Gvrayí nø mvrà rì svng chutā nø̀ jejú èzíìe
3 October 2025
Pope Leo XIV taqkèní Gvrayí nø mvrà rì svng chutā nø jejú èzíì we dang shìwà vsvngrì kaq tiqkvt vrá shvdǿm nø dvkám bǿà we íe. Svrabín koqkv́m Leo XIV taqkèní “Yesu nø nøngamq shvngbeò chutcháng we tvrà dvpvt vlǿmrà íwe dang” shvngøt dvtú we íe.
Yesu kristu shìyv́ng kèní zun bǿì nø nøngmaq shvngbe svng chutcháng bǿshà we tvrà kaq kadvgvp gø dǿmsháì nø kámnøt tvrà taq zǿm shvngáng shìlv́m dang mòngkà kèní shvdǿm we íe. Døngmvn we Yesuò shìlòng svng jór lún bǿà we tvrà nø ngànshàpè svng vrá tvle teqshì we tvrà tiqlòng mǿí.
Té vtang we dvsháza shóngnøt rì svng màdat èzíì we tvrà tiqlòng ni íe. Gvray àngò nøt mvsø̀n nvng nøngmaq bashàrì ò nøt mvsø̀n rì nø gvzàni vsháy we ínø̀ nøngmaq bashà rì taqnø nøngmaq kaq zá vtøp dèzv́r bǿì we tiqpv̀n pv̀n dvpvt shv̀mná vsorwe nøt, tvle teq shàì we nøt mvsø̀n rì nøngmaq taq kadvgvp gø vshøpì we íe.
Yesu nø àng zùpvng móng kèní zunnø vtáng ráì mè pvng tvle teqshì we nøt zángshì we mv-vl, mvrà chutā we nvng dvsháza shóngnøt ziwe bv̀nlì tvrà svng zàndvtut èzíì we íe. Yesu àng zunlú:ngì mèpvng Svre nøt rvt chø̀m vdòng taq bv́ngkà cøtshì nø róngshì we dvzv́rrì yv́ng svng dinø̀ àngmaq dvpvt mòngzø̀l lòng wawe ìshøt gømpaq svng zíráà we íe.
“Namaq shvngbe mvdàm mòngzø̀l long laqtuq daq wanø̀ dvkám ráà. Wedø pàmvrà vtoq shìráì we kànø dvzv́rrì àngmaq nvrø̀m zawe tvrà svrelv́m shìwvt tvrà rì kèní nøt shvlǿmā we jejú svng zíā wegø íe. Wedø Yesu yv́ng kèní dvzv́r rìí mòngzø̀l nø nøt shvlø̀m we ìshøt jejú svng vtoshì lúnbǿà wenø dvzv́rrì àngmaq dvpvt pvlàcè dang téwa kù:ngà káng we svre nøt rì kèní lutshì lúnwe nvng nøt shvlø̀m we ìshøt rì svng vtoshì lún dvzv́r wegø íe.
We rvtø̀ kèní dvzv́r rì nø dvbùshvng bv̀nlì nvng Yesu dang svkse wáshì we tvrà dvpvt gønshaq zíkamshì we høqshaq dvzaqshì ráì we íe wanø Svrabín koqkv́mpè taqkèní dvkám ráà we íe. Yalòng dvjà nø shvngø̀mré rìò kámnøt tvrà dvpvt nvrø̀m tiqlòng ni íráì.
Wedø íwe dvbùshvng mòngkà tvrà kèní rvcángcèrì shvngbe nø tiqni mvdàm tiqni luqmvn, vzíng mvnshì ráì nø kù:ngà gø téráshà we íe wanø Svrabín koqkv́mpè Leo XIV taqkèní mòngzø̀l we tvrà dvpvt gø svkse wáshì lv́m dang dvkám bǿà we íe.
