Mati gōò we
MT 9:9-13
Kristu vdòng taq shóngshø̀ngwe pè, mè, Vnvm, Vchvng maq Dèniò mòngkà taq Mati svng Yesuí gōò we dang yv́nglún shìwe íe. Vsv̀ng tiqgǿ taq vlíng vpo we tvrà 3 dang vl longe. We rì taq Nv̀mlat pv́ngshì we tut, rvwè tut nvng làngdø̀m tut rì íe wanø̀ Pope The Great of Gregory í vtàn ráà wegø íe.
Nv̀mlat tut taq vlíng vpo vmwe vsv̀ng rì byo we, ngø̀r ngun we tvrà rì vtoshì lúnò e wanø̀ Svrabín koqkv́m pè taqkèní vtàn ráà wedøni dvbùshv̀ng mòngkà tálún bǿà we kuya gúnvm we vsv̀ng tiqgǿ íwe Mati gø vlíng vpo we tvrà ò nv̀mlat tut íwe Yesuí àng svng gōò we kà ” Ngà mèpvng ècv̀n ra” wawe ngø̀r ngun we kà shaq svng tálúnò we íe.
Àngò tiqchø̀m vsv̀ngrì shvngbe mvrà shìwvt dǿng taq vlwe yv́ng kèní Yesu mèpvng cv̀nwe dvzv́r shvlá tiqgǿ vpo ráì. Wewa mvtaq mvrà vl vsv̀ngrì kaq rvwìng we vsv̀ngrì dvhø̀ vdòng taq ínìgø mvrà chutshú Gvray nø mvrà vl vsv̀ngrì kaq téwa dvsháza shóngnøt shórā nø mvkok we gø íe.
Nøngmaq tiqgǿ vrv̀m gø vlé shàì we mvrà dǿng kèní vle mvlún:ì. Kàngpè Gvrayò dvsháza shóngnøt kèní wa mvrà dǿng kèní lutshì lúnì we ínø̀ tasvng màrvwìng we shóngnøt kèní vzø̀m vzvp vtoq vtip lún lú:ngì kvtwa nøngmaq shvngbe gø kø̀mzøp we kùlwàng taq v́l lún lv́m ílonge. Wedø Gvray jejú nvng kø̀mzøp we kùlwàng vdòng taq cúnshì lúnlv́m dvzaq shàì.
