Dvgá mvshǿl angpvnpvn
Wemvdv̀mø A:ngí kàshvbóng kèní rá angmaq svng a:lòe. “Nemaní nø nēmànrì svng tvrà shø̄l ngu:tnòe ma? Wedø shø̄:lò nìnø vní gǿgǿ dv̀ngkø̀r taq màjav̄m ni ma? Coqcv́n gǿ nø ang svng shvngøtshú gǿ mvdv̀mø rīng we mø̀í. Kø̀mgøm cv̄n dv́ngshi bø vsvng kagǿ gø, ang svng shvngøtshúpè dv́ngte wa í longe. Nvnvm nvchvng gǿ nē taq v̄l we bv̀lcì svng nø èyà:ngò nø nà nē taq vl we shǿngdø̀m svng nø rá mèyv́ngshi ma? Nà vne taq v̄l we shǿngdø̀m svng dv́ng nà mèyv́ngshi ke, nvnvm nvchvng gǿ kaq, ‘Vnvm pèá, nà nē taq zv́ngshì we bv̀lcì lòng lóngangvtnø̄ng,’ wa nø kadøwa shǿn shvla ni? Nøt vnínøt ècà:nò gǿ nàá, nà vne taqò shǿngdø̀m lòng vzv̀ng èlúshi; wedá:ngí wa nvnvm gǿ ang nē taqkèní bv̀lcì lòng lúālv́m nàí shàn wa èyv̀ng lú:ngòe. Ngàí shø̀nò dø mèwànøng Namaq nø pàwálv́m Ngà svng, ‘Vkàngpèá, Vkàngpèá,’ wa gó ègōshà má? Shǿng shvlá tiq tø̀ng nø angshí mvgv́m shí we màvl. Vrá, shǿng mvgv́m tø̀ng kèní gø shǿngshí shvlá shí we màvl. Kapv̀n shǿng ínìgø angshí taqkèní sháshì we íe. Bv̀nghǿ póng kèní nv̀mgwè shí røpmv́m mvlúnshì.Bv̀nghǿ mvbø̄n kèní gø bìmshí røpmv́m mvlúnshì. Vsvng shvlá gǿí nø, ang nøt vdòngø shøpmò we shvla lòng taqkèní shvla pv̀n shv̀l lú:ngòe. Vsvng mvgv́m gǿí gø ang nøt taq mvgv̄m lòng kèní mvgv̄m pv̀n shv̀l lú:ngòe. Kadø íe wani nøt taq dv̀n vshøt pv̀n kèní ni ang nònggø:pmí shø̀n lú:ngò we íe.
Màá taqkení dvgá vsvngrìí nø bvnlì wàò we dang nvng kà shøn we mvtú dangrì v:le. Wàò we dang kà shøn we màbúngni nø vsvng kagø’ ígø màvpø’ra. Kà shøn we dang nø gvza íla dø shøn nigø, wàò we dang nvng màbúngni nø vsv:ngí vzel kélvm wa ídaqe. Pà mvlánlàlòng. Kà nø zaq dø shøn we ínìgø, wàò we dang jò nìnø vsvngrìí mvshòng ínìgø ang svng nø vtoòe. Shøn we nvng wàò we dang gvza shvla ninø vsvng vrv:mí vpø’ shvringlvm wa íe.
Deni Kàngpè Yesuí nøngmaq shvngbe svng shvngøt we dang nø Ngà kà tá bǿò dá:ngí, cv́n dø̄ng vsvng wegǿ nø nø mvpv̀ng angké rvnaq dø dùò dá:ngí, lóngtv́ng mvdv̀m kèní vrā:ngò nø, chø̀m wáshì vsvng nvng vbónge. Ngà kà táò dá:ngí mvcv̀n vsvng wegǿ nø, mvpv̀ng angké màrv̄ngshaq vbā mvdv̀mø chø̀m wáshì vsvng nvng vbónge. Wechø̀m svng tì lv̀nggù:ngí vpuqa:tnò kvt, cē vtúng nø angshī vrø̀mv̄me,”
