Angwa Nár (33), C SHØNG (33rd Ordinary Sunday, Year C)
Kristu vdòng taq Vpø’ íwe pèmè vnvm vchvng shvngømré rvzvngcerì shvngbe svng Pamvra! wvngè.
Rvtø v-rvm Gvray gvsangò jèjú svng mv-ngú lúnì dø tiqdvchá Dènio lvban gø cúnshì we Gvray gvsang mongkà taqkèní vrá tiqkvt nònggùn vzí kélvm rvtø tiqlòng vtoshì lúnì rvt gvzà oqā wàlvm ra íe.
Yalvban nø, tiqnøng vdòng Angwa Nár (34) lvban vl yv’ngkèní lvngdøm lvban Nár (33) lvban wà lvban svng gòng bø’shà. Dèni tashì lúnlvm Gvray Mongkà ciqrì nø;-
(1) Malihki 3:19-20 …. Gvray gvsang shøn we nø, Døngman dvrá we angni angyaq rì tuq lúngè. Ang bøng svng vpø’ shvringò rì mvdvm, vrá Døngman dvzvr gø nø, zā yv’ng dvban we vzàm nvng tuq lúngè, wàe.
(2) 2 Htesaloni 3:7-12 ….. Dvzvr Polo í Htetsaloni vsvngrì kaq dvkv’m we móngkà taq nø, Dvzvr rì í dvtán we vjang laqyà rì svng cvndvgøm nø, angdèo gønshaq lvpat roqgārshì lvm rvt, tvmu bvnlì rì svng shvlá wā laqwáshì, wā dvkv’m dø tiqdvchá dèshatnøng. Tvmu bvnlì wá vzing vsvng nø Vmpa gø laq màvm, wā dvkv’m yangì, Mongkà mvshøl svng táshì lúnlvm í daqè.
(3)Luka 21:5-19 …. Yesu nø Yerusalemò Noqngøm Chøm tøngnu vràl vcat lvm dang Kàdvtut nø shø’n yangì. Shiwa vsvngrì svng Kà shvdiq zí shì nø shøn yangì we taq, lvngdøm angni angyaq rì shini mvtuq ra dvgvp, v-tu v-re mvhøt lvm rì nvmlat tuq ràe, wā dvkv’m yangì.
Vpø’ íwe pèmè vnvmchvngmaq,…
“AD (70)nøng taq bø’n bung yangì tvrà”
Yerusalem Noqngøm Chøm tøngnu nø ring we longtvng nvng Vshé Vlu gønpaq rì taqkèní gvzà ring dø dvcøp shvnvp yangà. Angnøng (46)nøng vléhøqshaq vrvngò nø wà yangà we íe. Yuda dvci rì dvpvt, yalòng Noqngøm Chøm tøngnu nø Gvray gvsangò Chøm, dvci cerìo dvgùng nvng jór pòngbang íe. Vkangpè Yesuí nø, vzàng lvp rvtø angdvja rì svng tvlu sháò rvt, Namaqí èyvng nøng dvre rì nø, long tiqchvng mvdvmø tiqchvng màhaphøqshaq vrøl vcat we angni angyaqrì tuq lúngè, wā a:lòe. Jø’ngjøngni AD. (70)nøng Roma cildu gamzø pè General Titu í shøl we cil mvdò í nø Yerusalem wāma nvng Noqngøm Chøm tøngnu vdòng kaq svng gòng nø gvsat lúngà we í shvtin gvyaq yangà. Wè ni nø Yuda dvci rì dvpvt Mònggvn angni tin gvyaq vle we angni pàdø í yangì.
(Lk 21:8-17) Yesu i Kà dvtut yangà dang
Luka dvbùshang Mongkà taq, Vkangpè Yesuí nø Yerusalemò Noqngøm Chøm tøngnu vrøl vcat lvm dang rì svng vzàng kaq Ka dvtutnò nø dvshvng yangà. Vrá nø, Dvtut Mònggvn yachang lvngdøm angni angyaq rì shini mvtuq ra dvgvp, dvshà mvhøt v-tu v-re vhø’m lvm dang rì svng shø’n yangà. Vrá nø, Yv’ng lúnlvm lvmik gømlā rì mvmè gø dvbáò nø shø’n yangì tvrà gø shálúnshìe. Wè rì nø..
(1) Vsvng mvmè nø Yesu Kristu àngbøng taqkèní bung lung nø, Ngà nø Kristu wè gø’ øngàe, rvtø angni rì gø tuq lúngè, wā shø’n lungè, wàe.
(2) Cìl mvzvn wàò nø shanglut lut lúngè.
(3) Nvmnø’ vnvn shì lungè.
(4) Zā yv’ng dvjvng angpvnpvn nvng dvkøwangme tuq lúngè.
(5) Muqlang taqlap kèní shvre dvké we lvmik gømlā me rì gø dvtánshì lungè.
(6) Dvki vre, shvre dvkut we mvbø’n rì bøn bung lunge.
Vkvtdø bø’nbung lòng nø lvngdøm angni shini mø-í. Yadang rvt Dvgø’shì lúnlvm dvpvt le shvdøm nø dvzvrè shvrúngè. ” Namaq ètø̄nshìnøng kvtnø gø̀nshaq èlún lóngnønge, wàe”(Luka 21:19). Vpø’ íwe vnvmchvngmaq Yalòng Mongkà taqkèní Vkangpè Yesuí nø nøngmaq shvngbe svng lvngdøm angni dvpvt dvgø’shì lúnlvm rvt shvdø’m nø nònggùn èzí íe.
Namaq ètø̄nshìnøng kvtnø angdèo dvpvt gø̀nshaq èlún lóngnønge “(Luka 21:19) wā dvkv’m dø tiqdvchá tønshì nø kvmnønt tvrà taqø Døngman dø lvngdøm angni lvpat bēni høqshaq cúnshì nø tvleshì laqlúnì. Mvrà vdòng yv’ngkèní vwángshì nø Gvray vdòng taq mongzøl dø cúnshì laqlúnì shvngbe svng oqā.
