Jór nv̀nggwòn ò mvnggá
Vsv̀ng tiqgǿ vrv̀m taq vdèò lvpat tvrà zìdang vháng vlún lv́m wawe nøt mvsø̀n rì vl we íe. Ínìgø mv-v́l mvdaq íwe ràvchvk we tvrà rì svng cv́n dvgøm nø wá dvzaqshì we tvrà taq tiqgǿ nvng tiqgǿ nø vsháy we írvtnø̀ làngdø̀m taq vtoshì we jór nvnggwòn àngshí àngwvt rì gø màbóng nø vsháy we íe.
Jø̀ng jǿng taqnø vdèò lvpat tvrà jór lúnlv́m dvpat nø vwā dø bv̀nlì tvrà rì svng vhú vhwaq wawe kèní vtoshì lúnwe tvrà mǿí lòng svng nø shvngbe í síngsháì we íe. Wervtnø̀ lvpat tvrà jór lúnwe tvrà walòng nø vdèò lvpat tvrà ò mvhøt we shìwvt tvrà tiqlòng íe wanøgø shǿn lúnshì we íe.
Wedø íwe lvpat tvrà taq vdèò jàng laqyà rì svng gø vnvp, vtok dø wáshì nø vl lv́m gø vchvk tiqlòng ni íe. Vdèò dvdam nøt rì svng língshì ràwe, tòniò vdè jàng laqyà rì svng téwa vtok vnvp we laqyà kèní língshì ràwe, lvpat tvrà wawe mvdàm vdèí síngshá shìwe, vtoshì we tvrà rì svng língshì ràwe nvng vsv̀ng tiqgǿ ò nøt mvsø̀n kùngà, jànglaqyà rì shvngbe svng shvla we tongkèní língshì we dangrì shvngbe vbá we íe.
Vránø vsv̀ngrì nvng mvngu shìnø bv̀nlì wawe tvrà gø vchvk we tiqdang kèní vbá we svng gø síngshá rà longe. Vsv̀ng mv̀ngpòng mvdò rì nvng vzø̀m nø bv̀nlì wawe nø we vdèò vsv̀ng mv̀ngpòng mvdò svng gø vháng vlún dvzv́r we mvtaq vdèò lvpat tvrà mvkrǿm mvdøp rì svng gø vrangā we írvt vdèò lvpat tvrà svng gø vháng vlún dvzv́r we íe.
Vdè góng vdè kámnøt vl we vsv̀ng rì dvpat gø we vdèò lvpat tvnù mvnggá rì jórlún lám tvrà taq wá vdu we bv̀nlì rì mvdàm jórlún lv́m íe wawe kámnøt zángshì só:rí wá dvzaq shìwe tvrà nø té wa shvla we tvrà tiqlòng gø íe. Vdè góng vdè kám nøt zángshìe wawe taq gø vdè ò lvpat tvnù mvnggá svng tuqlún lv́m tvrà, zitnøt rv́l nøt rì mvdàm taq lángshì we ínìnø jø̀ng jǿng ni shvla we àngshí àngwvt rì svng vtoshì lúnlv́m wa íe.
Vsv̀ng lvpat rì wawe nø rvtø̀ vrv̀m taq mòngzø̀l we tvrà wanø mǿí long yvklv́m shìwvt àngpv̀n pv̀n vkǿn rawe vdòng taq dvzaqshì ràwe írvtnø̀ nøt shvriq shìlv́m gø gvzà ni vchvk we íe. Vdè ò lvpat tvrà taq bv̀nlì bv̀ncí rì jór lún vháng lúnlv́m wawe tvrà taq nø vdè tiqgǿ taqkèní kadø íwe bv̀nlì tvrà rì wálún, dánglún we, vdè nø kapà dang taq mvdaq nø bø̀n we, vdè taqkèní wálún we tvrà rì svng gø nøt cun dvtøp nø rvcvngshì we tvrà rì gø vchvk tiqlòng ni ílonge.
Kadø íwervt jór nv̀nggwòn rì vtoshì mvlún we walòng svng dvtøp lúngì wekvt wedø krvtcǿm we, jór nv̀nggwòn mvlún shìwe wawe tvrà rì shvngbe nø vdè tiqgǿ ò wáshì we tvrà taqni mvdø̀ng singlong wegø íe. Vdè ò lvpat tvrà taq vdè tiqgǿ taqkèní wá vdu we bv̀nlì tvrà rì taq wàlv́m svre nøt zang we vdè ò wálún we kùngà, zìdang rì nvng vdu vbóng we tvrà rì taq dvzaq shìlv́m vtiq we svre nøt kèní wá mvkvm shìwe tvrà gø vdèò lvpat tvrà vháng vlún lv́m wawe tvrà svng vbam kelúngò we íe.
Vsv̀ng tiqgǿ ò dòng nøt mvsø̀n taq zvngwe svre nøt wawe nø shø̀nggv̀n kèní yv́nglún shìwe mǿí, vdèò nøt vdòng taq vcaq we màshvla we tvrà tiqlòng gø íwervt wedø íwe nøt laqyà rì svng vdèò dòng nøt mvsø̀n kèní shvmv́ng lún høq dvzaqshì lv́m gø vtvng kèní vchvk we dang shvdǿm nø nv̀nggwòn ziwe dvtit tvle we íe.
Gregory
