Kàngpèò Wurgang svng Shvring shvtà bóy
Dvrá dvshvt 21:4-9
Filipi 2:6-11
Yohan 3:13-17
Deni nø mònggvn rvgaq vrvm taq vl we Catholic shvngømré shvngbe í, Kàngpè Yesuò Wurgang svng Shvring shvtà ìwe bóy svng wa ìe, deni nøngmaq mvdøng mvdaq dvdvmlvm vshøm dang vle. Wurgang màbá we Gvray, Gvray màbá we Wurgang nvng Kàngpè vbá we Wurgang, ya Wurgang vshøm pvn svng kalong rvsang shvni ma? Nøngmaq kadø rvsangshì we ka mvdò yvng vbáì we svng dvshvt dvtú mvyønge.
Wurgang màbá we Gvray svng rvgaq mvdvmø cúnshì rvtø taq dvshà mvhøtlvm nvng yat we tvrà rìsvng bat tut vhø’m mvneshì rì, ya mvdòrì íe.
Gvray màbá we (ဒုက္ခကိုဒုက္ခသက်သက်ပဲ) dvshà mvhøtlvm nvng yat we svng vhø’m ra rvtø nøt líng vwángshìlvm nøt mavlrì ya mvdò nø Gvray màbá we Wurgang svng rvsangshì bø’ì rì íe. Pè,mè vnvm vchvng nøngmaq ínø Wurgang svng kadø dvdvm nønge ma? Pvyásin yvng vsaqlvm pvn, lúngjàng taq gwíò nø góng vnvplvm dvpvt dvzøpshìlvm dang dvpvt wa ímá?
Jøngjø’ng wani nø tì svng bìntì dvbønò we Gvray svng vtoshì rae. Ang nø Gvray mv̀rshv̀m vl we ínìgø, Gvray nvng dvcháchá rīng lòng nø, Dvshàshà Ang nø, Ang dvgùng shvyǿmshi nø, vshuq mv̀rshv̀m dvchøpshì sórí pv̄ngtø̀m vsvng mv̀rshv̀m ni shvmvtshi daqì. Ang nø vsvng góng mv̀rshv̀m taq dvtánshì daqì kvt, Ang cipshì nø, shì yv́ng høq kà tá bǿì; jø̀ngjǿng, wurgang taq shì yv́ng høq ni kà tá bǿì Gvray svng vtoshì rae. Yesu Kristu nø Vkàngpè íe wa nø pvlè í dv́ngteí vchà:ngò yv́ng kèní Vpè Gvray Ang ngø̀rdvgùng bunglv́m dvpvt íe (Filipi 2:6-8).
Muqlàng taqlapmø vl yv́ng kèní lāshì daqì we Vsvng Angcè pè wa mø̀í nìnø, muqlàng taqlap svng rvlv́ng lú:nò we kagǿ gø màvl. Rvgaq mvgūng móngø Moshií vbø̀ hàng yà:ngà dø tiqdvchá, Vsvng Angcè pè gø wedøni hà:ngò we vhǿm ràe. Pàwálv́m wani Ang kaq kv́m vsvng í dv́ngte nø dvciq lvpat gø̀nshaq lúnlv́m dvpvt íe. Ang kaq kv́m vsvng kagǿ ínìgø màmvng nø dvciq lvpat gø̀nshaq lúnlv́m dvpvt, Angcè Lòngzàpè zí daqì høqshaq ni Gvray nø rvgaq tø̀m vsvng kaq shóngshie. Kadø íe wani Gvrayí Angcè pè rvgaq tø̀m svng dvzv́r daqà lòng nø, rvgaq tø̀m svng kàngélv́m dvpvt mø̀í, rvgaq tø̀m nø Ang taq kèní gø̀nshaq shvlut lúnlv́m dvpvt mv̀ng íe vtoì (Yohan 3:13-17).
Nøngmaq Gvrayò mvréza nø mvkok dvdilvm rvtø vrvm taq ràìe. Mvràí nøngmaq svng gùr èkwa:ngì rvtnø nøngmaqí gø bǿnnì bǿnsa:ngí nàdv̄ngkéì rì shvngbe nvng yùlyùlcè shèwáì we mvrà svng chut gū:rì nø, nøngmaq vzv̀ng kaq èv́laì we kvlv́ngrà taq tø̄n zánnø:tní kvlv́ng dvjūnlv́m wàì (Hebru 12:1). Nøngmaq nø Gvray dang taqkení ni vrvm vsvr ìe. Vsvng Angcè Pè svng nø mvrà v̄l vsvngrì wūr taq shvtlv́m tvlē bǿò dá:ngí, wurgang taq vtaq bǿò mèpvng, vshø̀m nií vrá zūn lōnge,’ wa nø A:ngí dètá vpshà,” a:lòe (Luka 24:7).
Gvray vbá we Wurgang svng vtoshì shàì kení nø nøt cipshì rae. Ngàí shø̀nò dø mèwànøng Namaq nø pàwálv́m Ngà svng, ‘Vkàngpèá, Vkàngpèá,’ wa gó ègōshà má? Shǿng shvlá tiq tø̀ng nø angshí mvgv́m shí we màvl. Vrá, shǿng mvgv́m tø̀ng kèní gø shǿngshí shvlá shí we màvl (Yohan 6:43, 46). Nøngmaq nøt byó vtvng rvtø nø ka rvtø íshàe wa ni, Gvrayí mvrà chutnà we rvtø íe wang nø vtoshø:nge. Vmvng we vyv̀ngcè kàshvbóng, Gv̀msùng tiq gø̀m vmvng we kàshvbóng, Nōngtøm pè vmvng we kàshvbóng
(Luka 15:1-32) taq nøngmaq svng shaqshaq wa dvbùì lòng nø vdu we íe,’ wa nø dvshvte. Kàngpè Yesuò Wurgang svng vtoì nø cvnlvm shvngøt dvtú we mòngkà taq nvnggùn lūshìlvm wàì, shvngbe svng oqà.
