Shøn vtàn lvm vko vkáng mvlú:nò vsvngrì dvpvt nøngmaq shvngbe taqkèní tubûm dvbangā ràe
Pope Leo XIV taqkèní Shøn vtàn lvm vko vkáng mvlú:nò vsvngrì nvng toniò dvjà svng roqgvr we vsvngrì dvpvt nøngmaq shvngbe taqkèní tubûm dvbangā ràe wanø dvkám we íe.
Wedø íwe bvnlì rì dvpvt shøn vtánā we tvrà svng Gvray àng gø shóngwám shìe wanø dvtú mòngkà vtàn bøà we íe.
Wedø íwe bvnlì tvrà rì taq ripnø dvzaqshì we tvrà nø Yesu Kristu ò chutcháng we bvnlì tvrà taq ripwe ku gø ílongwe mvtaq svngpvn vtoq vtip we tvrà svng gø shvla dø vlíng vpo dvzvrā wegø íe wanø shvdøm we íe.
Pope Leo XIV taqkèní mv-vl á:mìwe Pope Francis taqkèní 2015 nøng taq mònggvn svng dvtú nø vrìng ráà we Laudato si mònggvn dvjà tòniò dvjà svng roqgvr lvm wawe dvtú kàru bok svng gø nøt mvsøn kèní dømshánø chvpdvp bvnlì kèní gø cvn dvgøm dvzaqshì ràwe svng dvtú bøà we íe.
We dø mònggvn dvjà svng roqgvr we bvnlì tvrà svng pàti mvlannø cvn dvgøm we mvwá shì vsvng nø we dvjà kùlwàng svng vtù nø gvsat we vsvng ni ílonge wanø shvdøm we íe. Yesu Kristu nø wurgáng mvdàmø mvrà vl vsvngrì dvpvt ànggøn shaq zíshì nø chutcháng tvrà tóngā ráshà we nø mònggvn svng mòngzøl lvm dvpvt dvyø gvl ráà we ni íe welòng svng nøngmaq shvngbeí vpø shvring nø vto lvm, cvn dvgøm lvm vchvk mvdøng ni íe.
Yesu Kristu ò chutcháng we tvrà nø mònggvn svng mòngzøl lòng vl lvm, vshøt vzìng lvm nvng shóngnøt zøngwe mònggvn bøn dvzvr mvyø we mvtú kèní dvzaqshì ráì we taq rvcángcèrì nøngmaq shvngbe nøt mvsøn vdòngtaq we tvrà svng nøt mvsøn, laqyà, chvpdvp bvnlì tvrà rì taqkèní cvn dvgøm lvm døngjá vlwe gø íe.
Mònggvn yachàng mvdàmø cúnshì lúnì we rvcángcèrì nøngmaq shvngbe nø Gvray àngò vyvng cèrì dø wáshì lvm vyit dø, ngànshà tvrà kèní cúnshì lvm møí, pvlàcè dang taqgø Gvray àng shóng wám shì we mvtú svng vlíng vpo dvzvr we mvwá shì lvm dvkám we íe.
Shøn vtàn lvm vko vkáng mvlú:nò vsvngrì dvpvt nøngmaq shvngbe taqkèní tubûm dvbangā ràe, we tvrà svng mèpvng mèyà rì dvpvt gø dvtit tvle nø mvshøl shvlá vshøpā lvm dvza shàì wenø Svrabín koqkvmpè Leo XIV taqkèní dvkám we íe.
