Àngcì àngkàng maq svng dvkúm, dvzøm ràwe pvlí, pvlaq rìò bvnlì døngjá
Àngcì àngkàng maq svng dvkúm, dvzøm ràwe pvlí, pvlaq rìò bvnlì døngjá
Àngcì àngkàng maq wawe nø chøm døngku tiqlòng dvpvt nø shøngkàng tiqlòng døni íe. Pvlí pvlaqrì wawe nø chøm døngku tiqlòng dvpvt shøng àngrøng rìnvng vbóng we íe. We shøngtøng taqkèní shøngshí, shøngwvt shvlá rì shvzvt lvm dvpvt nø we shøngtøng svng tubúmāwe shøngrø rì taq mvdøng vchvk longwe gø íe.
Àngcì àngkàng maqò shiqshvn tvrà dvpvt, àngmaqò lvpat gønshaq yvng lvm dvpvt wawe nø àngcø, àngcèrì, àng pvlírì taq gvzàni vchvk nø bvnlì døngjá vlwe gø íe. Àngmaq kadvgvp cì ám, cì aq rawe, àngmaq kaq svng nòngwòn kù:ngà vlwe cì, ám-aq dvrè rì svng kadø dvgøā lvm wawe gø àngcø, àngcèrì nvng pvlí, pvlaqrì taq døngjá vlwe gø íe.
Àngcø, àngcèrì taqkèní vdèò àngcì àngkàng maq svng vdèí kapà èwàòe? Zùng èrongwe ínìnø vdèò tiqni wawe rvtø vrvm vlevm we vrvm àngmaq yvngsvng shøn vtàn we, kadø bøndaq longwe tvrà rì svng àngmaq nvng dèmà:n we yvngkèní paqzí gø lu shì nø àngmaq nvng kadvgvp gø vzømwe tvrà wáshì ràwe gø íe.
Àngcì àngkà maq wawe nø svrøng raweó àngmaqò vgomvrcì, mvcøng nøt rì vnøn rawe bøn sháòe. Àngcø àngcèrì kaq svng røtkà àngboq boq røt rawe, vnáò we bøn long dvgvp nøt yvng nø shvláwa àngmaqò kàshaq rìsvng táā lúnlvm gø laqni vchvk longe. Welòng nø àngmaq kaqsvng vpø shvring we laqyà tiqlòng gø íe.
Wedø wáāwe tvrà taqkèní àngmaqí gø vdèkaq svng vrá oqà wanøt vshøp dvzvrā wegø íe. Àngcì, àngkàng maq wawe gø àngmaq lvpat vrvm dvgvp rvmnvng rvmchvngrì nvng rùng rùng wacè vlyvng vsvngrì wani íe. Ínìgø yadø svrøng rawe rvtørì taq àngmaqò rvmnvng rvmchvngrì nvng todø vhøm nø vzøm lvm yvkvm we írvt àngmaqò nøtaq mvrøt nø rì kèní nøt dvcvmshì sháò we svng síngsháā ràlonge.
Rvcángcèrì dvpvt July 27 ni nø vsvk tevm we, àngpè, àngmè, àngcì, àngkàng maq svng dvgùng shvring we àngni tiqni wanø mvsatshì we gø íe. Weno scng American móngdàn taqgø 1978 nø kèní wápvng shì bøì. We ni svng mvsat shìwe àng mvtú nøvsvk tevm we vdèò àngpè, àngmè, àngcì, àngkàng maq svng dvgùng shvring shálvm, àngmaq svng mvkok lvm, dvzøm dvzi lvm tvrà kaq téwa vchvk we døngjá tiqlòng ku lushì lún lvm dvpvt wawe gø íe.
