Shì Yv’ng Vsvngrìo Bóy (ALL SOULS’ DAY) NOVEMBER 2.
Shvngbe mvdvm Gvray mongzøl lòng laqtuqdaq!
Vpø’ íwe pèmè vnvmchvngmaq e, Ya lvban November (2)taq nø, Vkangpè Yesu Kristu vdòng taq shagóng dvjø’ngshì bø’ì, shì bø’ì Pèmè vnvm vchvngmaqo Pvlàcè dvpvt vjúrøt dvbvng íwe (ALL SOULS’ DAY) Angni, Bóy lvban gø íe.
Ya lvban taq nø;-
(1) Shi yv’ng Vsvngrìo Pvlàcè dvpvt Parvt vjúrøtnà i mà?
(2) Kádvgvp kèní vjúrøt pvngshì yangì mà?
(3) Pa vjú zílúnè mà? wàwe Pvlàcè kvmnønt tvrà mvshøl, Mongkà taqkèní gø dvshat nø nònggùn zí mvyøngè.
Ya lvban taq rø v-du we Gvray móngkà ciqrì nø;-
(1) Byinyà Bārvmi 3:1-9
(2) Roma 6:3-9
(3) Mati 25:31-46.
Vpø’ íwe pèmè vnvmchvngmaq,
Nøng vrvm November (2) ni nø, Catholic shvngømré taqkèní Vkangpè Yesu Kristu vdòng taq mà-vl bø’ì we shì yv’ng Vsvngrì Pvlàcè dvpvt vjúrøt dvbvng íwe Bóy me tiqni gø ínø, vchvk we angni gø íe. Wè ni taqø, Vkangpè Yesu vdòng mà-vl bø’ì, shì yv’ng Vsvngrì shvngbeò Pvlàcè Gvray móngdàn yv’ng góng lúnlvm dvpvt (lvksan) dvdvm nø vjúrøt nà we angni gø íe. Gvray vdòng shagóng dvjø’ngshì nø Shì yv’ng Vsvngrìo Pvlàcè dvpvt vjúrø:tnà lòng svng mvká:m rì dvpvt nø , lvjøm mà-vl we íe. Íni gø, Catholic shvngømré rvzvngcerì dvpvt nø, Pvlàcè kvmnønt mvshøl nvng dvkv’m Kà, (Tradition) vtóng tiqlòng ku gvzà vchvk we, vpø’ shvring shì nø vjú røt dvbvng we bóy me angni tiqni íe. Ya bóy nø, November (1)ni Shànshér vsvngrì shvngbe kaq svng shvgùn shvring we bóy angni mèpvng, Vkangpè Yesu vdòng shagóng dvjø’ngshì, shì bø’ì we vnvmchvngrìo Pvlàcè dvpvt Missa Kàgvp nóng nø vjúrøt dvbvngì we tvrà íē.
Vrá nø, vkvtdø Vjúrøt dvbvng i taqsórí Pvlàcè kvmnønt nònggùn kūnga lùshàì lòng gø ínø, shì yv’ng Vsvngrìo Pvlàcè nvng vzøm nø Gvray gvsang mvrdvng yv’ngø vjúrøt dvbvng ké í lòng gø íe. Vrá Tv’n dvgá shì yv’ng Vsvngrì nvng Brìmbrìm shór we Gvray gvsang móngdàn yv’ngø tiqdø vhø’m lvm lòng svng vlømshàì lòng, Kv’mì lòng gø íe.
Dèni la taq Shi vsvngrì kaq svng vjúrøtnà we mvwào shvngømré rì gø mvmè vlē. Íni gø, Mònggvn taq Online media vtan lúngì dø tiqdvchá Døngman tvrà, Pvlàcè kvmnønt tvrà svng gun dvtøp nø jèjú angkang angpè angmèmaq, àngnvm angchvngrìo Pvlàcè dvpvt shvla we jèjú bvnlìrì wáà nø vjúrøt dvbvng dvtan lòng svng yv’nglúnshìe, shálúnshìe. Yalòng nø Tv’n dvgá ni dvpvt Døngman lòng svng vchvngò lòng, Shvkse wáshì lòng gø íe, walòng svng shálúnshìe.
“Lvpat mvshøl angdùng “
Shì rì dvpvt, téwa nø Vkangpè Yesu Kristu vdòng mà-vl bø’ì we shvngømré rvzvngcerìo Pvlàcè (faithful departed)svng vjúrøt dvbvngì mvshøl angdùng svng gø dvtan mvyø’nge. Fransik Móngdàn Cluny wàwe wāma rvgaq taq, Shànshér we St. ODILO í nø Angí shø:lòe, Cluny Monastry (Dvrá shvdiqshì Zong) taq November 2, 998 nøng taqø, yalòng Angni svng mvsat yangà dang shálúnshìe. Cvm we Svmi móngdàn (purgatory) yv’ng tuq we Pvlàcè rì dvpvt vjúrøt dvbvng we dang shvdøm dvshat nø nònggùn zí pvngyangà.
Vrá nø,
“Svrabín Koqkvm Benedict XIV”
Vkvtdø Gvray vdòng shagóng dvjø’ngshì, Shi vsvngrì Pvlàcè dvpvt vjúrø:tnà dvbvng we bvnlì nø gvzà v-du we tvrà íe, wā AD. 1748 nøng taq gø, Svrabín Koqkvm pè Benedict XIV í vrá tiqkvt dvtú nø Nønt vrá we í mvsat yangà dang shálúnshìe.
“Svrabín Koqkvm pè Benedict XIV ” í
Nvmlat tiqboq Mònggvn cìlmvzvn bøn dvgvp 1914-1918(WWI) taq Svrabín Koqkvm pè Benedict XV ínø, Shvrúngshú rì svng wèni taqø Vkangpè Kàgvp Missa svng (3) baq nónglvm vmìng vkang zíò taqsórí, shì yv’ng Vsvngrì dvpvt vjúrøt dvzvr ya:nga. Wè rvtø yv’ngkèní dèni høqshaq, shì yv’ng Vsvngrìo Pvlàcè dvpvt vjúrøtnà we angni taq, Shvrúngshú Wajau rì taqkèní vshøm (3) baq Missa Kàgvp nóngshì nø vjúrøt dvbvng shì we íe. Vkvtdø wáshì lòng nø Cvm we Svmi móngdàn ( )taqø mvrà rvt dàm zí vhø’mò we Pvlàcè rì Gvray gvsangí jø’ngjøngni dvshá zā mvkok dvdí chutchvng lòng, Mongzøl lòng svng zí lún rvt, dvtan lòng svng ká:mì rvt íē.
Wervt vpø’ íwe pèmè vnvmchvngmaqè, Cúnshàì we lvpat taq Jèjú angkang rì íwe angpèmèmaq, àngnvm angchvngrì svng dvja angdangdan rvt Jèjú vtvngshì, vwángshì mvlúnì we íni gø, mvrà vchut ké v-toq v-tìp dvman mvlúnì we íni gø (ALL SOULS’ DAY) Gvray vdòng shì yv’ng Vsvngrì Pvlàcè dvpvt vjúrøtnà we angni taq, mà-vl bø’ì we angdèo angpè angmè, angci angkang, angcø angcèrì àngnvm angchvngrì svng dvdvm nø Missa gønpaq røtnímà we, Vlu gønpaq shvrúngà we, Dvgvm dvshérà nø vjúrøt dvbvng we Noqngøm Missa tvyø rì taq , vjúrøt bóy taq Kvmnøntní lúm ra íe, vjúrøt dvbvng ra íē. Vkvtdø vjúrøt dvbvngì we taq, cúnshàì we lvpat taqgø, Tv’n dvgá ni Pvlàcè lvpat taqgø Pvlàcè ìshøt, Kvmnønt kūnga téwa vtoshì lúnlvm vlē walòng svng shálúnshìe.
( Roma 14:7-12) vdòng taq, Nøngmaq cúnshàì nìgø, Vkàngpè dvpvt lè cúnshàì we íe; nøngmaq shìi we ínìgø, Vkàngpè dvpvt shìi we lè íe. Wedø í rvtnø nøngmaq cúnshàì we ínìgø, shìi we ínìgø, Vkàngpè Angò wa ni íshàe. f Yalòng rvtnø ni Kristu nø shìrì dvpvt gø, cúnshì rì dvpvt gø Angkàng wáshìlv́m rvt, Ang nø shìá:mì nø vrá zun lú:ngì, wā dvzvr Polo taqkèní gø vkvtdø shvdøm nø dekv’m yangshà. Wervt vpø’ íwe pèmè vnvmchvngmaq, vkvtdø vjúrøtnì lòng nø, Gvray gvsang shvrúng lòng taq, cúnshàì we íni gø, shì íwe íni gø cvndvgøm nø vjúrøt dvbvng ké í lòng íe.
Cvm we Svmi móngdàn (PURGATORY) tvrà
Mongkà taq Cvm we Svmi móngdàn, wàwe mà-vl lòng svng angdùngce ku tøshì lòng mvyv’ngshì. Wè pàdø, Shì yv’ng Vsvngrì dvpvt vjúrø:tnà, shvla we bvnlì svng wàtaqsórí vjú lún we bvnlì wáà lòng vléshìe, wànø gø mvshøn yangò.
Vkvtdø Shì yv’ng Vsvngrì dvpvt vjúrøt dvbvng lòng nø, Purgatory( Cvm we Svmi móngdàn) walòng svng Kv’mì rvt íē. Shì Vsvngrìo Pvlàcè nø chang Muqlang móngdàn kaq tuqlvm rvzaqè. Rvgaqtøm taq vléshì we Mvra rì shvngbe svng dvshérà lún kvtwā, Muqlang móngdàn kaq svng góng lúnlvm vlē, walòng íe. Purgatorium ( Cvm we Svmi móngdàn) ò tvrà Shànshér we móngkà bok taq shvlá wace dvtú we tvrà nø mà-vl. Íni gø, Maccabee Mongkà 2 Macabee 12:39-45, 1 korn2:15, 2 Tim 1:16-18, Dvtan 21:27 yarì taqø vrù we, shøn yangà we móngkà svng dvdvm vjáng nø Cvm we Svmi móngdàn vl lòng svng shvngøt dvtú we íe. Vjúrøt dvbvng ké lvm lòng svng dvkv’m dang gø íe.
Vrá nø, “(1545- 1563)COUNCIL OF TRENT” taq wà yangà we lipong svng gø dvtan mvyø’nge.
Trent nø Italy móngdàn Tipo tut kèní wāma tiqlòng íe. AD- 1563 nøng taq wàò we Lìpong me yv’ngkèní, purgatory nvng shì yv’ng Vsvngrì dvpvt vjúrøt dvbvng lòng svng vrá tiqkvt shvdø’ng yangà we svng shálúnshìe.
Shì bø’ì we Pvlàcè rì dvpvt vjúrøt dvbvng lòng nø gvzàni vchvk dang svng Catholic shvngømréò Dvrá Mongkà Kàru bok mvr CCC 1030-31 mvr taq gø vrù yangà, lòng svng yv’nglúnshìe.
” Shì lòng nvng cúnshì lòng nø lvngdøm tiqci mø-í” walòng svng gø yv’nglúnshìe, shálúnshìe.
Shì lòng nvng cúnshì lòng nø nøngmaq dvpvt lvngdøm tiqci mø-í nø, Dvciq lvpat gønshaq móngdàn kaq svng góng we bvngka me le íe. Dvciq lvpat gønshaq dvpvt, Nvmlat pvngshì dang gø íe. Shì lòng nvng Zun lòng nø Dvciq lvpat Zaqle Wang di lvm dvpvt tvlí:ngà we mvbø’n gvba tiqlòng gø íe. Nøngmaq shvngbe nø tiqni rvtø taq Vkangpè Yesu Kristu vdòngø shagóng dvjø’ngshì nø shì lvm rì wā í shàe. Íni gø, kádvgvp, Ka shvra taq, kadø wā shì lvm lòng svng mvsháì.
