” Mvchí:m we bv’ngkà chit kèní góng lúnlvm dvkv’m we”
Ya lvban taq nø, Vkangpè Yesuí Muqlang móngdàn góng lúnlvm rvt, ” Mvchí:m we bv’ngkà chit kèní góng lúnlvm dvkv’m we” lvban angni gø íe.
Mongkà ciqrì:-
(1) Esaya 66:18-21
(2) Hebru 12:5-7,11-13
(3) Luka 13:22-30[[Esaya 66:18-21 …. Vsvng dvci rì nvng Kà angpvn pvn shøn dvci rì shvngbe svng rvkur lúnlvm dvpvt, Ngà døngdaqè. Angmaq gø dì ra nø, Ngào pòngbang dvgùng svng yv’ng lún lúngòe.
Hebru 12:5-7. 11-13 …… Vkangpè ang shóngshì vsvng kaq shvngøt dvtú lúngòe.
Luka 13:22-30 ….. Nvmshvr, Nvmløp, Tìpo, Tìni rvgaq yv’ngkèní vsvngrì tuqdaq nø, Gvray gvsang móngdàn taqø vl lún lúngòe.]]××
Kristu vdòng taq Vpø’ íwe pèmè vnvmchvngmaq, vle a:mì we rvtø taq, Svrabín Koqkvm pè Leo (14) í dvkv’m bø’ì we móngkà tiqlòng taq yadø wàe.
(1) “Namaqò nē rì svng Vkangpè Yesu Kristu yv’ngkèní mà carlvm rvr na yáshìnøng.” wàe.
(2) “Nøngmaqò Pvlàcè lvpat svng roqgārshì nø vzóngshì ràe,” wā shvngøt dvtú dvkv’m we móngkà svng yv’nglúnìe.
Dèni Vkangpè Yesu Hkristu í shvngøt dvtú we móngkà rì taqkèní (3) mvtú kèní dvshat nø nònggùn zí mvyøngè.
Nvmlat (1) Mvtú taq;- “Mvchí:m we bv’ngkà chit
kèní góng lúnlvm dvpvt, dèzaqshìnøng ” wā dèkv’mìe.
Vkangpè Yesu nø wamà tiq mvring nvng tiq mvring kaq svng dì nø, Gvray gvsang móngdàn dvpvt shvngøt dvtú taqsórí Yerusalem wamà kaq svng léshì lúngì. Wekvt vsvng tiqpè nø, Vkangpè a, chutchvng we shvra kaq tuq lún vsvng nø mvluq mà? wā a:lòe. Vkangpè Yesu shøn we Mongkà taq, ” Mvchí:m we bv’ngkà chit kèní góng lúnlvm rvt, dèzaqshìnøng” Vsvng mvmè gónglvm rvt, lá mvnè, íni gø, góng mvlún lúngò wā shøn lòngè,” a:lòe. Dvciq lvpat gønshaq vl Móngdàn kaq svng góng lvm bv’ngkà chit nø mvchí:mè, wā Vkangpè Yesu Kristu a:ngí ni shøn yangà. Dvzaqshì ràe, Tønzv’n Nønt, Cìpshì nønt, Kvmnønt, Dvshá zā mvkok dvdí shóngnønt vl ràe wà Kà íē. Nøngmaq shvngbe í síngràl lún dø, èshø’nò nì, Muqlang móngdàn kaq dì we tvrà nø mvchí:mè, Svmi móngdàn kaq dì we tvrà nø gwaqè, wā shøn mvyø’ dang íe.
(2) Mvtú taq;-
” Chøm angkang pè kungshì nø bv’ngkà la kvlaq bø’òe “
Yalòng nø, Kà shvbóng mvshøl tiqlòng íe. Ang rvtø, angni wàwe nø mvsat yangà. Rvtø rì svng màpø’ dø shvle taqsórí è vl nìnø, bv’ngkà kvlaq vhø’mò we vsvng nvng vbóng lvm íe, wà Kà íe. Bv’ngkà kvlaq bø’ò nìnø vtv’ng lvp yv’ngø rip nø, bv’ngkà vkoqò sórí, Vkangpè a Vkangpè a, nøngmaq kaq svng è tá:nà daqshà, wā røtnímshì dvgvp, wè Chøm angkang pè í nø namaq kaq svng ngàí mvsháì, wā vtánshì ràe. Chøm angkang pè nvng Na shá kèe, tiqdø è-vm è-aq yangì, tvrà tiqdø dì taqsórí gø shvngøt dètú yangà, wā èshøn dvgvp, wè Chøm angkang pè í nø jø’ngjøngni Ngàí na kaq svng mvsháng, mvsher rì shvngbe e Ngà yv’ngkèní è yilshì bø’nøng, wā vtánshì lúngè, wàe. Yalòng nø Tv’n dvgá ni Ka:ngé lvm lòng svng shvbóng nø, shvngøt dvtú nø dvkv’m we móngkà íe.
Mvtú (3) taq;-
” Nvmshvr, Nvmløp, Tìpo, Tìni wamà rvgaq yv’ngkèní vsvngrì dì daqè”
Gvray gvsang móngdàn yv’ngø vsvngrìo Mvrshvm svng yvng nø rvzvng we mà-vl. Gvray gvsang móngdàn yv’ng góng lúnò rì taq, Shamung, Shanaq, Vdá mvgam, Dvrvt dvrò cerì shvngbe vhø’m nø mv-ngushì lúnòe. Wervt Nvmshvr, Nvmløp, Tìpo, Tìni wamà rvgaq yv’ngkèní vsvngrì nø dì ra nø, Gvray gvsang móngdàn yv’ngø dvciq lvpat vl lún lú:ngòe, wàe. Mongkà kèní shálúnshì we taq, Gvray gvsangí Nvmlat rvzvng yangà vsvngrì nø Israel dvci cerì íe. Íni gø, àngmaqí vlún vkvng jèjú rì svng shvmv’ngshì ku vpo yangì.
Wervt nø, lvngdøm í rì métiqmaq nø mé tiq í lúng nø, Nvmlat métiq í rì tiqmaq nø lvngdøm í daqè, wā Vkangpè Yesuí Shiwa mvngpòng vsvngrì kaq svng shø’n yangà. Abraham, Isak, Yaku nvng Kà dvtutshú rì shvngbe, Gvray gvsang móngdàn yv’ng vl lòng svng namaqí è yvng lú:ngnøngè. Vrá nø, Namaq tiqgóngni vtv’nglvp yv’ng svng shvlé we na høm lú:ngnøng dvgvp, wè shvra yv’ngø ngø rvlā we nvng shà vjik shì lúngè. Yalòng nø mvchí:m we bv’ngkà chit kèní góng lúnlvm rvt, mà dvzaqshì rìò lvpat mvnggá íe, wā shvdømè.
Vpø’ íwe pèmè vnvmchvngmaq Dèni tálún ni we Gvray
Mongkà (1)ciq, Kàdvtutshú Esaya mongkà taq,.. Gvray gvsang nø yadø wàe. Vsvng dvci rì nvng Kà angpvn pvn shøn dvci rì shvngbe svng rvkur lúnlvm dvpvt, Ngà dø’ngdaq nga wàe. Angmaq dì ra nø, Ngào jór pòngbang dvgùng svng yv’ng lún lúngòe. Dvciq lvpat gønshaq nø vsvng shvngbe dvpvt íe, wā shvdøm dang svng tálúnshìe.
Mongkà (2)ciq Hebru Mongkà taq, Vkangpè ínø Ang shú:ngwá:mshì we vsvng kaq Shvngøt dvtúòe. Cvndvgøm ra we Dvrá rì svng shvngøt dvtú cv’na we í , yvklvm rì svng tønzv’n lún nø, lutshì lún dang nvng singdø Nønt mvsøn kūnga rì svng gø shvmv’nà zí lún dang shvdømè.
Luka dvbùshang Mongkà taq nø tálún bø’shà dø tiqdvchá, mvchí:mè bv’ngkà chit kèní góng lúnlvm dvpvt dvzaqshì lvm, kūnga vzàm vtoshì lún ràe. Chutchvng we shvra yv’ng tuqlúnlvm nø mvchí:m we nvng bv’ngkà kvlaq lvm rvtø gø tvlú vl dang Vkangpè Yesuí shvdøm nø dvkv’mè.(Lk 13:24-25)
Lvngdøm taq;-
” Etánøng, lv̀ngdø̀m rì tiqmaq nø métiq í lōng nø, métiq í rì tiqmaq nø lv̀ngdø̀m kaq vja lōnge;” wàe.(Lk 13:30)
Vpø’ íwe vnvmchvngmaq, Yadang svng dvdvm vjáng ì taqsórí Kvmnønt tvrà taqø Pàn vshat wáshàì nø Vkangpè Yesuí shvngøt dvtú we mvchí:m we bv’ngkà chit kèní Cìpshì Nønt, Kvmnøntní Gvray gvsang móngdàn kaq svng góng lúnlvm rvt cvndvgøm nø cúnshì laqlúnì, wvng vrashì taqsórí nònggùn zí mvyøngè. Shvngbe svng oqā.
