Bv́ngkà tàn kà

Yohaní vrū yà:ngà we Dvtan Kàru
Bv́ngkà tàn kà
Yalòng nø kadv́ngte màlé dvgvp ílv́m dv́nshi we mvtúrì,* Yesuí Ang vshuqrì svng shvyvnglv́m rvt, Gvrayí Yesu svng zíò we shø̀ngran íe. Yesuí Ang muqlàng dvzv́r dvzá:rò nø, Ang vshuq Yohan svng mvtú yalòng shá dvzá:ròe. Yohaní nø Gvray mòngkà nvng Yesu Kristu Ang shvksekà rì nvng a:ngí yà:ngò rì shvngbe shø̀:nòe. Kàdvtut kà yarì rø̄ò vsvng nvng vrushaq rì svng tā nø cv́ndø̄ng vsvng rìí nø ìshøt ìgv̀n lú:nòe. Pàwálv́m wani angni nø yùl ráì.

Shvngø̀mré shvngøt lòng svng pamvra wa we
Yohan ngàí nø, Asia móng taq èv̀lnøng we shvngø̀mré shvngøt lòng svng vrongvtnòe. Vl gø àv́lshaq í nø, v́l gø v́ldv̀ng wa nø, dvgáni gø v́ldv̀ng wàlv́m pè Ang taqkèní gø, Ang koqkv́m rúngtv̀ng mv́rdv̀ngø vl we Pvlàcè shvngøt lòng taqkèní gø, vrá Yesu Kristu taqkèní gø, jejú nvng mòngzø̀l lòng nø namaqí leqlúnnøng. Yesu Ang nø, kv́mv́m daq we shvkse wáshì pè, shìrì dvhø̀ kèní nv̀mlat zun lú:ngì pè nvng rvgaq tø̀m koqkv́mri svng øpshú pè íe.

Nøngmaq svng èshù:ngì nø, nøngmaq mvrà kèní Ang shvwií ni shèlàng bǿshà nø,* nøngmaq svng móngdàn tiq lòng í dèzá:rì nø, Ang Gvray nvng Ang Angpè dvpvt shvrúngshú í dèzv́r bǿshà pè nø, dvgùng gùngshv̀ng nvng øplv́m vmíng vkv́ng dvcìq lvpat laq vl dvr. Yadø laq í daq. Eyv̀ngnøng, Ang nø rvmøt zúnshì nø di daq kvt, vne í dv́ngteí gø, Ang svng yaq yà:ngà rì shvngbeí gø, Ang svng yv̀ng lú:ngòe. Vrá, rvgaq tø̀m vsvng angpv̀n í dv́ngte gø Ang rvtnø rvyù longe. Wedøni í longe, yadø laq í daq. Vkàngpè Gvrayí, “Ngà nø Alfa lòng nvng Omega lòng ǿngàe. Vrá, v̀l yà:ngì pè gø, v̄l pè gø, dvgáni gø v́ldv̀ng wàlv́m pè gø, Pà gø wá dá:ngò pè ǿngàe,” wae.