Tì mvdv̀m Yesu Di we
Mt 14:22-36
Dèni Gvray mòngkà taqkèní pvlàcè nònggòn lushì lv́m dvpvt Mt 14:22-36 taq Yesu tì mvdv̀m diwe dang yv́nglún shìwe íe. Jø̀ng jǿng taq mvgvm mà shvla we nøt mvsø̀n laqyà rì nø vsv̀ngrì ò dòng nøt mvsø̀n kèní vjáng shì nø tuqrawe wa íe wanø̀ Yesu kristuí àngmaq svng vtànò nø̀ shvngøt dvtúò we íe.
Mvrà wawe nø àngnø àngwa bø̀n longwe mǿí, nøngmaq tiqgǿ vrv̀mò dòng nøt mvsø̀n taqkèní dvdam nøt rì kèní pv́ngshì nø bø̀n ralòng ni íe. We mvrà dǿng vdòng taq vjáì nø mvrà shìwvtò vshuq rì bǿn dvzv́r we íe. Wedø mvrà dǿng taq vjáì we mvrà vshuq rì kaq chutcháng lv́m Yesu nø rvgaq tø̀m svng tuq ráì wegø íe.
Wedø Kristu nø Gvrayò shóngnøt kèní mvrà èchutāì we íe. Nøngmaq tiqgǿ vrv̀m taqkèní Yesu mèpvng jø̀ng jǿng ni cv:nìwe vsv̀ng rì íshà nì nø yvklv́m shìwvtrì dvpvt àngò ìshøt jejú rì vtoshì lúnlv́m ílonge. Gvray àng tiqgǿ taqkèní wa vsvngrì ò nøt mvsø̀n kaq dvshv̀n dvshérā lún we íe.
Dèniò mòngkà taq Yesu vtì mvdv̀m di we svng tiqgóng nøt mvsø̀n kèní kv́m we rvtø̀ vdòng Piter nø vtì mvdv̀m dílún we ínìgø àngò kv́m nøt vyuqvm we tiq dvná taqni vtì taq vløp we svng nøt cun dvtøp shàì nø̀ Gvray àngò shv̀shér we kv́mnøt tvrà taq ngàngdø̀ng dø zǿm shvngáng shì lv́m shvdǿm we íe. Vdèò lvpat, tiqgóng svng mvrà vshøpwe tø̀ngnø ku v̀:lì we ímá? mǿíni Gvray àng jejú rì vto shàì we shvrà tiqlòng ku cúnshàì we ímá? dvdam dvtøp shìlv́m shèdǿ:mì we íe.
