Putao rvgaq taqø shélang dvpø (3,800,000)lvp zi we dang

11shvla 2025 nøng ta Putao yvng shélang dvpø (3,800,000)zi e wa nø shá lún shìe. Nøng Vrvm 10shvla kení 12 shvla høq Putao rvgaq shikwit cøng lòng nø svmi gvzà gwa we mvrvp yvng kení vcár mvkvmshì høqshaq cøng we íe.

Nøng vrvm September shvlá be ra lvp kèní December shvlá høq chømyō, gūchang, shaqre mà rvweng shélang tvplvm búng we íe. Mvring vsvng rì taqkèní shélang svng mvngàkvntì taq záng nø køtvm we, mvzang sītù dølvm we, cóí sàngvm nø lángò we íe.

Vlévmì we (8) nøng vdòng shélang svng àngde rvgaq taqø kvnkøt vm lvm kvn dvpvt wā lángò we íni gø yà nøngla taq nø àng dvpø vl lúngì rvt wulaq ku láò weí tvpvm we vtong ku vlíng vpo lúngì we íē.

 Rvngtung Cøngni rvtø November shvlá nvng December shvlá dvmu bvnlì vtv’ng bø’ bvnlìrì cvm we rvtø Miwa rìò shéláng wvnshi we dang nvng Myoq gvba rì taqkèní wulaq bvnlì àngkàng rì mvring rvgaq svng shélang wvnshì lvm rvt dì we íe.

Shélang vlang we rvtø dørøm nvm vlēlvm dánshì dvgvp tvplvm pvn vwáshaq íwe tvphàngí vdìpmò nø tvpmò we íe.  Vyáng rvtø nvng yàdøng rvtø taq nø lúng rì poò nø tvpmòe, àngmaq vl we lúng rì svng vtì í vpa:pmò nø gø tvpmò we íe.

Shélang rì nø lúng rì kèní búng weí tìnī lvp svng vlàng nø shéláng tvp rì ínø wè tìnī lvp taq dvbacèrì wàò nø tìnī lvp vdù we dvba rì taq tvmshì só:rì tvplvm pvn rì taqkèní dvgø’shì nø tvpmò we íe.