Pope Francis ò (45) boq waboq Apostolic journey dvbùshvng zaqlè tvrà làngdø̀m móngdàn íwe Singapore móngdàn kèní shaq shaqwa pàmvràcè vtoò we
Svrabín koqkv́mpè Francis ò Asia nvng Oceania móngdàn rì svng dvbùshvng zaqlè tvrà diwe (4) boq waboq làngdø̀m móngdàn íwe Singapore móngdàn kèní Pope Francis tuqráì we svng Svrado Changi nv̀mbø̀ngshø̀ tø̀m taq shaq shaqwa pàmvrà wanø vto bǿà we íe.
September 11, 2024 ni dørø̀m rvtø̀ Changi nv̀mbø̀ngshø̀ tø̀mø tuqráì we Pope Francis kaqsvng South-East Asia móngdàn gvbà íwe Singapore móngdàn kèní pàmvrà wanø̀ vtoò we gø íe.
Yalòng Pope Francis ò dvbùshv̀ng zaqlè tvrà dvpvt Singapore móngdàn ò móngzøngcè rì shvngbe nø shaq shaq wa dvbùnøt kèní caò we svng gø shálún shìe.
Yalòng zaqlè tvrà taqkèní móngdàn vdòng taq màbóngwe kámnøt tvrà mvdò rì shvngbe mvngu shìnø shvla we mvtú tiqlòng lúnlv́m dvpvtrvt gø àngmaq taqkèní shø̀ngrvn shìwe gø íe wanø̀ vtàn lú:ngà.
Pope Francis ò yadø íwe zaqlè tvrà taqkèní shòlaqré rìò kámnøt tvrà, lvpat vháng vlún lv́m tvrà rì dang nvng móngdàn sø̀msaq mòngzø̀l lv́m tvrà rì svng gø vrangā lúnwe íe wanø̀ àngmaq taqkèní vlǿmshì we gø íe.
Ya South-East Asia móngdàn rì taq vlwe shòlaqré rì dvhø̀ taq wulaq tvrà rì nvng singwe yvkwe shìwvt rì gø vlwe dang yadang nvng sing nøgø vrashì nø shvla we mvtú tiqlòng vtoshì lúnlv́m svng gø vlǿmshì we íe.
Singapore móngdàn taqnø kám vsvng rì (18%) vl we vdòng taq Catholic shvngø̀mré vsvng nø (3.5%), vsvng gorø (176000) gǿ dángte vlwe gø íe. Bukdaq vsv̀ng rì nø (33%), Muslim (15%), TaOsits (11%), Hindu (5%), dvgá (17%) vlwe gø íe.
Móngdàn vsv̀ng dvcìrì ku Chinese (74%), Malaysian (13.5%) nvng Indian (9%) vlwe móngdàn tiqlòng gø íe. Singapore mongdàn nø màbóngwe shvngø̀mré kámnøt tvrà rì, màbóng we vsv̀ng dvcì rì nvng wulaq tvrà shvngbe tuqwe mvtaq tónglaqyà rì kø̀mzøqdø mvngu shìwe tiqmóng gø íe.
Asia móngdàn rì vdòng kèní mònggv̀n yv̀mbv̀n vsv̀ngrì dvtuq shìnø wulaq kø̀mwe móngdàn tiqlòng íe wanø gø shǿnlún shìwe íe. Yadø màbóngwe tvrà rì àngpv̀n pv̀n dvhø̀ taq Pope Francis ò dvbùshvng zaqlè tvrà taqkèní shvngbe dvpvt mòngzø̀l we tvrà nvng vrv́m vránø̀ vzø̀m lúnwe tvrà svng tóngā lúnlv́m dang svng gø vlǿm shìwe íe.
#rvarvwang #singapore #PopeFrancis #ApostolicJourney
