Yesu Àngmè Mari ò Mvsø̀n vnā nø̀ rvyù rvyóng we tvrà (7) dang
Yesu Kristuí dvshá mvhøt vhǿ:mò we Paska rvtø̀ shv̀nshér we lvbán (5) ni døni Catholic shvngø̀mré taqnø Àngmè Mari ò naqciq riq mvsø̀n vnā nø rvyù rvyóng we tvrà svng dvdam shìwe bóy àngni svng wáshì we íe.
Yesu àngmè Mari ò mvsø̀n vnā nø rvyù rvyóng we tvrà (7) dang rì taq noqngø̀m tø̀ngnø taq lòngzàpè Yesu gv̀l daqò we nvng we cv̀mré gǿ rvt àngmè nvrø̀m svng shv̀m mvcǿrí yaqvtnò dø bø̀n bung longwe dang kàdvtut ráà we dang, Yesu Kristu (1) nǿng mvril taq Egypt móng (300) ming vrúm we tvrà svng vtshì ràwe dang, Vsvk (12) Lòngzàpè Yesu noqngø̀m tø̀ngnø taq vmvngwe dang, Yesu Kristuí dvshá mvhøt vhǿmò we Galvwari shìgùng tvrà taq àngmè Mari nvng vhøm we, Wurgáng mvdàm Yesu svng shvtnò we, Yesu vnvng svng wurgáng mvdàm kèní luò nø kǿmò we tvrà rì ni íe.
Yalòng svng màná dø̀mrø tiqlòng ku wáshì we bóy àngni taq Servites bø̀ngkèní dvzømshì we dvbùshvng mvdò rì kaq AD 1668 nǿng taq Mari ò mvsø̀n vnā nø rvyù rvyóng we tvrà svng tvnùng bǿà mèpvng AD 1814 nǿng Svrabín koqkv́mpè Pious VII nø móng dàn vtáng svng lùngò we dàm kèní lutshì ráì wekvt Gvray jejú svng oqà wawe mvsvt tiqlòng ku Catholic shvngø̀mré vdòng dvráshv̀ng bóy àngni ku vrìng yv̀:ngà we íe.
Yesu àngmè Mari nø yadø íwe naqciq riq mvsø̀n vnā lv́m, rvyù rvyóng lv́m tvrà rì svng kagǿí síngshá lúnā ìe walòng svng dvdam dvtøp lv́m tvrà tiqlòng gø íwe dang shvdǿmā we bóy àngni tiqni gø íe.
