Tønzv’n Nønt, Cìpshì nønt, shóngnønt nø mà-vl mvdaq vl ra we
Hkristu vdòng taq Vpø’ íwe pèmè vnvmchvngmaq, dèni nø Kvmnønt Shvre (Shànshér pè) St. Maximilian ò angni gø ínø, dèni rø vdu we (Mati 18:21-19:1)Gvray móngkà ciqrì svng gø vrá tiqkvt dvdvm vjáng taqsórí nònggùn lùshì lvm wàì.
Vpø’ íwe vnvmchvngmaq, Tønzv’n Nønt, Cìpshì nønt, shóngnønt nø mà-vl mvdaq vl ra we(ပါရမီ) Talen rì íē. Tiqgø’ nvng tiqgø’ tāsvng tālè tønzv’n Nønt lòng nvng singdø shvngøt dvtú dang svng Shànshér pè St. Maximilian ínø, St.Taresa of Lisieux ò Kàru bok taqkèní lù yangà we íe. Shànshér pè St. Maximilian nø Cvmré dvgvp kèní St. Taresa of Lisieux ò Sher nø vnvp we laqya rì nvng bvnlìrì mvdvmø gvzà vpø’ shvring sháò dang svng shvmvtshì lúnlvm, cvndvgøm lúnlvm rvt cvnshì yangì we íe. Kvmnønt Shvre Shànshér pè St.Maximilian nø Francis gin Sasvna wà Shvrúngshú tiqpè gø ínø, ang nø Gvray angmè Maria kaq svng gvzà vpø’ shvringò we tiqpè gø íe. Vmè Maria ò tùbùm dvbvng we jèjú rvt Tønzv’n nønt, vzaqshi nøntní Sasvna bvnlì svng mongzøl dø wá lún yangà. Miwa móngdàn høq Gvray dvbùshang sasvna bvnlì wàò nø, lvngdøm taqø Nasi rì í Gvray Dvrá Mongkà rvt tvp we vhø’m yangà nø, Auschwitz dūng vdòng kaq shvlèo nø cv’ng yangà. Wè shvra taq ni, Vm-aq shvrí bāng dø dvki v-re ò nø shvtlvm dv’nò we tiqpè svng chutchvng lvm dvpvt, wè yv’ngø a:ng gønshaq vpnóngshì yangì, we íe.
Dènio Gvray gvsang móngkà tiqciq taq, Gvray gvsangí nø Israel dvci rì kaq Yodan tìwang léshì dvzá:rò we í gāng we rvme vdám mvdvmø tvrà dí dvzá:rò nø chutchvng yangà pàdø, Kvmnønt Shvre Shànshér pè St.Maximilian gø Angò dòngnønt shóngnønt vjø’ng lòng svng bvluò nø ang gønshaq vpnóngshì taqsórí tiqdvng vsvngò Gønshaq svng chutchvng yangà, Shvkse wáshì yangì. Vpø’ íwe pèmè vnvmchvngmaq, Kvmnønt Shvre (Shànshér pè) St.Maximilian shøn yangì we Kà taq, ” Angde bø’n mèyø’ lòng svng dvpø’ màdá èshóngshì ” wā dvkv’m yangì. Dvzvr Piter í nø, ” Vkangpè a vnvmchvngrìo Mvra rì svng Ka dv’ng baq chutnà lvm i mà?” wā Vkangpè Yesu svng røtnímshì yangì. Gvray gvsangí nø A:ngò Mvra chutnà we dvrá lòng svng shvbóng shvmvt lùshì taqsórí cvndvgøm nø cúnshì lúnlvm dvpvt, vrá nø, Kvmnønt Shvre pè St. Maximilian í shvbóng shvmvtshì lùshì ra dvtan yangà pàdø nøngmaq kaq svng gø Gvray gvsang móngdàn dvpvt Shvkse wáshì lúnlvm rvt ègo íe, shedømì we angni tiqni gø íe.
Shvngbe svng oqā.
