Dèni vbatò Shvnshér vsvngrì laqyà kèní cvdvgøm dvzaqshì lvm dvzaqshì ràwe dang Svrabín koqkvm pèí dvkám we
Pope Leo XIV í dèni vbatò shvnshér vsvngrì wanø 7 gø svng mvsat lvm wàò we bóy tvyø dvpvt Roma svng kømngøm ráì we shvngømré vsvngrì kaq wedø shvnshér vsvngrì ò nøt laqyà rìku cúnshì lvm dvzaqshì ràwe dang tvnùng bøà we íe.
Vleá:mì we lvbán náni taq Pope Leo XIV taqkèní shvnshér vsvngrì 7 gø svng mvsat nø mònggvn svng vrìng bøà we tvyø taq St Peter noqngøm tømø kømngøm ráì we mònggvn móngdàn vrvm kèní shvngømré vsvngrì kaq dvtú mòngkà shøn bøà we íe.
We bóy tvyø taq mvsat shìbøì we shvnshér vsvngrì 7 gø àngmaqò lvpat tvrà rì svng vrá vchà:ngò nø àngmaq nø Gvray nvng tiqdvng vsvngrì dvpvt shvnshér dø lvpat cúnshì bøì we vsvngrì íwe nvng àngmaqò mùngnø shèrwe lvpat mvshølrì nø nøngmaq dvpvt gø Gvray àngmóngdàn dvpat kørshì rà tiqlòng ku íe wawe dang vtàn bøà we íe.
(Saint Ignatius Maloyan)
Saint Ignatius Maloyan nø Armenia móngdànò Svrado (Bishop) tiqgø íwe taq we móngdàn vdòng kámnøt tvrà rvtnø rvcáng cèrì kaq shvnip shvnvr nø gvsat vréshì we dvjà taq àngnø kámnøt shvre tiqgø wáshìnø àngò shvngømré (vyàng roqshú shvlá) tiqgø wáshì we nø àng lvpat gønshaq zíshì we høqshaq dvzaq shì bøì we dang àngnø Kristuò nøt mvsøn tvrà lu cúnshì bøì we shvnshér vsvng tiqgø íwe taq Armenia móngdànò rvcángcèrì dvpat vløm rà tiqgø íwe dang vtàn bøà.
Saint Peter To Rot dang nvng singnø àngnø mòngkà svra tiqgø ku vl yv:ngì we kámnøt shvrepè íe. Nvmbat 2 mònggvn mvzàn rvtø taq vtang kèní yvknø svre dvké we dvjà vdòng dvbùshvng bvnlì tvrà kèní gønshaq zíshì bøì we shvnshér vsvng tiqgø íwe dang, àng taqkèní svma 1 gø mvdàm lushì we tvrà kaq zaq zaq vgán nø Gvray shóngshì we tvrà svng dvtú dvzaq shìyvngì we dang shøn vtàn bøà we íe.
Venezuela móngdàn kèní saints Gregorio Hernández) nvng (Saint Carmen Rendiles) nínø Gvray kaq kørshìrà, dvsháza shóngnøt tvrà nvng kánøt tvrà rì taq shvngøt shú shvlá íráì we dang àngníò lvpat tvrà nø shvnshér we Gvray tvrà kèní cúnshì nø shvngbe dvpvt laqyà shvlárì gvlnø mvkok dvdí we nøtlaqyà rì zaqshøp shvlá gvlráà we dang vtàn bøà we íe.
(Saint Maria Troncatti) nvng (Saint Vincenza Maria Poloni) nø Ecuador móngdàn dvpvt Gvray tvrà taq apnúngshì we shvrúshú/ shvnvprì svng vrang shvzat dvzaqshì taqsörí Gvray bvnlì taqni gøshaq behøq dvzaq shìbøì we nvng vjúrøt dvzaqshì we tvrà taq vpø vrvmwe, vlømvm vrvm we shvnshér vsvngrì íwe dang vtàn bøà.
Pope Leo XIV taqkèní làngdøm taq Saint Bartolo Longo ò lvpat mvshøl svng vtànò we taq shvnshér pè àngnø àngpè, àngmè mv-vl dvratcèrì, dvshá mvhoq vsvngrì dvpvt dvsháza tubúm dvbangā we dvsháza bvnlì svng àng lvpat yv:nggùng wá dvzaqshì bøì we tiqgø ínø àngò shèrwe nøt laqyà rìnø kadvgvp gø mvngshèr we lvpat tvrà tiqlòng íráì we dang vtàn bøà we íe.
Vatican News
