Svrabín koqkámpè Leo XIV Assisi Wamà St. Francis ò, Dvgàm Taq Shvgùn Shvring Vjúrøt We
Svrabín koqkámpè Leo XIV nø November (20) ni Italy móngdan rvwè tut taq vlwe Assisi Wamà svng nvmlat poq tuq we dang nø Italy móngdan Catholic Svrado gvbà rìò (81) baq lipong dvdáng we angni írvt íe. Svrabín koqkámpè nø we lipòng taq tuqráì we Svrado gvbà rì nvng vhøm bø’ì we íe.
Svrabín koqkámpè nø Assisi svng yahatyïn taqkení vshvng (8) nayi ján rvtø taq tuq we íe. Modo nvng wamà svng dinø vnuq bvnyà, Túng laqyà, Shvring shvta vdū we nvng singrì shvràrì svng yvng bø’à. We shvràrì nø zaqle wvng dirì dvpvt lvjvngò we íe. Zaqle wvng di vsvng ang kíng sen tuq we íe. We mvdvmø Svrabín koqkám (20) pè gø tuq yvngà mvshø’l vlwe shvrà íe. Svrabín koqkámpè Francis nø (2020) nøng taq tuq yvngà ‘Fratelli Tutti’ nøngmaq nø vnvm vchvng mvdøngrì íshàe, wawe zàchùndo svng wur mvsat leqmat tú yvngà mvshø’l vlwe shvrà íe.
St. Francis Assisi nø Italy móngdan svng mvkok we Shvnshérpè íe. St. Francis Shi bø’ì we (800) nøng vhøm ráì rvt shvring lvm rvtø svng wàlvm gø íe. St. Francis ò, Dvgàm taq Svrabín koqkámpè nvng dawonkàn Shvrúngshúpè Marco Moroni nvng Shvrúngshú Jaù rì gø gvza kømráì we íe.
Svrabín koqkámpè nø St. Francis ò Dvgàm taq vjúrøt we íe. We mèpvng nvnggùn zí kà dvshvt dvtú shvngøt we íe. Svrabín koqkámpè nø Montefalco taq kàgvp nóng vjúrøt noqngøm dángí Santa Chiara Sister rì zùng taq vyvng v’m aq we íe.
Tvrà yvng gung ang mvtú dangrì svng shvngka dvp rìò røt kà svng Svrabín koqkámpè í vtánò wenø St. Francis ò Dvgàm taq Cømsaq mòngzøllvm, Italy móngdan taq vlwe shvngømré vsvngrì dvpvt vjúrøt dvbvngà we íe. Shvnshér vsvngrì gvza loq we shvrà taq tuq we dang, Deni nø Assisi Wamà, Nvpni nø Montefalco taq tuq rvt gvza nøntshøm dvbū we dang nvng Shvnshér vsvngrì í, gwørhøm mvkok dvzømdvzī dø lánshønge wa nø vtánshì bø’à we íe.
