Kadø íwe Nvrømzalvm Dvbúngò Dang nø Gvrayò Shvlawe Svng Shvmáng Mvlúnò

Svrabín koqkámpè Leo XIV nø nárni November (17) yaq taq ”Vsvng dvgùng vhánglvm dvpvt mvkok we vsvng mvdò svng shvdønglvm waì” wawe kà vgo taqkení lìpòng taq tuqráì we shaqré shaqtvngrì dvshvt bø’à. We lipòng svng Svrabín koqkámpè ò rúng gvbà lvmpvngø cvmrérì dvpvt dvzøm mvkok we mvdò kení lvjvngò we íe. We lipòng taq tuqráì shaqré shaqtvngrì mvdvmø dudozinrì gø vbáe.

We mòngkà taq Svrabín koqkámpè í lipong kà vgo nvng vbúng dø vsvng mvdò vrvmsvng mvkok lvm, vsvng dvgùng nø Gvrayí zìwe ìshøt gømpaq írvt wedang vdè nvnggùn, shánøtí lúnshì we mví, wervt zvndvtut dvki vrè we dvshà mvhøtlvm vhømshì we vrvm taq Gvrayí nøngmaq pvn mán yvngà we svng dvdvm rae.

Gvrayò Shvlawe dang nø kadø íwe Nvrømzalvm dvbúngò we dang svng shvmánglúnlvm mví we dang, nøngmaq nvng tiq dvng vsvngrì svng vchvk mvdøng mvkok dvzømdvzī vrvm vráshì nø cúnshìlvm dang,

Dudozinrì taqkení Kàngpè Kristu mepvng shvnshér dø cvnlvm dang, chúchvn chyìdarlvm, kàtácíngrállvm gvdiq vshøm dang nvng Kàngpè dvpvt gømpaq, núngpà dø tvciqciq vpnúng shàì we dang, Wervt dvgá vsvngrì svng kadø vtù vgám, vzì vrung wa we mavl, shóngnøt dvtvn vrvmshìlvm dang,

Lìpong taq tuqráì we shaqré shaqtvngrì ígø tasvng tale dvtvnshàì vsvng vrvm vdùng taq vlwe dvgùng vhánglvm svng vtù vgám mavl høq tubum dvbvnglvm nvnggùn zí dvshvt bø’à. Wedang taqkení wa vsvng mvdò vrvm nø kvmvrvm dø vràshìlvm dang, vsvng vrvm nø tāsvng tāle vpǿ shvringì vdū we dang, Røtshì we svng kàtálvm dvrá we dang nø dvshá zā we dang nvng cúnshì we íe.

Dvmmárì nø jèjú gømpaq tìwàng dø ìshøt dànzønglvm Svrabín koqkámpè taqkení wemvdoò bvnlì íwe cvm we vsvngrì svng mvkok dvzømdvzī dang svng nvnggùn zíshì we dang, dudozinrì shvngbe tiqnøt tiqmvyùng nøtkøm vrvm vráshì nø shvngømré ò dvzøm mvkok we tóng laqyàrì té nvnggùn kánglvm dvbvngì wa nø dvshvt dvtú shìe.