Noqshi bø̀ng wa ríò rì
Mt 7:21-29
Dèni tálúnshì lv́m Gvray dvbùshv̀ng mòngkà taqnø døngman we kàdvtutshúrì nvng Gvrayò àngmòngkà svng ca:nì we vsvngrì wáshì lv́m dang kàshvbóng rì taqkèní yv́:nglún shìwe íe. Nøngmaq vdè Myanmar móngdàn vdòng taq Myen kàshvbóng tiqlòng svng kadvgvp gø tálúnì we vle. “Nònggøp kà taqkèní nø Gvray Gvray wanø chvpdvp laqyà taq nø mvdøng mvman wawe” kàshvbóng svng kadvgvp gø tálúnìe.
Mòngkà tut yatut taq vtàn ráà wegø Gvray àngbø̀ng svng “Kàngpèá Kàngpèá” wanø̀ go lú:ngò we vsvng shvngbe beí muqlàng móngdàn gónglún lú:ngòwe mǿí, vdèò nònggøp kà taqkèní vtánshìwe dø chvpdvp bv̀nlì laqyà kèní wáshì vsvngrì wáshì lv́m Gvray ang shóngshì we dang vtàn ráà we íe.
Bashàrì dvhø̀ taq bǿnsháì we tiqlòng nø mvdamrvm kèní wáshìwe, vjúrøt shàì we tvrà, alu vdán zíshìwe, dvsháza bv̀nlì wawe tvrà rìshvngbe nø jøng jøng ni vdèò dòng nøt mvsø̀n kèní døngman dø wáshì we mǿí nø vsvng mv́rdàng taq yv́ng vnvp lv́mrvt wáshì we gø gvzà vlwe svng yv́nglún shìwe íe.
Wedø mvdàmram wa vsvngrì mv́r taq yv́ng vnvplv́m dvpvt wa wáshì we nø zishìl mvdv̀mø chø̀m vrv̄ngshì we svngdál nvng vbóngvm we svng Yesu shǿn vtàn ráà we íe. Zishìl mvdv̀mø vrvngshì we chø̀m nø shø zaq nø, tì tø̀ng nø, nv̀mbø̀ng mvrù mut ra weí chø̀m wechø̀m svng vtit ra kvt, vtūngv̄m nø angshí vrø̀mv̄me, wanø Yesuí dvkám kà shø̀n yv̀:ngà.
St. Louis deblois í shǿn vtàn ráà we taq gø “Namaqí døngmvnwe dvbùshvng bv̀nlìrì, vjúrøt dvzaqshì we bv̀nlìrì, dvsháza bv̀nlìrì wá dèzaq shìnøngwe ínìgø vdèò àngnvm àngchvngrì svng døngman we shóngnøt mvgv́l shàì we ínìnø Gvray àngò àngcǿ àngcèrì shìpvn taq vbá lú:ngì we mǿí” wanø̀ vtàn yv̀:ngà.
