā dvgvp we gø’ nø jòr nònggùn kù:ngà dànzøng lú:nge wae. Wervt Pvlacè nø Abraham mvdvmø vhvpvm rvt kv’mnønt gvza tee. Vrá Moshi ígø vtolúnò rvt shølshú shvlá tiqpè íe. Dawi svng nø gvza káng we nònggùn kù:ngà lúnòe. Solomon koqkámpè ínø rá vsvng vrvm mvdvmø shánønt paqzí be:nyà lúnyv:ngà. Elia svng gø tiqpvn mvdvm tiqpvn shánønt dvtvn lúnlvm nònggùn kù:ngà zíyvngà we svng shálúnshìe. Gvrayò jòr nònggùn svng vsvng tiqgø’ ígø vgámlúnlvm mví.
Vrá nø Gvrayí rvsà:ngò we taq Gvrayí angmaq taqkení Pvlacè nvnggùn svng vtángshì bønì nø tin gvaq we vhømòe. Gvrayí rvsà:ngò we Solo taqkení shálúnshìe. Wekvt Gvray Ang Pvlàcè nø Solo yv́ng kèní rv́lshì nø, Yehowa yv́ng kèní mvgv̄m we pvlàcèí ang svng dvkiòe (1Samuel 16:14).
Mvdvm taq dvtúshì we koqkámrì taqkení Gvrayò Shvnshér Pvlacè nø Messiah mvdvmø dvtuqòe we dang svng yvngì. Esayaí Messiah nø Ang Pvlàcè, zitnøt Pvlàcè, cíngrálnøt Pvlàcè, gvcvt zi we Pvlàcè nvng jórnònggùn Pvlàcè, shánøt paqzí Pvlàcè nvng Yehowa svng vpǿ svre sháò we Pvlàcè nø ang mvdv̀m hapshì daqe. Ang nø Yehowa svng vpǿ svrelv́m lòng taq shvrúng longe. Ang vneí yà:ngò lù:ngí A:ngí kà mvrvt lú:ngò; vnàí wa táò lù:ngí gø kàciq mvrvt lú:ngò. Dvrvtrì dvpvt A:ngí dø̄ngmān lù:ngí kà rvtnāò nø, mònggàng taq shvnip shvnvlshaqri dvpvt dvrá dø kà rvwv̄nā lú:ngòe. Ang nònggøp taqkèní bung we dvrciqí rvgaq tø̀m svng vdip lú:ngò nø, Ang nònggøp taqkèní vhéshi we shaqí mvgv̄m màshvlarì svng shvt lú:ngòe (Esaya 11:2-4). Abraham, Moshi, Dawi, Solomon nvng Elishá shvngbe mvdvm taq Messiah ang tiqpè taq té kømzøp, té ring we íe wanø dvshvte.
Vsvng tiqgø’ ígø zímvlúnò vsvng vrvmí láí lúnmvyø’ we Cømsaq mòngzøllvm svng kømgøm kømzøp dø zíshúpé Messiah íe. Vyit nø vyv̀ngcè nvng tiqdø vl nø, kàngzì gø dv̀ngchècè nvng tiqdø bø̄m longe; nungwàcè, kàngkì vrv̀mcè nvng nìnà vrv̀mcè gøtdvhǿm vl nø cv̀mré tiq gǿí shø̄l lú:ngòe. Nùngwà ngv́mà nvng shvwí gø tiqdø shø̄n v̄m long nø, angcèrì gø tiqdø bø̄m longe. Kàngkì gø nungwà ngvlá dø kvláng v̄m longe. Nong cøq we cv̀mré gǿ gø bø̀zèr dùng shvnv̄ng mvnshì nø, nong vrv́lshaq cv̀mrécè ang wu:rí gø bø̀shvràng shøp svng mvnuq lú:ngòe (Esaya 11:6-8).
