Shòlaqrérì kaq svng Pope Leo XIV taqkèní mòngzøl lvm tvrà svng vrang dvzaqshì lvm dvkám we

40 nøng gøm mònggvn zìlàngrérìò àngni taq Pope Leo XIV taqkèní mònggvn taq dvshà mvhøt vsvngrì nvng shìwvt àngdang dang rì dvhø taq shòlaqrérì taqkèní mònggvn mòngzøl lvm tvrà dvpvt rvcángcè shòlaqré rìnvng tiqdø vzøm nø bvnlì wàlvm dvkám we íe.

Mònggvn zìlàngrérìò àngni svng tuqrawe 2027 nøng November 23 ni Korea móngdàn Soul myuq taq wàlvm dvgø shìwe íe.

Pope Leo XIV ò mòngkà taq Yesu Kristu ò shìlòng svng jórlún bøà we mvtú nø rvcángcèrì ò kámnøt tvrà mvdøng nvng àng nvrøm vjøng ni íe. We tvrà taq làngshò zìlàngrérì taqkèní móng lvmang tvrà dø bvnlì wawe møí nø kámnøt tvrà ò lvpat àngshvr rì vlíng vpo lvm dang kèní dvzaqshì ràwe dang dvkám we íe.

Rvcángcèrì ò kámnøt lvpat tvrà wawe nø cipshì we nøt laqyà vdòng taqø shvnglut we tvrà íe. Wervt chutcháng shúpè tvrà svng shvkse wáshàì wegø íe.

Wervt Pope Leo XIV taqkèní dvtú kà taq nøngmaq nø Gvray tvrà kèní vsvr mvnshì we vsvngrì kaq mvdìì we ínìnø Yesu Kristu ò chutcháng we tvrà svng shvkse wáshàì we møí wanø vtà:nò we íe.

Wervt chutcháng we tvrà svng shvkse wáshàì we tvrà nø shìwvt àngpvn pvn vkønwe vdòng taqø bvnlì wawe íe.

Ínìgø we shìwvt tvrà taq ripwe vsvng nø Gvray nvng téwa tvpní shìlún lvm tvrà ni íe wanø shvdøm we íe.

Pope Leo XIV taqkèní shòlaqrérì kaqsvng nonggon ziwe taq shòlaq lvpat wawe nø tigø wa lvpat tvrà taq kashì nø vllvm møí, tiqgø nvng tiqgø vzøm nø ròráshaq kù:ngà kèní bvnlì wàlvm íwe svng vtàn ráà we íe.

Màrvwìng we shóngnøt rì taqkèní vzøm vzvp lúnlvm nvng mòngzøl we tvrà svng vrang dvzaqshì lvm dvkám bøà we íe.